San Juan 11 - El Nuevo Testamento

On tlakatl itoka Lázaro omik

¹ Nemiya sen tlakatl itoka katka Lázaro yejuan kualouaya. Yejua chanej* katka ipan on kalpan itoka Betania yejuan no ikalpan María niman Marta, on ikniuan.

² (In María yejua okitekilijka toTEKO on ajuiyalistli itoka nardo ipan ikxiuan niman okinuajuats ikan itson. Yejua ikniu katka Lázaro yejuan kualouaya.)

³ On omemej siuamej iknijtin otlatitlankej ijkin ma kijlitij Jesús: —ToTEKO, motejtlajsokaikniu* kualo.

⁴ Ijkuak Jesús ijkon okak, okijtoj: —On kualolistli xkimiktis, yej san para noteititis iueyilis Dios niman no itechkopa kiteititis noueyilis nejua yejuan niiKoneu Dios.

⁵ Jesús kintlajsojtlaya* Marta inuan ikniuan María niman Lázaro.

⁶ Pero maski okijlijkej ika Lázaro kualouaya, ome tonajli más onokau ne kampa nemiya.

⁷ Kemaj okinmijlij on inomachtijkauan*: —Ma tiuiyan ne Judea oksejpa.

⁸ Kemaj on nomachtijkej* okijlijkej: —Temachtijketl, san kemach katka on hebreos* yejuan ompa chanejkej kinekiyaj mitsmiktiskej ikan temej, ¿niman oksejpa tikneki tias ompa?

⁹ Jesús okinmijlij: —¿Tline* xmelauak kipiya majtlaktli uan ome horas on tonajli? Tej, tla se kistinemi ikan tonajli, xnajantikisa pampa nochi nesi ikan on tlauijli yejuan onkaj ipan in tlaltikpaktli.

¹⁰ Pero tla se kistinemi ipan yeuajli, najantikisa pampa xkipiya tlauijli.

¹¹ Kemaj okinmijlij Jesús: —Totetlajsojkaikniu Lázaro kochi, pero nikontlachaltis.

¹² Kemaj on nomachtijkej* okijlijkej: —ToTEKO, tla yokoch, kijtosneki uelis pajtis.

¹³ Pero Jesús kijtosnekiya ika Lázaro yomik, niman on nomachtijkej* kinemiliayaj ika Lázaro san kochiya.

¹⁴ Yejua ika Jesús más kuajli okinmijlij: —Lázaro yomik.

¹⁵ Más kuajli para nemejuamej ika xompa ninemiya ijkuak Lázaro kualouaya, pampa aman uelis nikchiuas itlaj yejuan mechpaleuis nentlaneltokaskej. Yejua ika nipaki. Pero ma tiauiyan tikontaj.

¹⁶ Kemaj Tomás, yejuan no kijliayaj kouatsin*, okinmijlij on oksekimej nomachtijkej*: —No ma tiuiyan para san sekan timikiskej iuan Jesús.

Jesús okitemakak nemilistli niman oteyolitij

¹⁷ Ijkuak Jesús oajsik okimachistijkej ika Lázaro ye kipiya naui tonajli ika okitôkakej.

¹⁸ Betania nisiu katka Jerusalén. San kipiyaya kanaj ome kilómetro uan tlajko,

¹⁹ niman miyekej hebreos* oyajkej okinnotsatoj Marta niman María para kinyoltlaliskej pampa omik inmikniu.

²⁰ Ijkuak Marta okimat ika Jesús ompa ye ajsitiaya, okis okinamikito, pero María onokau inchan.

²¹ Niman Marta okijlij Jesús: —NoTEKO, tla nikan tinemiskia, nokniu xmikiskia.

²² Pero nejua nikmatstikaj ika Dios mitsmakas nochi tlen tiktlajtlanilis.

²³ Jesús okijlij: —Mokniu oksejpa yoliuis*.

²⁴ Marta okijlij: —Kemaj, nejua nikmatstikaj ika oksejpa yoliuis* ijkuak yoliuiskej* niman nokuiteuaskej on mikatsitsimej ipan on sa ika nochi tonajli.

²⁵ Kemaj Jesús okijlij: —Nejua nikinyoliuitia on yejuan yomikkej niman nikinmaka nemilistli oksejpa. Yejuan nechneltokas, maski mikis, nemis oksejpa.

²⁶ Niman nochi yejuan sanken* nemi niman nechneltoka, nemis para nochipa. ¿Tikneltoka in?

²⁷ Yejua okijlij: —Kemaj noTEKO. Nejua nikneltoka ika tejua tiCristo yejuan Dios okuajtitlan para tlamandaros. Niman nikneltoka ika tejua tiiKoneu Dios yejuan ye ijki onkatka para uajlas ipan in tlaltikpaktli.

Jesús ochokak

²⁸ Ijkuak ijkon yokijtoj, Marta oyaj okinotsato María on ikniu, niman ijkin san okichtakaijlij: —On Temachtijketl nikan nemi niman mitsnotsa.

²⁹ Ijkuak María ijkon okak, nimantsin onotelkets niman oyaj okitato Jesús.

³⁰ Jesús sanken* xe kalakiya ne kalpan, yej nemiya kampa Marta okinamikito.

³¹ Niman ijkuak on hebreos* yejuan kiyoltlaliayaj María ichan okitakej ika María nimantsin okis, okikuitlapanuijkej. Yejuamej kinemiliayaj ika María yau itech on tlalkontli para ompa onchokas.

³² Kemaj, ijkuak oajsik kampa nemiya Jesús, María onotlakuantelkets ikxitlan, niman okijlij: —NoTEKO, tla nikan tinemiskia, nokniu xmikiskia.

³³ Ijkuak Jesús okitak ika María niman on hebreos* yejuan ompa iuan oyejkokej sanoyej* chokaj, yejua no sanoyej onajman niman iminuan oyolkexan,

³⁴ niman okintlajtoltij: —¿Kanon onenkitôkakej? Niman okijlijkej: —ToTEKO, xuajla xkitaki.

³⁵ Kemaj Jesús ochokak.

³⁶ Niman on hebreos* okijtojkej: —Xkitakan ken sanoyej kitlajsojtlaya*.

³⁷ Pero semej yejuamej okijtojkej: —In yejuan okimpajtij ixtololojuan on ciego, ¿xueliskia itlaj kichiuaskia para Lázaro maka mikiskia?

Lázaro oyoliu niman onoketsteu ipan itlalkon

³⁸ Jesús ikan miyek iyolkexanalis okinisiuij on tlalkontli. On tlalkontli sen teostotl katka niman kipiyaya sen tetl yejuan ika tentsakutikatka.

³⁹ Jesús okijtoj: —Xkejkuanikan on tetl. Pero Marta yejuan ikniu on mikatsintli, okijlij: —NoTEKO, amantsin sanoyej yomoloniak pampa ye kipiya naui tonajli ika omik.

⁴⁰ Pero Jesús okijlij: —¿Tlen xonimitsijlij tla titlaneltoka tikitas iueyilis Dios?

⁴¹ Kemaj okejkuanijkej on tetl. Niman Jesús oajkotlachix ne iluikak, niman okijtoj: —NoTajtsin, nimitsmaka tlaxtlauijli pampa tinechkaki.

⁴² Nejua nikmatstikaj ika nochipa tinechkaki, pero aman ijkin nikijtoua impampa in tlakamej yejuan nikan nemij, para ma kineltokakan ika tejua otinechajtitlan.

⁴³ Ijkuak ijkon okijtoj, kemaj ikan chikauak tlajtojli okinots Lázaro: —¡Lázaro, xuajkisa!

⁴⁴ Niman on mikatsintli ouajkis uajtejkuixtiaya ipan imauan niman ikxiuan ikan ilpikatl niman ixayak tejkuixtikatka ikan tela. On hebreos* ijkon kitekitiltiayaj ijkuak kintejkuiyaj on yejuan yomikkej. Jesús okinmijlij: —Xtojtomakan niman xkauilikan ma uiya.

On fariseos* okitlajtouilijkej kenijki kimiktiskej Jesús

⁴⁵ Miyekej hebreos* yejuan oualajkej iuan María okineltokakej Jesús ijkuak okitakej on tlen okichiu.

⁴⁶ Pero sekimej oyajkej okintatoj on fariseos* niman okintlajtlajtouilijkej on tlen Jesús okichiu.

⁴⁷ Yejua ika, on fariseos* niman intlayekankauan on tiopixkej onosentlalijkej inuan on más uejueyi tekiuajkej ipan on sanedrín* niman okijtojkej: —¿Tlinon tikchiuaskej? In tlakatl kichiua miyek milagros.

⁴⁸ Tla ijki tikauiliskej ma kichiua, nochi tlakatl kineltokas niman on romanos kixoxotoniskej toueyitiopan niman in topaís.

⁴⁹ Pero se de yejuamej, itoka Caifás, yejuan ipan on xipan más ueyi intlayekankau katka on tiopixkej, okinmijlij: —Nemejuamej xitlaj* nenkimatij.

⁵⁰ Nemejuamej xnenkimatij ika para tejuamej más kuajli yes tla sen tlakatl mikis para maka kixoxotoniskej nochi in país.

⁵¹ Pero Caifás ijkon okijtoj xpampa melauak ijki okis ipan iyojlo. Yejua okijtoj pampa yejua más ueyi intlayekankau katka on tiopixkej ipan on xipan, niman Dios okitlamachilistij para ma kijto ika Jesús mikis ipampa on país kampa chantij on hebreos*.

⁵² Niman ijkon okijtoj xsan ipampa on país, yej no para kinsentlalis nochimej on ikoneuan Dios yejuan nochajchayajtinemij*.

⁵³ Yejua ika desde ipan on tonajli on tekiuajkej hebreos* okisetlalilijkej para kimiktiskej Jesús.

⁵⁴ Yejua ika tej, Jesús xok kistinemiya intsajlan on hebreos*, yej okis de ne Judea niman oyaj ne ipan sen kalpan itoka Efraín yejuan nisiu on xalpatlajkan. Ompa onokau inuan inomachtijkauan*.

⁵⁵ Ye nisiu katka para on hebreos* kichiuaskej on iluitl Pascua*, niman miyek tlakatl yejuan ualeuayaj nochiuiyan ipan on país oyaj ne Jerusalén para nochipauaskej ken intlanauatil on hebreos* tlanauatia.

⁵⁶ Jesús kitejtemojtinemiyaj. Niman ijkuak ye nemiyaj ne ipan on ueyitiopan, ijkin kinotlajtoltiayaj: —¿Tlinon nenkinemiliaj? ¿Nenkinemiliaj ika uajlas ipan in iluitl, noso ka?

⁵⁷ On fariseos* niman intlayekankauan on tiopixkej yotlanauatijkaj ika tla yakaj kimati kanon nemi Jesús, ma kitemachistikan para uelis kajsiskej.