San Juan 16 - El Nuevo Testamento

¹ ’Nemechijlia nochi in tlajtlamach* para maka nenometlamatiskej niman nennechtlalkauiskej.

² Mechajkixtiskej ne ipan on sinagogas*. Niman ajsis on tonajli ijkuak san akinon mechmiktis kinemilis ika kitekipanoua Dios.

³ Yejua in kichiuaskej pampa xkaman okixmatkej noTajtsin nion nejua.

⁴ Pero in nemechijlia para ijkuak ajsis on tonajli ijkuak ijkon mechchiuiliskej, nenkelnamikiskej ika nejua yonemechijlijka. ’Ijkuak onipeu nenmechmachtia, xonenmechijlij in tlajtlamach* pampa nejua nemouan ninemiya.

Jesús okijtoj on tlinon itekiyo yes on Espíritu Santo

⁵ Pero aman ye niau para ninemis iuan on yejuan onechajtitlan, niman nion se nemejuamej nechtlajtoltia, ¿kanon tias?

⁶ Yej sanoyej* yonenmajmankej pampa onemechijlij in tlajtlamach*.

⁷ Pero nemechijlia tlen melauak. Más kuajli para nemejuamej tla nias, pampa tla nejua xnias, xuajlas on Tlapaleuijketl. Pero tla nias, nejua nikuajtitlanis nemotech.

⁸ Ijkuak yejua uajlas, kintitis on tlaltikpaktlakamej akinomej nemij ipan tlajtlakojli, niman akinomej uelis kipiyaskej yolchipaualistli, niman akinomej Dios kinyolkuitis niman kintlajtlakolmakas.

⁹ Yejua kintitis ika tlajtlakolejkej pampa xnechneltokaj.

¹⁰ Yejua kintitis ika uelis kipiyaskej yolchipaualistli, pampa nejua niau kampa nemi noTajtsin, niman nemejuamej xok más nennechitaskej.

¹¹ Niman yejua kintitis ika kinyolkuitis niman kintlajtlakolmakas, pampa on diablo*, yejuan tlamandaroua ipan in tlaltikpaktli, ye kuajli yokitlajtlakolmakakej.

¹² ’Nikpiya miyek tlinon más nemechijlis, pero nemejuamej xuelis nenkajsikamatiskej aman.

¹³ Pero ijkuak uajlas on Espíritu Santo, yejuan tekajsikamachiltis on tlen melauak, yejua mechmachtis nochi tlen melauak pampa xmechijlis sano yejua itlamachilis, yej kijtos nochi tlen kaki itech noTajtsin. Niman no mechititis on tlajtlamach* yejuan más sakin* nochiuas.

¹⁴ Yejua nechmakas ueyilistli pampa kiselis on tlen melauak noka nejua niman mechmachistis.

¹⁵ Nochi tlen iyaxka* noTajtsin, no noyaxka. Yejua ika, onikijtoj ika on Espíritu Santo kiselis tlen melauak noka nejua niman mechmachistis.

On ajmantli nokuepas pakilistli

¹⁶ ’San xuejkajtika xok nennechitaskej, niman kemaj sakin san xuejkajtika oksejpa nennechitaskej pampa nejua niau kampa nemi noTajtsin.

¹⁷ Kemaj sekimej nomachtijkej* kinotlajtoltiayaj: —¿Tlinon kijtosneki ijkuak okijtoj: “San xuejkajtika xok nennechitaskej, niman kemaj sakin san xuejkajtika oksejpa nennechitaskej”, niman ika no okijtoj: “Pampa nejua niau kampa nemi noTajtsin”?

¹⁸ ¿Tlinon tej, kijtosneki on ika kijtoua, “xuejkajtika yes”? Xtikajsikamatij tlinon ika technojnotsa.

¹⁹ Jesús okimat ika yejuamej kinekiyaj kitlajtoltiskej, niman okinmijlij: —Nejua onemechijlij ika xuejkajtika yes xok nennechitaskej niman kemaj san xuejkajtika más sakin oksejpa nennechitaskej. ¿In yejua nenkimotlajtoltijtokej?

²⁰ Ika tlen melauak nemechijlia, nemejuamej nenchokaskej niman nenmajmanaskej, niman on tlaltikpaktlakamej pakiskej. Pero maski nenmajmanaskej, nemoajmanalis nokuepas pakilistli.

²¹ Ijkuak sen siuatl ye kitlakatilis sen konetsintli, najmana pampa yoyejkok on hora para nokokos. Pero ijkuak yotlakat on konetsintli, xok kelnamiki on tla onokokoj, pampa sanoyej paki ika otlakat sen konetsintli ipan in tlaltikpaktli.

²² No ijki nochiuas nemouan. Aman nenmajmanaj, pero nejua niuajlas nemechalitas, niman ijkuakon nemoyojlo sanoyej pakis. Niman yejua on pakilistli xakaj uelis mechkuilis.

²³ ’Ipan on tonajli xokuitlaj nennechtlajtoltiskej. Ika tlen melauak tej, nemechijlia ika noTajtsin mechmakas nochi tlen nenkitlajtlaniliskej ikan notokatsin.

²⁴ Hasta aman nemejuamej xe itlaj nenkitlajtlanij ikan notokatsin. Xtlajtlanikan tlen nenkinekiskej niman nenkiseliskej para ajsitias nemopakilis.

Jesús yokitlan ipoder in tlaltikpaktli

²⁵ ’In tlajtlamach* yonemechijlij ikan ejemplos. Pero yejkos on tonajli ijkuak xok nemechnojnotsas ikan ejemplos, yej kuajli nemechmejlakanojnotsas itechkopa noTajtsin.

²⁶ Ipan on tonajli nemejuamej nenkitlajtlaniliskej noTajtsin tlajtlamach* ikan notokatsin. Niman xnikijtoua tla nejua niktlajtlanilis itlaj nemopampa,

²⁷ pampa sano yejua toTajtsin mechtlajsojtla*. Mechtlajsojtla pampa nemejuamej nennechtlajsojtlaj niman nenkineltokaj ika nejua itech oniualeu.

²⁸ Melauak nejua onikis itech noTajtsin niman oniuajlaj ipan in tlaltikpaktli. Niman aman nikajteuas in tlaltikpaktli niman oksejpa nias itech noTajtsin.

²⁹ Kemaj on inomachtijkauan* okijlijkej: —Aman kemaj kuajli titechnojnotsa xok ikan ejemplos.

³⁰ Aman tikmatij ika tejua tikmati nochi tlajtlamach*. Niman xpoliui yakaj itlaj mitstlajtoltis, pampa tikmati tlinon sen mitstlajtoltisneki ijkuak xe mitsnotsa. Yejua ika tikneltokaj ika otiualeu itech Dios.

³¹ Jesús okinmijlij: —¿Tla ijkon, aman nentlaneltokaj?

³² Tej, ye uajlau on tonajli niman sano amantsin ijkuak nemejuamej nemoxexeloskej. Cada se yas sa kanika niman noselti nennechkauaskej. Pero xnoselti ninemis pampa noTajtsin nouan nemis.

³³ Nochi in nemechijlia para nenkipiyaskej yolseuilistli, pampa san sekan nennemij nouan. Ipan in tlaltikpaktli nentlajyouiskej, pero xpiyakan yolchikaualistli pampa nejua yoniktlan ipoder in tlaltikpaktli.