San Juan 18 - El Nuevo Testamento

Okajsikej Jesús

¹ Ijkuak Jesús yotlan kijtoua in tlajtlamach*, okis inuan inomachtijkauan* niman oyajkej ipan on okse ilado on río itoka Cedrón. Ompa onkatka sen kojtlakijloj kampa Jesús okalak inuan inomachtijkauan*.

² Judas, on yejuan kitemaktiliskia Jesús, no tlaixmatiya ompa, pampa Jesús miyekpa onosentlalitoya inuan inomachtijkauan* ompa ne.

³ Niman Judas oajsik ompa inuan miyekej soldados. Niman no okinuikak sekimej ipolicías on ueyitiopan yejuan oualajkej ikan intlanauatil on fariseos* niman intlayekankauan on tiopixkej. Yejuamej yayaj ikan armas niman kitkiyaj inlámparas niman okopiltin.

⁴ Pampa Jesús ye kimatstikatka tlinon ipan nochiuas, ouajla okinnamikiko, niman okintlajtoltij: —¿Akinon nenkitejtemouaj?

⁵ Yejuamej okijlijkej: —Jesús nazareno. Jesús okinmijlij: —Nejua niJesús nazareno. Judas, on yejuan okitemaktilij Jesús no ompa inuan nemiya.

⁶ Niman ijkuak Jesús okinmijlij: “Nejua niJesús nazareno”, oajketsteuetstiajkej ipan tlajli.

⁷ Kemaj Jesús oksejpa okintlajtoltij: —¿Akinon nenkitejtemouaj? Niman yejuamej okijtojkej: —Jesús nazareno.

⁸ Niman Jesús okinmijlij: —Yonemechijlij ika nejua. Tla nejua nennechtejtemouaj, tla ijkon in oksekimej xkinkauilikan ma uiyan.

⁹ In onochiu san para onocumpliroj on tlen Jesús okijtoka: “On yejuan otinechinmakak nion se xopoliu.”

¹⁰ Kemaj Simón Pedro, yejuan kipiyaya sen espada, okixikopintiaj niman okitekilij iyekmanakas sen tlakatl itoka Malco. Yejua itlakeual katka on más ueyi tlayekanki itech on tiopixkej.

¹¹ Pero Jesús okijlij Pedro: —Xkalakti moespada kampa otikixtij. ¿Tlen tiknemilia xijki noneki nitlajyouis ken noTajtsin okitlalij para nitlajyouis?

Jesús okuikakej ixpan Anás

¹² Kemaj on miyekej soldados iuan intlayekankau niman impolicías on hebreos* okajsikej Jesús, niman okisalojkej.

¹³ Kemaj okuikakej itech Anás. Anás imontaj katka Caifás yejuan ipan on xipan más ueyi tlayekanki katka intech on tiopixkej.

¹⁴ Caifás sano yejua okinmijlijka on hebreos* ika más kuajli para yejuamej tla mikis se tlakatl ipampa on país.

Pedro okinenek* Jesús

¹⁵ Simón Pedro iuan okse nomachtijketl kikuitlapanuiyayaj Jesús. On okse nomachtijketl kixmatiya on más ueyi intlayekankau on tiopixkej. Yejua ika, no okalak iuan Jesús ipan ikiauak on tlayekanki.

¹⁶ Pero Pedro onokau kiauatenko. Yejua ika, on nomachtijketl yejuan kixmatiya inmasueyitlayekankau on tiopixkej okisako niman otlajtlajtoj iuan on siuatl yejuan tlapiya ne kiauatenko, niman okalaktij Pedro.

¹⁷ Kemaj on siuatl yejuan tlapixki ipan on kiauatempan, ijkin okitlajtoltij Pedro: —¿Tlen tejua xno tiitemachtijkau on tlakatl? Pedro okijtoj: —Ka, nejua ka.

¹⁸ On tekitkej niman on policías okitlalijkaj tlitl de tekojli niman majmaniyaj nototonijtikatkaj pampa seuaya. Pedro no ompa inuan nemiya nototonijtikatka itech on tlitl.

On más ueyi intlayekankau on tiopixkej okiyolkuitij Jesús

¹⁹ On tlayekanketl intech on tiopixkej okitlajtoltij Jesús de on inomachtijkauan*, niman de on tlen kitemachtiaya.

²⁰ Jesús okinmijlij: —Nejua onitlajtlajtoj ixpan nochi tlakatl. Nochipa nitemachtiaya ipan on sinagogas* niman ipan on ueyitiopan kampa nosentlaliaj nochimej on hebreos*. Ijkon tej, xitlaj* san onikichtakaijtoj.

²¹ ¿Tline* nejua tinechtlajtoltia? Xkintlajtolti on yejuan nechkakiyaj. Yejuamej ma kijtokan tlinon nikimijliaya. Yejuamej kimatstokej tlinon nikinmachtiaya.

²² Ijkuak Jesús ijkon okijtoj, sen ipolicía on ueyitiopan yejuan ompa nemiya okixayakauitektiaj, niman okijlij: —¿Ijkon tiknankilia on más ueyi intlayekankau on tiopixkej?

²³ Jesús okijlij: —Tla itlaj xkuajli onikijtoj, xkijto tline xkuajli. Pero tla kuajli on tlen onikijto, ¿tline tinechmailia?

²⁴ Kemaj Anás okititlan itech Caifás on yejuan inmasueyitlayekankau on tiopixkej. Jesús sanken* salijtiaya.

Pedro oksejpa okinenek* Jesús

²⁵ Chika Pedro sanken* nototonijtikatka itech on tlitl, okijlijkej: —¿Tejua xno tiitemachtijkau on tlakatl? Niman Pedro*, okijtoj: —Ka, nejua ka.

²⁶ Kemaj se itekichiuilijkau on tlayekanketl itech on tiopixkej, yejuan ken kitaya on tlakatl yejuan Pedro okinakastsonteka, ijkin okitlajtoltij: —¿Xiuan onimitsitak ne ipan kojtlakijloj?

²⁷ Pedro oksejpa okinenek*, niman kemaj nimantsin otsajtsik sen kaxtil*.

Pilato okiyolkuitij Jesús

²⁸ Kemaj okixtijkej Jesús ichan Caifás niman okuikakej ipan ipalacio on gobernador. Ye uajtlanestiaya niman on hebreos* xokalakkej ipan on palacio para maka nijtlakoskej ixpan Dios. Tla nijtlakoskej ixpan Dios xuelis kikuaskej on tiotlak tlajkuajli ipan on iluitl Pascua*. Yejua ika xokalakkej ipan on palacio.

²⁹ Yejua ika, Pilato ouajkis para okinnots, niman okinmijlij: —¿Tlinon ika nenkiteixpanuiyaj in tlakatl?

³⁰ Yejuamej okijlijkej: —Tla yejua xkichiuaskia on tlen xkuajli, xtimitsajuikiliskiaj.

³¹ Kemaj Pilato okinmijlij: —Xkuikakan. Nemejuamej xyolkuitikan niman xtlajtlakolmakakan ika on nemoleyes. On hebreos* okijlijkej: —Pero itlanauatil César xtechkauilia yakaj tikmiktiskej.

³² Ijkon onocumpliroj on tlen Jesús okijtojka ika yejua ijkon mikis.

³³ Pilato oksejpa okalakito ipan ipalacio, okinots Jesús niman ijkin okitlajtoltij: —¿Tejua tiinRey on hebreos*?

³⁴ Jesús okinankijlij: —¿On tlen tinechtlajtoltia san tejua tikonnemilia, noso pampa oksekimej omitsijlijkej akin nejua?

³⁵ Pilato okinankijlij: —¿Tlen tiknemilia ika nejua nihebreo? On mochannekauan* niman on tlayekankej tiopixkej yejuamej omitstemakako notech. ¿Tlen tlinon otikchiu?

³⁶ Kemaj Jesús okinankilij: —Nejua xnitlamandaroua nikan ipan in tlaltikpaktli ken se rey. Tla nitlamandaroskia nikan, on yejuan nouan kistinemij nechmanauiskiaj para nejua xnechtemakaskiaj intech on hebreos*. Pero nejua xnitlamandaroua nikan ipan in tlaltikpaktli.

³⁷ Kemaj Pilato okijlij: —Tla ijkon tej, ¿tejua tiRey? Jesús okinankilij: —Nejua niRey ken tejua tikijtoua. Nejua onitlakat niman oniuajlaj ipan in tlaltikpaktli para onitemachtiko on tlen melauak. Nochimej yejuan kitlakamatij on tlen melauak, kakij tlen nejua nikijtoua.

³⁸ Pilato okijlij: —¿Niman katlejua on tlen melauak? Ijkuak ijkon yokitlajtoltij, oksejpa ouajkis para okinnots on hebreos*, niman okinmijlij: —Xoniknextij itlaj xkuajli yejuan okichiu in tlakatl para niktlajtlakolmakas.

Jesús okitlajtlakolmakakej para kimiktiskej

³⁹ Pero ye ijki uajnochijtiu para nemechmakauilia ipan in ueyi iluitl Pascua* se yejuan tsakutikaj. ¿Nenkinekij tej, ma nemechmakauili inRey on hebreos*?

⁴⁰ Kemaj nochimej otsajtsikej: —¡Yejua maka xmakaua! ¡Xmakaua Barrabás! Niman Barrabás, sen tlachteketl katka.