Hechos 9 - El Nuevo Testamento

Saulo otlaneltokak

¹ Saulo sanken* kinmomojtijtinemiya niman kintlajtouiliya para kinmiktis on tlaneltokakej itech toTEKO. Yejua ika tej, oyaj itech on inmasueyitlayekankau on tiopixkej,

² niman okitlajtlanilij sen amatlanauatijli yejuan ika nopresentaroskia ipan insinagogas* on hebreos* ipan on ueyikalpan Damasco, para komintejtemoskia on yejuan kitlakamatij on kuajli temachtijli. Niman ijkuak kinnextiskia tlakamej niman siuamej, kinuajtsakuaskia ne Jerusalén.

³ Pero chika yaya ipan ojtli nisiu Damasco, nimantsin sen tlauijli ouajpetlan iyeualkan yejuan oualeu iluikak.

⁴ Niman Saulo ouetstiaj ipan tlajli, niman kemaj okak sen tlajtojli yejuan okijlij: —Saulo, Saulo, ¿tline* tinechtlaueltotokatinemi?

⁵ Niman yejua okinankilij: —¿Akin tejua Señor? Niman on tlajtojli okinankilij: —Nejua niJesús akin tinechtlaueltotokatinemi. Sano tejua timokojkokoua ijkon ken nokojkokoua sen uakax ijkuak kiteliksa ikuayakapitsko on tlen ika kitsopinijtiuij ijkuak tekiti.

⁶ Ijkuakon yejua sa mojkakuekuetlakatikatka, niman okijlij: —Señor, ¿tlinon tikneki ma nikchiua? Niman on toTEKO okijlij: —Xmokuiteua niman xuiya ne ipan on ueyikalpan, niman ompa mitsijliskej tlinon tikchiuas.

⁷ On tlakamej yejuan yayaj iuan Saulo onomojtijkej pampa okakkej on tlajtojli pero xakaj okitakej.

⁸ Kemaj Saulo onokuiteu, pero ijkuak okintlapoj ixtololojuan xok ouel otlachix. Yejua ika, okimayantiajkej hasta Damasco.

⁹ Ompa onen yeyi tonajli kampa xotlachix, xotlakuaj nion xitlaj* okonik.

¹⁰ Ompa Damasco chantiya sen nomachtijketl itoka Ananías. Niman toTEKO okinots ipan sen tlatlachalistli yejuan ken itemikpan, niman okijlij: —Ananías. Niman yejua okinankilij: —Nikan ninemi noTEKO.

¹¹ Niman toTEKO okijlij: —Xuiya ipan on calle kitokayotiaj “Melajki”. Niman ompa ichan Judas, xtejtemo sen tlakatl itoka Saulo yejuan ualeua ipan on ueyikalpan Tarso. Aman yejua noueyikatsajtsilijtikaj.

¹² Niman ipan sen tlatlachalistli yejuan ken itemikpan yejua okitak sen tlakatl itoka Ananías yejuan okalakito, niman ipan okitlalij imauan para oksejpa uelis tlachas.

¹³ Ijkuak Ananías ijkon okak, okijlij: —NoTEKO, miyekej onechijlijkej ika on tlakatl sanoyej yokintlajyouiltij on yejuan mitsneltokaj chanejkej Jerusalén.

¹⁴ Niman aman yejua ouajlaj nikan ikan sen amatlanauatijli yejuan intlayekankauan on tiopixkej okimakakej para kinmajsis nochimej on yejuan kiyekteneuaj motokatsin.

¹⁵ Pero on toTEKO okijlij: —Xuiya, pampa on tlakatl yoniktlapejpenij para tenojnotsas noka nejua intech on yejuan xhebreos*, reyes niman on hebreos*.

¹⁶ Nejua nikititis ika miyek tlajtlamach* kijyouis nopampa.

¹⁷ Kemaj Ananías oyaj ipan on kajli kampa nemiya Saulo. Ijkuak okalakito, okitlalij imauan ipan Saulo, niman okijlij: —Nokniu Saulo, on toTEKO Jesús yejuan omitsnotitij ipan on ojtli kampa tiuajlaya, onechajtitlan para oksejpa uelis titlachas, niman para on Espíritu Santo mitsyoltemitis.

¹⁸ Kemaj nimantsin oxinkej de ipan ixtololojuan ken itlaj iixtakajlouan, niman oksejpa ouel otlachix. Kemaj Saulo ouajnotelkets, niman onokuatekij.

¹⁹ Niman ijkuak yotlakuaj, oksejpa okajsik chikaualistli. Niman Saulo onokau keski tonajli inuan on tlaneltokakej yejuan ompa chanejkej Damasco.

Saulo okiteijlij on kuajli tlajtojli ompa Damasco

²⁰ Kemaj Saulo nimantsin opeu temachtia ipan insinagogas* on hebreos* ika Jesús yejua iKonetsin Dios.

²¹ Niman nochimej on yejuan kikakiyaj sa mojkatlachayaj, niman kijtouayaj: —¿In tlakatl xejua kintlauelita niman kintlajyouiltia on yejuan ne Jerusalén kiyekteneuaj itokatsin Jesús? ¿Xsanno yejua yejuan ouajlaj nikan para kinuikas presos on yejuan tlaneltokakej itech Jesús, niman komintemaktilis intech intlayekankauan on tiopixkej?

²² Pero Saulo kinmijliaya ikan más yolchikaualistli on hebreos* ika Jesús melauak yejua Cristo yejuan Dios okitlalij para techmakixtis. Ijkon okichiu hasta opejkej ometlamatij on yejuan chantiyaj Damasco.

Saulo ocholojteu intech on hebreos*

²³ Miyek tonaltin más sakin* on hebreos* yokitlajtouilijkaj Saulo para kimiktiskej.

²⁴ Pero yejua okimat tlinon kichiuilisnekiyaj on hebreos*. Ikan tonajli niman yeuajli yejuamej kipijpiyayaj ipan itsakuijlouan on ueyikalpan para kimiktiskej.

²⁵ Pero ijkuak tlayoua, on tlaneltokakej okitlalijkej Saulo ijtik sen ueyi chikiutli ne kampa tlapojtikaj on tepanchinantli yejuan kiyeualojtoya on ueyikalpan. Kemaj okitemoltijkej niman ijki ocholoj.

Saulo oyaj para Jerusalén

²⁶ Ijkuak Saulo oajsik Jerusalén, kichiuaya kanika para nosentlalis inuan on tlaneltokakej, pero nochimej kimakajsiyaj pampa xkineltokayaj ika yejua no yotlaneltokak itech Jesús.

²⁷ Kemaj, Bernabé okontilan Saulo niman okimixpantilij on apóstoles*. Okintlajtlajtouilij kenijki Saulo okitak toTEKO ne ipan ojtli, niman kenijki toTEKO okinots. Niman no okitetlajtlajtouilij ken ne Damasco Saulo otemachtij ikan yolchikaualistli ipampa Jesús.

²⁸ Kemaj Saulo onokau ompa Jerusalén, niman ikan nochi yolchikaualistli tenojnotsaya itechkopa toTEKO.

²⁹ Yejua tlajtlajtouaya niman nokamatlaniya inuan on hebreos* yejuan tlajtouaj on tlajtojli griego, pero yejuamej kinemiliayaj kimiktiskej.

³⁰ Niman ijkuak on tokniuan okimatkej on, okuikakej Saulo para Cesarea, niman ompa okontitlankej para Tarso.

³¹ Kemaj on yejuan tlaneltokaj nouiyan ipan inueyitlalpan Judea, Galilea niman Samaria kipiyayaj yolseuilistli niman noyolchikauayaj. Kitlakaitayaj on toTEKO, niman kimpaleuiya on Espíritu Santo. Ijkon tej, más miyekixtiayaj.

Pedro okipajtij Eneas

³² Pedro kinnojnotstinemiya on tokniuan nochiuiyan, niman oyaj para okintato on yolchipajkej itech Dios yejuan chantiyaj ipan on kalpan Lida.

³³ Ompa okinextito sen tlakatl itoka Eneas yejuan ye kipiyaya chikueyi xipan ika onoya ipan itlapech, pampa sepojtoya.

³⁴ Niman Pedro okijlij: —Eneas, JesuCristo yomitspajtij. Xmotelketsa niman xkuektlali motlapech. Kemaj nimantsin Eneas onotelkets.

³⁵ Nochimej on yejuan chantiyaj ipan on kalpanmej Lida niman Sarón okitakej ika opajtik. Yejua ika, yejuamej okitlalkauijkej inachtoj tlaneltok niman okineltokakej toTEKO.

Pedro okiyoliuitij* Dorcas yejuan yomikka

³⁶ Ne ipan on ueyikalpan Jope nemiya sen siuatl tlaneltokaketl itoka katka Tabita, yejuan ipan griego* tlajtojli kijtosneki Dorcas. Yejua in siuatl nochipa kichiuaya tlen kuajli niman kimpaleuiyaya on yejuan itlaj kimpolouaya.

³⁷ Ipan on tonaltin Dorcas okualok niman omik. Niman ijkuak yokipajpakkej itlalnakayo, okauatoj ipan sen kalijtik kampa ika ome piso niman ompa okitekakej.

³⁸ Lida san nisiu kitstikatka on ueyikalpan Jope. Yejua ika ijkuak on tlaneltokakej de Jope okakkej ika Pedro nemiya Lida, okintitlankej omemej tlakamej para okijlijtoj: —Maka tiuejkauis para tiuajlas Jope kampa tejuamej tinemij.

³⁹ Kemaj, Pedro ouajnotelkets niman oyaj inuan. Ijkuak oajsik, okuikakej ipan on kalijtik kampa onkatka itlalnakayo on mikatsintli. Niman nochimej on siuakauatsitsimej* chokayaj niman okiteyeualojkej Pedro para okititijkej on tlakentin niman on tlakenpanimej yejuan Dorcas okinchijchiu ijkuak nemiya.

⁴⁰ Kemaj Pedro okinkixtij nochimej, niman kemaj onotlakuantelkets niman okichiu oración. Kemaj ouajnokuep niman okontak on siuatl yejuan miktoya. Niman okijlij: —Tabita, xmokuiteua. Niman yejua okinuajtlapoj ixtololojuan, niman ijkuak okitak Pedro, ouajnotlalij.

⁴¹ Pedro okiktsij ipan ima niman okipaleuij para onotelkets. Kemaj okominnots on siuakauatsitsimej* niman on tokniuan, niman okimixpantilij yoltikaj.

⁴² Yejua in omachiyato nouiyan ipan on ueyikalpan de Jope, niman miyekej otlaneltokakej itech toTEKO.

⁴³ Niman Pedro onokau miyek tonaltin ne Jope ipan ichan sen kuetlaxinketl itoka Simón.