Hechos 23 - El Nuevo Testamento

¹ Kemaj Pablo okimixkechij on más uejueyi tekiuajkej ipan on Sanedrín* niman okinmijlij: —Nokniuan, hasta ipan in tonajli nejua ninemi ixpan Dios ikan chipajkatlamachilistli.

² Kemaj Ananías, on más ueyitlayekanki tiopixki, okinnauatij on yejuan nisiu nemiyaj itech Pablo ma kamauitektiakan.

³ Pero Pablo okijlij: —¡Dios mitsmailis tejua, omexayakyej! Ompa on teuatikaj para tinechtlajtlakolmakas ken kijtoua on tlanauatijli. ¿Tline* titlanauatia ma nechmailikan niman ijkon xtiktlakamati on tlanauatijli?

⁴ Niman on yejuan ompa nemiyaj itech Pablo okijlijkej: —¿Ijkon tikuijuikaltia on más iueyitiopixkau Dios?

⁵ Pablo okijtoj: —Xnechtlapojpoluikan nokniuan. Nejua xnikmatiya ika yejua más ueyitlayekanki tiopixki, pampa ijkin kijtoua on Yektlajkuilojli: “Maka tikuijuikaltis on yejuan tekiuaj intech mochanejkauan*.”

⁶ Pablo okimat ika ne ipan on Sanedrín*, nemiyaj sekimej saduceos* niman sekimej fariseos*. Yejua ika ikan chikauak tlajtojli okijtoj: —Nokniuan, nejua nifariseo* niman nochi nofamilia fariseos. Niman nemejuamej nennechtlajtlakolmakatokej pampa nikneltoka ika yoliuiskej* niman noketsteuaskej on mikatsitsimej.

⁷ Ijkuak ijkin okijtoj, on fariseos* iuan on saduceos opeu notenkuikuij niman onotlajkoxelojkej.

⁸ (Ijkon onochiu pampa on saduceos kijtouaj ika on mikatsitsimej xyoliuiskej* oksejpa niman ika xnemij ángeles nion espíritus, pero on fariseos* kineltokaj nochi in tlajtlamach*.)

⁹ Niman nochimej sanoyej* tsajtsiyaj. Kemaj ouajnotelketstejkej sekimej on temachtijkej ikan itlanauatil Dios yejuan nopouaj intech on fariseos*, niman chikauak onotenkuikuikej. Ijkin kijtouayaj: —Xitlaj tlen xkuajli tiknextiliaj in tlakatl. Kas sen espíritu noso sen ángel melauak iuan otlajtoj. Maka ma titoxixikojtiakan iuan Dios.

¹⁰ Niman ika más sanoyej notenkuikuiyaj, on más ueyi soldadojtlayekanki onomojtij niman kuitiaya kojkokoskej Pablo. Yejua ika, yejua okintekuitlan on soldados para konkixtiskej Pablo intsajlan on tlakamej niman kuiskakej ipan on ueyi tepankajli kampa on soldados chantij.

¹¹ Niman uajmostla tlayoua, toTEKO okinotitij Pablo niman okijlij: —Xmoyolchikaua Pablo. Ijkon ken noka otitlajtoj nikan Jerusalén, no ijki ika onkaj noka titlajtos ipan on ueyikalpan Roma.

Okitlajtouilijkej kenijki kimiktiskej Pablo

¹² Niman uajmostla ijkuak yotlanes, sekimej on hebreos* onosentlalijkej niman okitlajtouilijkej para kimiktiskej Pablo. Yejuamej okitlajtolmakakej para xtlakuaskej nion xitlaj* koniskej hasta kaman kimiktiaj Pablo.

¹³ Niman on yejuan ijkon okitlalijkej on promesa más de cuarenta tlakamej katkaj.

¹⁴ Yejuamej oyajkej intech on tiopixkej tlayekankej niman on ueuetkej tlayekankej niman okinmijlijkej: —Tejuamej yotiktlalijkej in promesa para xitlaj* tikuaskej hasta kaman tikmiktiaj Pablo.

¹⁵ Aman tej, nemejuamej inuan on más uejueyi tekiuajkej ipan on Sanedrín*, xkijlikan on más ueyi soldadojtlayekanki para mostla ma mechajuikili Pablo. Ika xmotlamikan niman xkijlikan kitl nenkinekij nenkimatiskej más de on tlajtlamach* para nenkimatiskej tla melauak. Niman tejuamej tinemiskej listos para tikmiktiskej ijkuak xe yejko.

¹⁶ Pero itelpokakoneu on siuatl yejuan ikniu Pablo okak on tlen okitojkej. Yejua ika, oyaj ipan on ueyi tepankajli niman okimachistij Pablo.

¹⁷ Kemaj Pablo okinots semej on ueyi soldadojtlayekankej niman okijlij: —Xkuika in telpokakonetl itech on más ueyi soldadojtlayekanki, pampa kipiya tlinon komachistis.

¹⁸ On soldadojtlayekanki okuikak on telpokakonetl itech on más ueyi soldadojtlayekanki, niman okijlij: —Pablo yejuan tsakutikaj onechnots niman onechtlajtlanilij para ma nikuajuika motech in telpokakonetl, pampa kipiya tlinon mitsijlis.

¹⁹ Kemaj on más ueyi soldadojtlayekanki okontilan on telpokakonetl ipan ima, niman okuikak neka oksekan niman okitlajtoltij: —¿Tlinon tikneki tinechijlis?

²⁰ Kemaj yejua okijlij: —On hebreos* yonotlajtolmakakej mitstlajtlaniliskej para mostla xkuika Pablo imixpan on más uejueyi tekiuajkej ipan on Sanedrín*, yejuamej ika notlamiskej kitl kinekij kimatiskej más de on tlajtlamach* para kimatiskej tla melauak.

²¹ Pero tejua maka xkinneltokili, pampa más de cuarenta tlakamej kipijpiyaskej, niman onotlajtolmakakej ika xtlakuaskej nion xitlaj* koniskej hasta kaman kimiktiaj Pablo. Aman tej, ye nemij listos niman sa kichaj para tikinnankilis ika on tlen kitlajtlanij.

²² Kemaj on más ueyi soldadojtlayekanki okititlan on telpokakonetl, niman okinauatij maka yakaj kijlis ika yokitemachistij.

Pablo okititlankej itech on gobernador Félix

²³ Kemaj on más ueyi soldadojtlayekanki okinnots omemej soldadojtlayekankej, niman okinnauatij para ma kisentlalikan ome ciento soldados yejuan nejnemiskej, niman setenta yejuan yaskej ipan caballos niman ome ciento más yejuan kitkiskej lanzas para yaskej ne Cesarea ijkuak las nueve ika tlayoua.

²⁴ Niman no otlanauatij ma kimpiyakan caballos para yetias Pablo, para maka itlaj ipan nochiuas, yej kuikaskej kuajli hasta itech on gobernador Félix.

²⁵ No okititlan in tlajkuilolamatl:

²⁶ Nejua niClaudio Lisias. Nimitsontlajpaloua tejua ueyi gobernador Félix.

²⁷ In tlakatl okajsikej on hebreos* niman kimiktiskiaj, pero nejua onikmanauij ikan nosoldados pampa onikajsikamat ika yejua romano.

²⁸ Nejua niknekiya nikmatis tline kiteixpanuiyaj. Yejua ika, onikuikak imixpan on más uejueyi tekiuajkej ipan on Sanedrín*.

²⁹ Niman onikmat ika san kiteixpanuiyaj yejua ika on intlanauatiluan, pero xonkatka tline kimiktiskiaj nion siquiera para kalaktiskej ipan cárcel.

³⁰ Niman ijkuak onechmachistijkej ika yokitlajtoluikaj para kimiktiskiaj, nimantsin onimitsontitlanilij. Niman no onikimijlij on yejuan kiteixpanuiyaj para mitsijliskej tline kitlauelitaj. Kuajli xnemi.

³¹ Kemaj on soldados okantekej Pablo ijkon ken okinnauatijkej. Niman ijkuak tlayoua okuikakej hasta ipan on ueyikalpan itoka Antípatris.

³² Niman uajmostla on soldados yejuan nejnentiayaj onokuepkej para oyajkej ipan on ueyi tepankajli kampa on soldados nemij, niman on yejuan yayaj ipan caballos okuikakej Pablo.

³³ Ijkuak oajsikej Cesarea, on gobernador okimakakej on tlajkuilolamatl niman no okimaktilijkej Pablo.

³⁴ On gobernador okinomachtij on tlajkuilolamatl niman kemaj okitlajtoltij Pablo kanon otlakat. Niman ijkuak okimat ika yejua otlakat ipan iueyitlalpan Cilicia,

³⁵ okijlij: —Nimitskakis ijkuak yejkoskej on yejuan mitsteixpanuiyaj. Kemaj otlanauatij ma kuikakan niman ma kipiyakan ipan on ipalacio Herodes.