San Juan 17 - El Nuevo Testamento

Jesús okichiu oración impampa inomachtijkauan*

¹ Ijkuak Jesús yotlan kijtoua in tlajtlamach*, oajkotlachix ne iluikak, niman okijtoj: —NoTajtsin, yoyejkok in hora. Xnechueyili nejua yejuan nimoKoneu para nejua no nimitsueyilis.

² Tejua tej, yotinechmakak poder para nikmandaros nochi tlakatl, niman para nikinmakas nemilistli para nochipa on yejuan yotinechinmakak.

³ In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan.

⁴ Nejua yonitlan on tlen otinechnauatij nikchiuas. Ijkon tej, yonimitsueyilij ipan in tlaltikpaktli.

⁵ Aman tej, noTajtsin, ne kampa tinemi, xnechmaka on ueyilistli yejuan mouan nikpiyaya ijkuak in tlaltikpaktli xe onkatka.

⁶ On tlakamej yejuan tejua otinechinmakak intsajlan on tlaltikpaktlakamej onikinmachistij akin tejua. Moyaxkauan* katkaj, niman tejua otinechinmakak, niman yokitlakamatkej on tlen otikijtoj.

⁷ Aman kimatstokej ika nochi tlajtlamach* yejuan otinechmakak ualeua motech,

⁸ pampa yonikinmakak motemachtil yejuan otinechmakak, niman yejuamej yokiselijkej. Aman yejuamej kimatij ika melauak motech oniualeu, niman kineltokaj ika tejua otinechajtitlan.

⁹ ’Nejua impampa nitlajtlani motech. Xniktlajtlani impampa on tlaltikpaktlakamej, yej impampa on yejuan otinechinmakak pampa yejuamej moyaxkauan*.

¹⁰ Nochimej yejuan noyaxkauan no moyaxkauan*, niman nochimej yejuan moyaxkauan* no noyaxkauan, niman yejuamej nechueyiliaj.

¹¹ ’Aman nejua niau para mouan nonemis. Xok ninokauas ipan in tlaltikpaktli, pero yejuamej nokauaskej ipan in tlaltikpaktli. NoyekTajtsin, xkinmanaui ikan mopoder yejuan otinechinmakak para san sekan ma nemikan ijkon ken tejua nouan tinemi.

¹² Ijkuak nejua iminuan ninemiya ipan in tlaltikpaktli, on yejuan otinechinmakak onikinmanauij ikan mopoder. Onikinmanauij niman nion se xopoliu, yej san opoliu on yejuan ye ijki onkatka para poliuis para onocumpliroj on tlen kijtoua on Yektlajkuilojli.

¹³ ’Aman ye niau kampa tejua tinemi, pero chika sanken* ninemi ipan in tlaltikpaktli nikijtoua in tlatlamach para yejuamej ma kipiyakan sano yejua on pakilistli yejuan nejua nikpiya.

¹⁴ Nejua yonikinmakak motlajtoltsin, niman on tlaltikpaktlakamej kintlauelitaj, pampa yejuamej xok nouikaj ken on tlaltikpaktlakamej no ijki ken nejua xninouika ken on tlaltikpaktlakamej.

¹⁵ Nejua xnimitstlajtlanilia xkinkixti intsajlan on tlaltikpaktlakamej, yej nimitstlajtlanilia xkinmanaui de on diablo*.

¹⁶ Ijkon ken nejua xninouika ken on tlaltikpaktlakamej, yejuamej no xnouikaj ken on tlaltikpaktlakamej.

¹⁷ Xkinchipauili innemilis itechkopa on tlen melauak. Motlajtoltsin yejua tlen melauak.

¹⁸ Ijkon ken tejua otinechajtitlan kampa nemij in tlaltikpaktlakamej, no ijki nejua nikintitlani kampa nemij on tlaltikpaktlakamej.

¹⁹ Niman impampa yejuamej sano nejua ninotemaka para yejuamej uelis notemakaskej ipampa motlajtoltsin yejuan melauak.

²⁰ ’Pero xnitlajtlani san impampa yejuamej, yej no impampa on yejuan nechneltokaskej itechkopa on temachtijli yejuan kiteijliskej.

²¹ Nimitstlajtlanilia para nochimej yejuamej ma san sekan nemikan. NoTajtsin, yejuamej ma san sekan touan nemikan ijkon ken tejua tinemi nouan niman nejua mouan ninemi. Melauak tej, ma san sekan nemikan touan para on tlaltikpaktlakamej ma kineltokakan ika tejua otinechajtitlan.

²² Yejuamej yonikinmakak sano yejua on ueyilistli yejuan tejua otinechmakak para san sekan ma nemikan, ijkon ken tejua niman nejua tinemij san seknek.

²³ Nejua ninemi iminuan niman tejua tinemi nouan para yejuamej uajnochiuaj melauak san se niman ijki on tlaltikpaktlakamej uelis kimatiskej ika tejua otinechajtitlan, niman ika mokoneuan tikintlajsojtla* ken nejua tinechtlajsojtla.

²⁴ ’NoTajtsin, nikneki para on yejuan otinechinmakak nouan nemiskej kampa ninemis para ma kitakan on ueyilistli yejuan otinechmakak. Nikpiya on ueyilistli pampa otinechtlajsojtlak desde ijkuak in tlaltikpaktli xe onkatka.

²⁵ NoyekTajtsin, on tlaltikpaktlakamej xmitsixmatij, pero nejua nimitsixmati, niman in yejuan achtopa otinechinmakak ye kimatstokej ika tejua otinechajtitlan.

²⁶ Yonikinmachistij akin tejua, niman sanken* moka nitemachistis para on tetlajsojtlalistli* yejuan tinechpiyalia ma kipiyakan, niman para sano nejua intech ma ninemi.