Hechos 22 - El Nuevo Testamento

¹ —Nokniuan niman tatajtin, xkakikan tlinon nikneki nikijtos nemixpan para ninomanauis.

² Ijkuak on tojlamej okakkej ika kinnojnotsa ikan tlajtojli hebreo, más xok onauatkej, niman Pablo okinmijlij:

³ —Nejua nihebreo. Onitlakat ipan on ueyikalpan Tarso yejuan onkaj ipan iueyitlalpan Cilicia, pero oninoskaltij nikan Jerusalén. Gamaliel onechmachtij. Yejua onechmachtij kuajli ken melauak tlanauatia on tlanauatijli de toachtojtajuan. Niman nikchiuaya kanika para ikan nochi noyojlo niktlakamatiya Dios ijkon ken nemejuamej nenkichiuaj aman.

⁴ Nikintlauelitaya niman nikintlajyouiltiaya hasta sekimej omikkej on yejuan kitokayaj on Yenkuik Tlajtojli. Nikinmajsiya tlakamej niman siuamej para nikintsakuaya ipan cárcel.

⁵ On más ueyi tlayekanki tiopixki niman nochimej on uejueyi tekiuajkej ipan on Sanedrín* uelis kiteixpantiliskej ika melauak ijkon onikchiu. Yejuamej hasta onechmakakej sekimej amatlanauatiltin para nikintitiskia on tlayekankej hebreos* ne Damasco. Niman ompa oniaj para nikinuajuikaskia ken presos nikan Jerusalén on yejuan kineltokaj JesuCristo para ma kintlajyouiltikan.

Pablo kiteijlia kenijki onoyolpatlak

⁶ ’Pero kanaj tlakualispan ijkuak niaya ipan noojui, niman sa nisiu katka para najsiskia Damasco, nimantsin ouajtlapetlan noyeualkan sen kojtik tlauijli yejuan oualeu iluikak.

⁷ Niman oniuets ipan tlajli. Kemaj onikak sen tlajtojli nechijliaya: “Saulo, Saulo, ¿tline* tinechtlauelita niman tinechtlajyouiltia?”

⁸ Kemaj oniknankilij: “¿Akin tejua Señor?” Niman yejua onechijlij: “Nejua niJesús yejuan niualeua Nazaret, sano yejua yejuan tiktlaueltotokatinemi.”

⁹ Niman on yejuan nouan nemiyaj okitakej on tlauijli niman onomojtijkej, pero xokakkej itlajtol on yejuan nechnotstikatka.

¹⁰ Kemaj oniktlajtoltij: “¿Tlinon tikneki ma nikchiua noTEKO?” Niman toTEKO onechijlij: “Xmotelkets niman xuiya Damasco. Ompa mitsijliskej nochi tlen Dios okitlalij para tikchiuas.”

¹¹ Niman ika on ipetlanalis on tlauijli onechciegojtilij, on yejuan nouan nemiyaj onechmayantiajkej hasta Damasco.

¹² ’Ompa nemiya sen tlakatl itoka Ananías. Yejua kuajli kitlakamatiya itlanauatil Moisés niman nochimej on hebreos* yejuan chantiyaj ompa Damasco kuajli kitlakaitayaj.

¹³ Yejua ouajlaj onechitako, niman ijkuak oyejkok onechijlij: “Nokniu Saulo, oksejpa xseli motlachalis.” Niman nimantsin onitlachix niman onikitak yejua.

¹⁴ Kemaj onechijlij: “On yejuan iminDios toachtojtajuan omitstlapejpenij para tikixmatis on tlen yejua kineki, niman para tikitas on akin Yolmelajki niman para tikakis itlajtol yejuan yejua kijtoua.

¹⁵ Tejua tikpanextilis nochi tlakatl on tlen otikitak niman otikak.

¹⁶ Aman tej, ¿tlinon tikcha? Xmotelkets niman xmokuateki, niman xkijli toTEKO para ma mitschipaua de motlajtlakoluan.”

Pablo kiteijlia kenijki toTEKO okititlan intech on yejuan xhebreos*

¹⁷ ’Ijkuak onejkok nikan Jerusalén niman nikchiuaya oración ipan on ueyitiopan, onikitak se tlatlachalistli ken notemikpan.

¹⁸ Onikitak toTEKO, niman onechijlij: “Isijkapan xkisa nikan Jerusalén pampa xkiseliskej on tlen noka tikijtos.”

¹⁹ Kemaj nejua onikijlij: “NoTEKO, yejuamej kimatstokej ika nouiyan ipan insinagogas* on hebreos* onikinkixtij para nikintsakuaya ipan cárceles, niman nikinmajmailiaya on yejuan mitsneltokaj.

²⁰ Niman ijkuak okimiktijkej Esteban motenojnotskau, nejua no teuan ompa ninemiya. Nejua no oniktemakak notlajtol para okimiktijkej. Niman onikimpiyalij intlakeuan on yejuan okimiktijkej Esteban.”

²¹ Pero toTEKO onechijlij: “Xuiya, pampa nejua nimitstitlani uejka intech on yejuan xhebreos*.”

Pablo nemiya ipan imauan on soldadojtlayekanki

²² Hasta nikan ipan in tlajtojli yejuamej on tlakamej okakkej, pero ijkuak ijkin okakkej opejkej tsajtsij chikauak, kijtouayaj: —¡Ma miki on tlakatl! ¡Xok kitocaroua nemis!

²³ Niman pampa tsajtsiyaj niman tlakpak kichapaniayaj intlaken niman tlakpak kixiniayaj tlajli,

²⁴ on soldadojtlayekanki otlanauatij para ma kuikakan ne ijtik on ueyi tepankajli. Kemaj otlanauatij ma kuijuitekikan para ma kijto tline on tlakamej itechkopa tsajtsiyaj ikan tlauejli.

²⁵ Pero ijkuak yokisasalojkaj para kimajmailiskiaj, Pablo okijlij on soldadojtlayekanki romano yejuan ompa nemiya: —¿Tlen on tlanauatijli romano mechkauiliaj para nenkuijuitekiskej sen romano yejuan nion xe kiyolkuitiaj niman xe kitlajtlakolmakaj?

²⁶ Ijkuak on soldadojtlayekanki romano ijkon okak, oyaj okimachistito on itlayekankau, niman okijlij: —Kuajli xnemili tlinon tikchiuas, pampa tlakaj in tlakatl romano.

²⁷ Kemaj on más ueyi soldadojtlayekanki okinisiuij Pablo, niman okijlij: —¿Tlen melauak tiromano? Niman yejua okijlij: —Kemaj, melauak.

²⁸ Kemaj on más ueyi soldadojtlayekanki okijlij: —Nejua ika miyek tomin oniktlaxtlau para oninochiu romano. Niman Pablo okijlij: —Pero nejua ka, pampa ijki onitlakat.

²⁹ Yejua ika itej, on yejuan kuitekiskiaj Pablo nimantsin onejkuanijkej. Niman on más ueyi soldadojtlayekanki, ijkuak okimat ika Pablo no romano, onomojtij ika okisalojka.

Pablo nemi imixpan on más uejueyi tekiuajkej de ipan on Sanedrín*

³⁰ On más ueyi soldadojtlayekanki kinekiya kajsikamatis on tlen melauak de on tlinon ika on hebreos* kiteixpanuiyaj Pablo. Yejua ika, uajmostla okitojton Pablo de on teposcadena niman otlanauatij ma uajuiyan niman ma nosentlalikan on tiopixkej tlayekankej niman nochimej on más uejueyi tekiuajkej ipan on Sanedrín*. Kemaj okixtij Pablo niman okitelkets imixpan.