San Juan 15 - El Nuevo Testamento

Jesús ken yejua itemekayo on uvas

¹ ’Nejua niken melauak itemekayo* on uvas, niman noTajtsin ken on yejuan cuidaroua on uvas.

² Yejua kiteki nochi nomatsitsiuan yejuan xtlakij, pero kitlakuijkuilia niman kichipaua on nomatsitsiuan yejuan tlakij para más ma tlakikan.

³ Nemejuamej yonenchipajkej itechkopa on temachtijli yejuan yonemechijlij.

⁴ Nochipa xnemikan nouan, niman nejua nochipa ninemis nemouan. Tla xnennemiskej nouan, xuelis nentlakiskej sano ijki ken imatsitsiuan on uvas xueliskej tlakiskej tla xonkaj ipan itemekayo.

⁵ Nejua ken sen itemekayo on uvas niman nemejuamej ken nennomatsitsiuan. Xitlaj uelis nenkichiuaskej tla xnennemiskej nouan. On yejuan nochipa nemis nouan niman nochipa ninemis iuan kipiyas miyek itlakijlo.

⁶ On yejuan xnochipa nemis nouan, kitekecheuaskej notech niman uakis ken sen kuamatli. Tla ijkon nochiuas on kuamatli yej kisentlaliaskej para kitlatiskej.

⁷ ’Tla nemejuamej nennemiskej nouan niman nenkejeuaskej notlajtol ipan nemoyojlo, nenueliskej nentlajtlaniskej san tlen nenkinekiskej, niman noTajtsin mechmakas.

⁸ Ijkuak nemejuamej nenkipiyaj miyek tlakyotl, noTajtsin kiselia ueyilistli, niman ijki nenkiteititiaj ika nemejuamej melauak nennotemachtijkauan.

⁹ Nejua nemechtlajsojtla* ijkon ken noTajtsin nechtlajsojtla*. Tla ijkon tej, nochipa xmokauakan ipan notetlajsojtlalis.

¹⁰ Tla nenkitlakamatiskej notlanauatiluan, nemokauaskej ipan notetlajsojtlalis ijkon ken nejua niktlakamati itlanauatiluan noTajtsin niman ninokaua ipan itetlajsojtlalis*.

¹¹ ’Nejua ijkon nemechnojnotsa para nikpiyas paktli nemouan niman nemejuamej nemopakilis ajsitias.

¹² In yejua notlanauatil: Xmotlajsojtlakan iuan oksekimej ijkon ken nejua nemechtlajsojtla*.

¹³ On más ueyi tetlajsojtlalistli* yejuan se uelis kipiyas para itlajsojkaikniuan*, tla san impampa mikis.

¹⁴ Niman nemejuamej nennotetlajsojkaikniuan, tla nenkichiuaj tlen nejua nemechnauatia.

¹⁵ Xok nemechtokayotis tekichijkej pampa sen tekichijketl xkimati tlinon kichiua iteko. Pero nemechtokayotia nennotlajsojkaikniuan pampa yonemechijlij nochi tlen noTajtsin onechijlij.

¹⁶ Nemejuamej xonennechtlapejpenijkej, yej nejua onemechtlapejpenij niman onemechtlalij ipan notekiu para xuiyan niman xpiyakan miyek tlakyotl yejuan nokauas para nochipa. Kemaj noTajtsin mechmakas nochi tlen nenkitlajtlaniliskej ikan notokatsin.

¹⁷ Yejua in tej, nemechnauatia: Xmotlajsojtlakan nemejuamej iuan oksekimej.

On tlaltikpaktlakamej kitlauelitaj Jesús iuan inomachtijkauan*

¹⁸ ’Tla on tlaltikpaktlakamej mechtlauelitaj, xmatikan ika achtopa onechtlauelitakej nejua.

¹⁹ Tla nemejuamej nemouikaskiaj ken on tlaltikpaktlakamej yejuan xnechneltokaj, yejuamej mechtlajsojtlaskiaj* ken yejuamej notlajsojtlaj. Pero nejua onemechtlapejpenij intsajlan on tlaltikpaktlakamej. Yejua ika, on tlaltikpaktlakamej mechtlauelitaj pampa xok nemouikaj ken yejuamej.

²⁰ Xkelnamikikan on tlen onemechijlij: “Xakaj tlakeuajli más ueyixtikaj xken on iteko.” Tla nejua nechtlajyouiltiaj, nemejuamej no mechtlajyouiltiskej. Niman tla okitlakamatkej notemachtil, no kitlakamatiskej on yejuan nemejuamej nemotemachtil.

²¹ Nochi in mechchiuiliskej san nopampa, pampa xkixmatij on yejuan onechajtitlan.

²² ’Tla nejua xnikinuajnojnotsaskia, yejuamej xkipiyaskiaj tlajtlakojli. Pero aman xakaj uelis kijtos: “Ijkuak onitlajtlakoj, xnikmatiya ika on tlen onikchiu tlajtlakojli.”

²³ Tej, on yejuan nechtlauelitaj, no kitlauelitaj noTajtsin.

²⁴ Xkipiyaskiaj tlajtlakojli, tla xnikchiuaskia intsajlan on tlen xkaman yakaj okichiu. Pero miyek tlajtlamach* yokitakej onikchiu, niman yej nechtlauelitaj niman no kitlauelitaj noTajtsin.

²⁵ Pero ijkin nochiua para nocumpliroua on tlajtojli yejuan tlajkuilolnestikaj ipan intlanauatil yejuan ijkin kijtoua: “Onechtlauelitakej, maski xonikpix tlajtlakojli.”

²⁶ ’Pero nikuajtitlanis on Tlapaleuijketl yejuan kisas itech noTajtsin. Yejua on Espíritu Santo yejuan tekajsikamachiltis on tlen melauak. Ijkuak yejua uajlas noka tenojnotsas.

²⁷ Niman nemejuamej no nentenojnotsaskej noka nejua, pampa desde onipeu nitemachtia, nouan nennemij.