San Juan 13 - El Nuevo Testamento

Jesús okinmikxipajpak inomachtijkauan*

¹ Sa se tonajli poliuiya ijkuak on hebreos* kichiuaj on iluitl itoka Pascua*. Jesús kimatstikatka ika yoyejkok on tiempo para yejua kajteuas in tlaltikpaktli niman yas itech iTajtsin. Yejua nochipa okintlajsojtlak* on iyaxkauan* yejuan nemij ipan in tlaltikpaktli, niman aman kintitia kech ika sanoyej* kintlajsojtla.

^2-4 On diablo* yokitlalijka ipan iyojlo Judas Iscariote, itelpoch Simón, on tlamachilistli para kitemakas Jesús intech on tlayekankej hebreos*. Jesús kimatstikatka ika yejua oualeu itech Dios, niman ika oksejpa yas itech. No ijki kimatstikatka ika toTajtsin yokimakak nochi tlanauatijli. Yejua ika, ijkuak tlakuajtikatkaj, ouajnotelkets ne itech on mesa, okuajkixtij itlaken pani niman onoxijlansaloj ikan sen tela yejuan ika nouajuatsaj.

⁵ Niman kemaj okitekak atl ipan sen ueyi teposuajkajli niman opeu kimikxipajpaka inomachtijkauan* niman kimikxiuajuatsaya ikan on tela yejuan kipiyaya ixijlan.

⁶ Ijkuak ye kimpajpakaskia ikxiuan Simón Pedro, Simón Pedro okijlij: —NoTEKO, ¿tejua tinechimpajpakilis nokxiuan?

⁷ Jesús okinankilij: —Aman xtikajsikamati tlinon nikchiua, pero más sakin* tikajsikamatis.

⁸ Pero Pedro okijlij: —Nejua xkaman tinechimpajpakilis nokxiuan. Jesús okijlij: —Tla xnimitsimpajpakilis, xok nouan timopouas.

⁹ Simón Pedro okijlij: —Tla ijkon, noTEKO, maka san xnechimpajpakili nokxiuan, yej no xnechimpajpakili nomauan niman notsontekon.

¹⁰ Pero Jesús okijlij: —On yejuan kemach otlan naltia xok noneki nochi nopajpakas, yej san ikxiuan, pampa nochiuiyan chipajtikaj. Nemejuamej nenchipajtokej, maski impan nemoyojlo xnochimej nenchipajtokej.

¹¹ Yejua okijtoj: “Xnochimej chipajtokej”, pampa kimatstikatka akinon kitemakas.

¹² Más sakin* ijkuak yokimikxipajpak, Jesús oksejpa okinakij on itlaken pani, ouajnotlalij itech on mesa, niman okinmijlij: —¿Nenkajsikamatij on tlen onemechchiuilij?

¹³ Nemejuamej nennechtokayotiaj Temachtijketl niman nemoTEKO, niman kuajli ken nenkijtouaj, pampa melauak nejua.

¹⁴ Aman tej, tla nejua yejuan melauak nemoTemachtijkau niman nemoTEKO yonemechikxipajpak, tla ijkon, no ijki noneki nenkimochiuiliskej.

¹⁵ Nejua nemechchiuilia in para nemejuamej no xchiuakan ken nejua yonikchiu.

¹⁶ Ika tlen melauak nemechijlia ika sen tetekichiuilijketl xejua más ueyixtikaj ken on iteko, niman nion on yejuan kanaj kititlanij xejua más ueyixtikaj ken on yejuan tetitlani.

¹⁷ Tla nenkajsikamatij in tlajtlamach* niman peua ijki nenkichiuaj, nenkipiyaskej pakilistli.

¹⁸ ’In tlen nikijtoua xpara nochimej nemejuamej. Nejua nikixmatstikaj inyojlo nochimej on yejuan yonikintlapejpenij. Pero ika onkaj nochiuas on tlen kijtoua on Yektlajkuilojli: “On yejuan nouan tlakua, yonokuep notlauelikniu.”

¹⁹ In nemechijlia aman ijkuak xe nochiua, para ijkuak nochiuas, nemejuamej nenkineltokaskej niakin nejua.

²⁰ Ika tlen melauak nemechijlia ika yejuan kiselia on yejuan niktitlani, no nechselia nejua. Niman on yejuan nejua nechselia, no kiselia on yejuan onechajtitlan.

Jesús okijtoj akinon kitemaktilis

²¹ Ijkuak ijkon yokijtoj, Jesús sanoyej onoyolajman, niman imixpan okijtoj: —Ika tlen melauak nemechijlia, semej nemejuamej nechtemakas.

²² Kemaj on nomachtijkej* opeu nootaj. Yejuamej xkimatiyaj akinon kiteneuaya Jesús.

²³ Niman semej inomachtijkauan*, yejuan Jesús sanoyej kitlajsojtlaya*, nemiya inakastlan kampa tlakuajtikatkaj.

²⁴ Niman Simón Pedro okixnots para ma kitlajtolti akinon on yejuan kiteneuaya kitemakas.

²⁵ Yejua ika, on nomachtijketl más okinisiuij niman onotekak iyelpan Jesús, niman okitlajtoltij: —NoTEKO, ¿akinon on yejuan mitstemakas?

²⁶ Jesús okinankilij: —Nikpatsos se tlajkotipantsin pan, niman on akin nikmakas, on yejua. Ijkon tej, okipatsoj se tlajkotipantsin pan niman okimakak Judas Iscariote, ikoneu Simón.

²⁷ Niman ijkuak Judas yokikuaj on pan, Satanás nimantsin okalak ipan iyojlo. Kemaj Jesús okijlij: —On tlen tikchiuas, nimantsin xchiua.

²⁸ Pero nion semej on yejuan tlakuajtikatkaj ne ipan on mesa xokajsikamat tline* ijkon okijlij.

²⁹ Judas kipiyaya on bolsa kampa kejeuaj tomin. Yejua ika, sekimej okinemilijkej ika Jesús kijliaya itlaj ma kouati yejuan kitekitiltiskej ipan on iluitl, noso itlaj ma kinmaka on mayankej.

³⁰ Ijkuak Judas yokikuaj on pan, nimantsin okis. Ijkuakon, ye tlayoua katka.

Jesús okitemakak sen yenkuik tlanauatijli

³¹ Más sakin* ijkuak Judas yokis, Jesús okijtoj: —Aman noteititia noueyilis, nejua yejuan oninochiu Tlakatl. Niman iueyilis Dios no noteititia notechkopa.

³² Niman tla nejua nikteititia iueyilis Dios, tla ijkon, Dios no kiteititis noueyilis, niman saniman ijki kichiuas.

³³ Notlajsojkakoneuan, xok ninemis miyek tonaltin nemouan. Nemejuamej nennechtejtemoskej, pero sano ijki ken onikimijlij on hebreos* no ijki nemechijlia aman: Xuelis nenyaskej kampa nejua niau.

³⁴ Nemechmaka in yenkuik tlanauatijli: xmotlajsojtlakan* inuan oksekimej. Ijkon ken nejua nemechtlajsojtla*, nemejuamej no ijki xmotlajsojtlakan* inuan oksekimej.

³⁵ Tla nemotlajsojtlaj inuan oksekimej, nochi tlakatl kitas ika nennotemachtijkauan.

Jesús okijtoj ika Pedro kinenekis

³⁶ Simón Pedro okitlajtoltij Jesús: —NoTEKO, ¿kanon tiau? Niman Jesús okijlij: —Kampa nejua niau, xuelis tias aman, pero más sakin* kemaj tias.

³⁷ Kemaj Pedro okijlij: —NoTEKO, ¿tline* xuelis nias aman? Nikpiya noyojlo para nimikis san mopampa tla noneki.

³⁸ Jesús okijlij: —¿Melauak tikpiya moyojlo para timikis san nopampa? Ika tlen melauak nimitsijlia ika antes tsajtsis on kaxtil*, tejua yexpa tinechnenekis.