San Juan 14 - El Nuevo Testamento

Jesús yejua ojtli yejuan teuika itech toTajtsin

¹ ’Nemejuamej maka xmoyolajmanakan. Xneltokakan Dios niman nejua no xnechneltokakan.

² Ne ichan noTajtsin onkaj miyek chanyotl* kampa uelis chantiuas. Tla xonyaskia miyek chanyotl*, xnemechijliskia. Aman tej, niau para nikonyektlalis kampa nenchantiskej.

³ Niman ijkuak yonitlayektlalito, oksejpa niuajlas niman nemechuikas para nemejuamej no nennemiskej kampa nejua ninemis.

⁴ Niman nemejuamej ye nenkimatstokej kanon niau, niman ye nenkixmatstokej on ojtli.

⁵ Kemaj Tomás okijlij: —NoTEKO, tejuamej xtikmatij kanon tiau. ¿Kenijki tikixmatiskej on ojtli?

⁶ Jesús okinankilij: —Nejua niojtli, nitlin melauak, niman ninemilistli. Tej, san nejua notechkopa uelis ajsiskej itech noTajtsin.

⁷ Tla nemejuamej nennechixmatiskiaj, no nenkixmatiskiaj noTajtsin. Niman desde aman nenkixmatij niman ye nenkitstokej.

⁸ Kemaj Felipe okijlij: —NoTEKO, xtechkauili ma tikitakan toTajtsin, niman ijkon tiyolpachiuiskej.

⁹ Jesús okijlij: —Felipe, maski yoniuejkau nemouan ninemi, ¿sanken* xtinechixmati? On yejuan nechita, no kita on noTajtsin. Yejua ika, ¿tline* tinechtlajtlanilia ma nemechititi on noTajtli?

¹⁰ ¿Xtikneltoka ika nejua ninemi iuan noTajtsin niman noTajtsin nouan nemi? On tlajtlamach* tlen nemechijlia, xnejua notlajtol. On tekitl yejuan nikchiua, noTajtsin yejua kichiua notechkopa.

¹¹ Kemaj Jesús okinmijlij inomachtijkauan*: —Xneltokakan ika nejua ninemi iuan noTajtsin, niman noTajtsin nouan nemi. Pero tla xnenuelij nenkineltokaj on tlen nemechijlia, xneltokakan itechkopa on tekitl yejuan nikchiua.

¹² Ika tlen melauak nemechijlia, ika yejuan nechneltokas kichiuas on tekitl tlen nikchiua. Niman yejua kichiuas on tekitl yejuan más uejueyi, pampa nejua niau itech noTajtsin.

¹³ Niman nochi tlen nemejuamej nentlajtlaniskej ikan notoka, nejua nikchiuas para noTajtsin kiselis ueyilistli notechkopa yejuan niiKoneu.

¹⁴ San tlinon yejuan nemejuamej nentlajtlaniskej ikan notoka, nikchiuas.

Jesús okitoj ika kuajtitlanis on Espíritu Santo

¹⁵ ’Tla nemejuamej nennechtlajsojtlaj, xtlakamatikan notlanauatiluan.

¹⁶ Niman nejua niktlajtlanilis noTajtsin ma mechajtitlanili okse yejuan mechyolchikauas, mechpaleuis niman nemouan nemis para nochipa.

¹⁷ Yejua tej, on Espíritu Santo yejuan mechtlamachilistis ika on tlen melauak. On tlaltikpaktlakamej xuelij kiseliaj, pampa xkitaj niman xkixmatij. Pero nemejuamej nenkixmatij, pampa yejua nemouan nemi niman nemouan nokauas.

¹⁸ Nejua xnemechkauas ken iknomej, yej ninokuepas para nemouan nichantis.

¹⁹ Sa keski tonaltin niman on tlaltikpaktlakamej xok nechitaskej, pero nemejuamej nennechitaskej. Niman nemejuamej nennemiskej pampa nejua ninemi.

²⁰ Ipan on tonajli nemejuamej nenkimatiskej ika ninemi iuan noTajtsin, niman nemejuamej nouan nennemij, niman nejua ninemi nemouan.

²¹ Yejuan kimati niman kitlakamati notlanauatiluan, melauak nechtlajsojtla*. Niman on yejuan nechtlajsojtla* noTajtsin no kitlajsojtlas. Niman nejua no niktlajsojtlas niman ninoteititis itech.

²² Judas, on yejuan xejua Iscariote, okijlij: —NoTEKO, ¿tline timoteititis san totech tejuamej, niman xintech on tlaltikpaktlakamej?

²³ Jesús okijlij: —Yejuan nechtlajsojtla* kejeuas on tlen nikijtoua. Niman noTajtsin kitlajsojtlas, niman noTajtsin niman nejua tiuajlaskej para iuan tichantiskej.

²⁴ Yejuan xnechtlajsojtla xkejeua on tlen nikijtoua. In kuajli tlajtojli yejuan yonemechijlij xkisa notech, yej kisa itech noTajtsin yejuan onechajtitlan.

²⁵ ’Nochi in nemechijlijtikaj chika ninemi nemouan.

²⁶ Pero ijkuak noTajtsin kuajtitlanis on Espíritu Santo ikan notokatsin para mechyolchikauas niman mechpaleuis, yejua nochi mechmachtis niman mechelnamiktis nochi tlen yonemechijlij.

²⁷ ’Nejua nemechmaka yolseuilistli yejuan nejua noyoseuilis. Niman xnemechmaka ken on yejuan kitemakaj on tlaltikpaktlakamej. Yejua ika tej, maka xmotenmatikan, nion maka xmomojtikan.

²⁸ Aman yonenkakej ken nikijtoua ika ye niau, niman ika ninokuepas para oksejpa nemouan ninemis. Tla melauak nennechtlajsojtlaskiaj*, nempakiskiaj ika niau itech noTajtsin, pampa yejua más ueyixtikaj xken nejua.

²⁹ In aman nemechijlia chika xe nochiua, para ijkuak nochiuas, nemejuamej nentlaneltokaskej.

³⁰ ’Nemouan nitlajtlajtos sa achijtsin más, pampa ye uajlau on diablo* yejuan tlamandaroua ipan in tlaltikpaktli. Maski yejua xkipiya poder para nechtlanis,

³¹ nikchiuas on tlen noTajtsin onechnauatij para in tlaltikpaktlakamej kimatiskej ika nejua niktlajsojtla* noTajtsin. Xmotelketsakan, ma titejkuanikan de nikan.