San Juan 1 - El Nuevo Testamento

Itlajtol Dios onokuep Tlakatl

¹ Ijkuak nion tlen xitlaj* onkatka, iTlajtoltsin Dios ye onkatka. Niman iTlajtoltsin, yejuan sano yejua Cristo, nemiya iuan Dios niman sano yejua Dios.

² Ijkon tej, ye nemiya iuan Dios ijkuak nochi on tlajtlamach* xe onkatka.

³ Dios okichijchiu nochi on tlajtlamach* tlen onkaj niman tlen yoltikaj itechkopa yejua on yejuan Tlajtojli. Xitlaj tlen onkaj nion on tlen yoltikaj onochijchiu tla xyejua.

⁴ ITlajtoltsin Dios kitemaka on nemilistli yejuan para nochipa. Niman on nemilistli kitemaka tlauijli yejuan nochi tlakatl kimaka kajsikamatilistli.

⁵ In tlauijli onkatkaj intsajlan on xkuajkualtin tlakamej niman xkuajkualtin espíritus, niman yejuamej xuelij kiseuiya on tlauijli.

⁶ Dios okuajtitlan sen tlakatl itoka Juan.

⁷ Yejua ouajlaj ken sen testigo niman okitemachistiko de on tlauijli para ijkon nochimej ueliskej tlaneltokaskej.

⁸ Juan xejua on tlauijli, yejua yej san temachistia itechkopa on tlauijli.

⁹ In tlauijli yejua melauak, niman ouajlaj ipan in tlaltikpaktli para nochi tlakatl kajsikamatis on tlajtlamach* yejuan melauak.

¹⁰ On yejuan Tlajtojli nemiya ipan in tlaltikpaktli. Maski Dios okichijchiu in tlaltikpaktli itechkopa yejua, on tlaltikpaktlakamej xokixmatkej.

¹¹ Ouajlaj intech on hebreos* niman on hebreos* xokiselijkej.

¹² Pero nochimej on yejuan okiselijkej niman itech otlaneltokakej, okinkauilij para onochijkej ikoneuan Dios.

¹³ Yejuamej onochijkej ikoneuan Dios xpampa ijki okinekkej imintataj noso iminnanaj, yej otlakatikoj ken Dios okinek para otlakatkej itech.

¹⁴ Niman on yejuan Tlajtojli onochiu tlakatl niman totsajlan onen. Yejua sanoyej* otetlajsojtlak* niman otemachtij tlen melauak. Niman otikitakej iueyilis. On ueyilistli yejua kipiya, pampa yejua isenTekoneu toTajtsin.

¹⁵ Juan onochiu testigo itechkopa Cristo ijkuak okijtoj: “In yejua nikteneuaya ijkuak onikijtoj ika on yejuan nechajtokatiu ipan notekiu, más ueyixtikaj xken nejua pampa ijkuak onitlakat yejua ye nemiya.”

¹⁶ Tinochimej tikselijtiuij nochi on tlajtlamach* tlen kuajli yejua kipiya ikan iueyitetlajsojtlalis* yejuan xtechtocarouaya tikseliskej.

¹⁷ Moisés okitemakak on tlanauatijli pero on iueyitetlajsojtlalis* yejuan xtechtocarouaya tikseliskej niman on tlen melauak okuajkik JesuCristo.

¹⁸ Xkaman yakaj kitaya Dios. Pero isenTekonetsin yejuan toTajtsin sanoyej kitlajsojtla* yejua yokiteititij.

Juan on tlakuatekijketl okinnankijlij on tiopixkej niman on levitas

¹⁹ On tlayekankej hebreos* chanejkej Jerusalén, okintitlankej tiopixkej niman levitas itech Juan para kitlajtoltiskej akin yejua.

²⁰ Yejua ijkin kuajli okinmelajkaijlij: —Nejua xniCristo yejuan Dios okitlalij para tlamandaros.

²¹ Kemaj okitlajtoltijkej: —Tla ijkon, ¿akin tejua? ¿Tejua titiotlajtojketl Elías? Niman Juan okijtoj: —Ka, xnejua. Kemaj ijkin okitlajtoltijkej: —Tla ijkon, ¿tejua titiotlajtojketl on yejuan ika onkatka uajlas? Niman yejua okijtoj: —Ka.

²² Kemaj más okitlajtoltijkej: —Xtechijli tej, akin tejua pampa ika onkaj tikpiyaskej tlen tikimijliskej on yejuan otechajtitlankej. ¿Tlinon tikijtoua moka tejua?

²³ Ijkuakon Juan okinnankilij: —Nejua nión akin tsajtsi ne kampa xalpatlajkan: “Xmelajkatlalikan nemoyojlo para nenueliskej nenkiseliskej toTEKO.” No ijki nikijtoua ken okijtoj on tiotlajtojketl Isaías.

²⁴ On yejuan okinotsatoj Juan okinuajtitlankaj on fariseos*.

²⁵ Niman yejuamej okijlijkej: —Tla ijkon, tla xtejua tiCristo, nion tiElías, nion yejua on tiotlajtojketl yejuan ika onkatka uajlas, ¿tline* tej, titlakuatekiya?

²⁶ Juan okinmijlij: —Nejua nitlakuatekiya ikan atl, pero nemotsajlan okse nemi yejuan xnenkixmatij.

²⁷ Yejua nechajtokatiu ipan notekiu. Niman nejua nion achijtsin xnechmelaua* niktojtomas ikakmekayo, pampa más ueyixtikaj xken nejua.

²⁸ Nochi in onochiu ne kampa itoka Betábara yejuan nokaua ne ika ikisayan tonaltsintli de on río Jordán kampa Juan tlakuatekiyaya.

Juan okijtoj akinon on Jesús

²⁹ Uajmostla Juan okitak Jesús ye ompa kinisiuijtiaya niman okijtoj: —Xkitakan on tlakatl. Yejua kiuentlaliskej ken sen borreguito para Dios kintlapojpoluilis intlajtlakoluan nochimej on tlaltikpaktlakamej.

³⁰ In yejua nikteneuaya ijkuak onikijtoj: “Sen tlakatl yejuan nechajtokatiu ipan notekiu yejua más ueyixtikaj xken nejua pampa ijkuak onitlakat, yejua ye nemiya.”

³¹ Nejua no xnikixmatiya akin yejua. Pero niuajtlakuatekijtiu ikan atl para on hebreos* uelis kixmatiskej.

³² Niman Juan okitemachistij on tlen okitak. Yejua ijkin okijtoj: —Nejua onikitak ken ouajtemok de ne iluikak on Espíritu Santo. Yejua ouajtemok ken itlaj paloma niman ipan onokau Jesús.

³³ Nejua hasta aman xnikixmatiya akin yejua, pero on yejuan onechajtitlan ma nitlakuateki ikan atl onechijlij: “Ijkuak tikitas temos on Espíritu Santo niman on akin ipan nokauas, tikmatis ika on yejua tlakuatekis ikan Espíritu Santo.”

³⁴ Nejua yonikitak niman aman nitemachistia ika yejua iKoneu Dios.

On achtoj inomachtijkauan* Jesús okiskej itech Juan

³⁵ Uajmostla Juan oksejpa ompa nemiya iuan omemej inomachtijkauan*.

³⁶ Niman ijkuak okitak ompaka panouaya Jesús, okijtoj: —Xkitakan on tlakatl. On yejua iborreguito Dios. Dios okuajtitlan para kiuentlaliskej ken sen borreguito.

³⁷ Kemaj ijkuak on omemej inomachtijkauan* Juan okakkej on tlen yejua okijtoj, oyajkej iuan Jesús.

³⁸ Kemaj Jesús ontlachix ikuitlapan niman ika okitak kuitlapanuiyayaj on omemej tlakamej. Okimijlij: —¿Tlinon nenkitejtemouaj? Yejuamej okijlijkej: —Temachtijketl, ¿kanon tichanti?

³⁹ Jesús okinmijlij: —Xuajlakan niman xkitakan. Kemaj oyajkej niman okitakej kanon chanti, niman ompa iuan onokajkej hasta kaman otlayouak pampa ye tiotlak katka, kanaj ipan naui hora ijkuak oyejkokej.

⁴⁰ Se de yejuamej on omemej yejuan okakkej tlen okijtoj Juan niman iuan oyaj Jesús, itoka katka Andrés yejuan ikniu Simón Pedro.

⁴¹ Andrés achtoj oyaj okitejtemoto Simón on ikniu, niman okijlij: —Yotiknextijkej on Mesías —yejuan kijtosneki Cristo yejuan Dios okitlalij para tlamandaros.

⁴² Kemaj Andrés okuikak Simón ne kampa nemiya Jesús. Niman ijkuak Jesús okitak, okijlij: —Tejua tiSimón ikoneu Jonás, pero motoka yes Cefas —yejuan kijtosneki Pedro.

Jesús okinots Felipe niman Natanael

⁴³ Uajmostla Jesús okitoj para yas Galilea. Niman ijkuak okinextij Felipe, okijlij: —Xuajla nouan.

⁴⁴ Felipe chanej* katka ipan on kalpan itoka Betsaida kampa no chantiyaj Andrés niman Pedro.

⁴⁵ Kemaj Felipe oyaj niman okinextij Natanael. Niman yejua okijlij: —Yotiknextijkej on tlakatl yejuan okiteneu Moisés ipan on amamoxtli de on tlanauatiltin, niman no on tiotlajtojkej itechkopa otlajkuilojkej. In Jesús ikoneu José yejuan chanej* ipan on kalpan itoka Nazaret.

⁴⁶ Kemaj Natanael okijtoj: —¿Intech on tlakamej yejuan chantij Nazaret uelis kisas se yejuan tepaleuis? Felipe okijlij: —Xuajla niman xkitaki.

⁴⁷ Ijkuak Jesús okitak Natanael ye kinisiuiaya, okijtoj: —Nikan uajlau se yejuan melauak hebreo* yejuan xkaman tlakajkayaua.

⁴⁸ Kemaj Natanael okitlajtoltij: —¿Ken tinechixmati? Niman Jesús okijlij: —Ijkuak Felipe xe mitsnotsaya, nejua onikmat ika tinemiya tlatsintlan de on kojtli* itoka higuera.

⁴⁹ Kemaj Natanael okijlij: —Temachtijketl, tejua tiiKoneu Dios. Tejua tiinRey on hebreos*.

⁵⁰ Jesús okijlij: —¿Tinechneltoka san ika onimitsijlij onimitsontak tlatsintlan de on kojtli* higuera? Aman tej, nimitsijlia ika más uejueyi tlajtlamach* tikitas.

⁵¹ No ijki okijtoj Jesús: —Ika tlen melauak nemechijlia, ika nemejuamej nenkitaskej tlapojtias on iluikak niman on iángeles Dios tlejkoskej niman temoskej nopan yejuan oninochiu Tlakatl.