Hechos 20 - El Nuevo Testamento

Pablo oyaj Macedonia niman Grecia

¹ Ijkuak yopanok on ika onajkomanalok, Pablo okintekuitlan nochimej on tlaneltokakej para okintlakanonots. Niman ijkuak inuan ononauatij, okinnajnapaloj, niman oyaj para Macedonia.

² Chika panouaya nochiuiyan, okinyolchikajtiaj on tokniuan ikan itlajtol. Kemaj oajsik Grecia

³ kampa onokau yeyi metstli. Niman ijkuak ye kalakiskia ipan barco para yaskia Siria, okimat ika on hebreos* okipijpiyatoj para kimiktiskej. Yejua ika okinemilij para nokuepas niman oksejpa panos ompa Macedonia.

⁴ Niman iuan oyajkej hasta Asia, Sópater yejuan chanej* Berea, Aristarco niman on tlakat itoka Segundo yejuan chanekej Tesalónica, Gayo yejuan chanej* Derbe, Timoteo, Tíquico niman Trófimo yejuan chanejkej ipan iueyitlalpan Asia.

⁵ Yejuamej in tokniuan oyakatstiajkej niman otechchatoj ipan on ueyikalpan itoka Troas.

⁶ Niman ijkuak yopanok on iluitl ijkuak nokua on pan yejuan xkipiya tlaxokolilistli*, tejuamej otikiskej de Filipos ipan barco, niman ipan makuijli tonajli otikinmajsitoj ipan on ueyikalpan Troas kampa otitokajkej chikome tonajli.

Pablo okiyoliuitij* sen telpochtli de Troas

⁷ Ipan on tonajli domingo, tinochimej otitosentlalijkej para san sekan otitlakuajkej niman no otikpixkej Santa Cena. Niman Pablo otechmachtij hasta tlajkoiuan, pampa okinek kisas ijkuak uajmostla.

⁸ Niman onkatkaj miyekej tlauiltin ipan on kajli tlakpak kampa tinemiyaj san sekan.

⁹ Niman sen telpochtli yejuan itoka katka Eutico yeuatikatka ipan sen ventana. Niman ika Pablo onouejkau ika temachtia, on telpochtli okajsik kochistli. Ijkuak kochtikatka sanoyej, ouetstetsiko kampa ika yeyi piso de on kajli hasta ipan tlajli. Niman oketsteuatoj yomik.

¹⁰ Kemaj Pablo otemok niman onixakaman ipan on telpochtli. Kemaj okinapaloj, niman okinmijlij on tokniuan: —Maka xmomojtikan, yejua yoltikaj.

¹¹ Kemaj Pablo oksejpa otlejkok, niman ijkuak yokixeloj on pan niman yotlakuaj touan, oksejpa otlajtlajtoj hasta ijki otlanes. Ijkuak nochi otlan, okis ompa.

¹² Kemaj okuikakej on telpochtli yoltikaj, niman sanoyej onoyoltlalijkej.

Pablo oyaj Mileto

¹³ Tejuamej otiyakatstiajkej niman otitatlalijkej ipan barco hasta on kalpan Asón. Nepa otikantikiskej Pablo ken yejua okijtoj, pampa yejua san onejnentiaj.

¹⁴ Niman ijkuak otonamikej ne Asón, ompa otikselijkej ipan barco, niman otiajkej para Mitilene.

¹⁵ Ompa otikiskej, niman uajmostla otajsikej ixpan Quío. Niman ipan okse tonajli más, otajsikej iatlatenko on tlaluaktli yejuan onkaj atlajkotian itoka Samos, niman otitoseuijkej Trogilio. Niman uajmostla otajsikej Mileto.

¹⁶ Ipan iojui, Pablo xoyaj Éfeso para xmás miyek tonaltin nemis Asia. Ijkon okichiu pampa kinekiya saniman ajsis Jerusalén para ompa nemis ipan on iluitl itoka Pentecostés* tla yejua ueliskia.

Pablo okinmachtij on ueuetkej tlayekankej de Éfeso

¹⁷ Kemaj ompa Mileto Pablo okintekuitlan on ueuetkej tlayekankej intech on tlaneltokakej de Éfeso.

¹⁸ Niman ijkuak ouajlajkej itech okinmijlij: —Nemejuamej ye nenkimatij ken oninouikak nemotech desde ipan on achtoj tonajli ijkuak oniuajlaj nikan Asia.

¹⁹ Nochipa oniktekipanoj toTEKO ikan nochi yolyemanilistli, niman ikan miyek chokistli niman ika miyek tlajyouilistli yejuan onechchiuilijkej on hebreos*.

²⁰ Pero xkaman onikajkau ika onemechtlajtlajtouilij niman onemechmachtij nochi on tlen mechpaleuis. Ijkon onikchiu teixpan kampa tojlan niman ipan techajchan.

²¹ Nochimej onikintlakanonots on hebreos* niman on yejuan xhebreos* ika noneki noyolpatlaskej itech Dios niman para ma kineltokakan toTEKO JesuCristo.

²² ’Aman tej, on Espíritu Santo nechchiualtia ma niuiya Jerusalén, niman nion nikmati tlinon ompa nopan nochiuas.

²³ Nejua san nikmati ika ipan nochi uejueyikalpanmej kampa niau, on Espíritu Santo nechmachistia ika nechtsakuaskej niman on tlen teyolkokoj tlajyouilistli nechcha.

²⁴ Pero nejua xitlaj* nikchiuilia cuenta, nion nonemilis xitlaj* kijtosneki para nejua. Yej san nikneki niknejnemis in ojtli ikan paktli hasta kampa tlamis nonemilis. Niman nikneki kuajli nitlamis on tekitl yejuan onechmakak toTEKO Jesús para niktepannextilis on kuajli tlajtojli yejuan kiteijlia ken Dios temakixtia itechkopa iueyitetlajsojtlalis* yejuan xtechtocarouaya tikseliskej.

²⁵ ’Xkakikan kuajli. Ipan noyojlo nikmati ika nion nensemej nemejuamej yejuan nemotsajlan onitlajtlajtoj kenijki Dios tlamandaroua, xok oksejpa nennechitaskej.

²⁶ Yejua ika, aman nikneki nemechilis ika nejua xok nikpiyas tlajtlakojli tla yakaj ixpoliuis,

²⁷ pampa yonemechpantlantilij nochi on kech itetlakanonotsalis Dios.

²⁸ Niman aman sano nemejuamej nemopan xtlachakan niman impan xtlachakan nochimej on tlaneltokakej yejuan on Espíritu Santo intech omechtlalij ken tlajpixkej para impan nentlachaskej. Xkincuidarokan on tlaneltokakej yejuan iyaxkauan* Dios toTEKO, yejuan okinkou ikan iyesyo.

²⁹ Nikmatstikaj ika ijkuak nejua yoniaj, uajlaskej xkuajkualtin tlakamej yejuan kinekiskej kinchajchayauaskej on tlaneltokakej yejuan iyaxkauan* Dios ijkon ken on yolkej lobos kinchajchayauaj on borreguitos.

³⁰ Niman sano nemotsajlan kisaskej on yejuan kitemachtiskej on tlen xmelauak, para on tlaneltokakej kinuikaskej.

³¹ Sanoyej xpiyakan cuidado. Xkelnamikikan ika yeyi xipan ikan tonajli niman yeuajli xoninoteltij onemechtlakanonots cada se hasta ikan nixayo.

³² ’Aman, nokniuan, nemechtemaktilia itech Dios niman itech itlajtoltsin de on iueyitetlajsojtlalis* yejuan xtechtocarouaya tikseliskej yejuan kipiya poder para mechyolchikauas ipan nemotlaneltok, niman mechmakas sen herencia intech on yejuan yolchipajkej.

³³ Xakaj onikeleuilij* itomin nion itlaken para nejua.

³⁴ Yej nemejuamej kuajli nenkimatstokej ika onitekit ikan nomauan para oniktlan on tlen nechpolouaya niman no para on yejuan nouan nemiyaj.

³⁵ Nochi tlen nejua onikchiu, ika onemechititij ika ijkin noneki nentekitiskej niman nenkimpaleuiskej on yejuan mayankej. Niman xkelnamikikan on itlajtoltsin toTEKO Jesús ken yejua okijtoj: “Más paki yejuan kitemaka xken on yejuan kiselia.”

³⁶ Ijkuak otlan kijtoua in tlajtlamach*, Pablo onotlakuantelkets inuan niman okichiu oración.

³⁷ Nochimej ochokakej, niman okinajnapalojkej niman okitenkuajkej* Pablo.

³⁸ Niman más najmanayaj pampa okinmijlij ika xok kaman kitaskej. Kemaj iuan oyajkej hasta itech on barco.