Hechos 19 - El Nuevo Testamento

Pablo nemiya Éfeso

¹ Kemaj chika Apolos nemiya ne Corinto, Pablo opanok kampaka tepeyoj niman oajsik ne Éfeso. Niman ompa okinnextij sekimej tlaneltokakej.

² Niman okintlajtoltij: —¿Onenkiselijkej Espíritu Santo ijkuak onentlaneltokakej? Yejuamej okinankilijkej: —Ka, tejuamej xkaman otikakkej tla nemi on Espíritu Santo.

³ Kemaj, Pablo okintlajtoltij: —¿Tlinon ika onemokuatekijkej? Niman yejuamej okijlijkej: —Ikan itlakuatekilis Juan.

⁴ Kemaj Pablo okinmijlij: —Juan kinkuatekiyaya on tlakamej para kiteititiayaj ika yejuamej yokajkajkej ika kichiuaj on tlen xkuajli. Niman kemaj kinmijliaya ika noneki kineltokaskej on akin uajlas sakin*. On akin uajlas sakin* kijtosneki Jesús on Cristo yejuan Dios okitlalij para tlamandaros.

⁵ Niman ijkuak okakkej yejua in, onokuatekijkej ikan itokatsin toTEKO Jesús.

⁶ Niman ijkuak Pablo impan okitlalij imauan, on Espíritu Santo impan ouajlaj, niman opeu tlajtlajtouaj ikan sesekneka yenkuik tlajtojli niman okijtojkej on tiotlajtojli yejuan okiselijkej itech Dios.

⁷ Nochimej on tlakamej ken kanaj majtlaktli uan omemej katkaj.

⁸ Yeyi metstipan Pablo nochipa yaya ipan insinagoga* on hebreos* kampa kiteijliaya itlajtol Dios ikan yolchikaualistli. Yejua notentlaniya niman kintlaneltoktiaya on tlakamej itechika on ken Dios tlamandaroua.

⁹ Pero sekimej onoyoltechikajkej niman xokinekkej otlaneltokakej, yej imixpan on tlakamej opeu kuijuikaltiaj on Yenkuik Tlaneltoktli. Yejua ika tej, Pablo onoxeloj intech niman okinuikak on tlaneltokakej ipan iescuela sen tlakatl itoka Tiranno. Niman mojmostla ompa tlajtlajtouaya.

¹⁰ Niman ome xipan okinmachtij. Ijkon tej, on hebreos* niman on griegos* yejuan chantiyaj Asia okakkej on itlajtoltsin toTEKO Jesús.

¹¹ Niman Dios kichiuaya uejueyi milagros* itechkopa Pablo.

¹² Hasta opajtikej on kokoxkej ijkuak ika kintejtemoltiayaj on pañitos niman on tlakentin yejuan Pablo okinteloj. Niman on xkuajkualtin espíritus no kisayaj intech on tlakamej.

^13-14 Pero sekimej hebreos* yejuan kintekixtiliayaj on xkuajkualtin espíritus okinekkej kitekitiltiskej itokatsin toTEKO Jesús para kitekixtiliskej on xkuajkualtin espíritus. Yejua in kichiuayaj on chikomemej ikoneuan on hebreo* itoka Esceva yejuan tlayekanki katka intech on tiopixkej. Kimijliayaj on xkuajkualtin espíritus: —Temechnauatiaj xkisakan ikan itokatsin Jesús on yejuan Pablo kiteijlia.

¹⁵ Pero se tonajli ijkuak ijkon okichijkej, on xkuajli espíritu ijkin okinnankilij: —Nikixmati Jesús, niman nikmati akinon on Pablo, pero nemejuamej, ¿nenakinomej?

¹⁶ Ijkuak ijkon okinmijlij, on tlakatl yejuan kipiyaya on xkuajli espíritu impan oyaj niman kechika kojtik okintlajtlan. Ijkon tej, on tlakamej ontlatlaksakej para ipan calle tetsotsoltikej niman tlakokoltin.

¹⁷ Ijkuak nochimej on hebreos* niman on yejuan xhebreos* yejuan chantiyaj Éfeso okimatkej tlen onochiu, onomojtijkej niman sanoyej* okitlakaitakej toTEKO Jesús.

¹⁸ Niman miyekej on yejuan otlaneltokakej teixpan noyolkuitiayaj de on tlen xkuajli tlajtlamach* okichijkej.

¹⁹ No ijki, miyekej yejuan kichiuayaj nauajlotl okuajkikej on amamoxtin de nauajlotl niman okintlatijkej teixpan. Ijkuak okixitilijkej kech valerouayaj nochi on amamoxtin, nochi katka kanaj cincuenta mil tomin de plata.

²⁰ Niman ijkon itlajtoltsin toTEKO nochayajtiaya niman nopanextiaya ipoder.

²¹ Ijkuak yopanok in tlajtlamach*, Pablo okitlalij iyojlo para ontenotsas Macedonia niman Acaya, niman kemaj yas Jerusalén. Niman kijtouaya ika sakin* ijkuak yotenotsato ne Jerusalén, ika onkaj no yas hasta Roma.

²² Kemaj okintitlan para Macedonia omemej itlapaleuijkauan Timoteo niman Erasto, niman yejua onokau keski tonajli ompa Asia.

On yejuan chanejkej Éfeso onajkomankej

²³ Ipan on tonaltin onajkomanalok ipampa on Yenkuik Tlaneltoktli.

²⁴ Sen tlakatl itoka Demetrio yejuan platero katka, kinchijchiuaya ikan plata tiopantsitsimej yejuan nesiyaj ken itiopan on iminnantsin Diana. Ika in tekitl kitlaniyaj miyek tomin on yejuan inuan tekitiyaj.

²⁵ Demetrio okinsentlalij yejuamej niman oksekimej yejuan no yejua tekitl kipiyayaj, niman okinmijlij: —Tlakamej, nemejuamej nenkimatstokej ika, ika in tekitl titopanoltiaj sanoyej kuajli.

²⁶ Pero nemejuamej nenkitaj niman nenkakij tlinon kichiua in tlakatl itoka Pablo. Yejua kiteijlijtinemi ika on dioses yejuan tlamachijchijtin xmelauak dioses. Ijkon tej, yokintlaneltoktij miyekej in chanejkej, niman xsan nikan Éfeso, yej sa ken nochi iueyitlalpan Asia.

²⁷ In sanoyej xkuajli, pampa on tlakamej xok kitlakaitaskej totekiyo, niman itiopan tonantsin Diana no xok yakaj kitlakaitas. Niman ijki xok kitlakaitaskej iueyilis in tonantsin yejuan nochi chanej* nikan Asia niman nochiuiyan imanian in tlaltikpaktli kiueyiliaj.

²⁸ Ijkuak ijkin okakkej, sanoyej okualankej niman otsajtsikej: —¡Ma nemi toueyinantsin Diana para tejuamej efesios!

²⁹ San xuejkajtika nochimej on chanejkej ipan on ueyikalpan onajkomankej niman oometlamatkej*. Yejuamej nimantsin impan oyajkej niman okajsikej on tokniu itoka Gayo niman Aristarco yejuan chanejkej Macedonia niman yejuamej iuan Pablo kistinemiyaj. Ijkuak okinmajsikej, nochimej san sekan okintejchiuilankej hasta ipan on plaza kampa onosentlaliaj ijkuak itlaj noteititia.

³⁰ Pablo kinekiya kalakis ompa para kinnotsas on tlakamej, pero on tlaneltokakej xokauilijkej.

³¹ No ijki sekimej itlajsojkaikniuan* Pablo yejuan tekiuajkej ne Asia okitlajtlanilijkej niman okijlijkej maka kalakis ipan on plaza.

³² Ipan on plaza on yejuan onosentlalijkej tsajtsiyaj. Sekimej kitsajtsiyaj itlaj niman oksekimej kitsajtsiyaj itlaj okse, pampa on tojlamej yonajkomankaj, niman on más miyekej xkimatiyaj tline* onosentlalijkej.

³³ On hebreos* okomapejkej Alejandro ne teixpan, niman semej on tlakamej yejuan nemiyaj ne intsajlan on tojlamej okitlajtlajtouilijkej on tlen nochiua. Kemaj Alejandro okichiuilij señas on tlakamej para maka sa ma nauatikan, pampa kinekiya tlajtos ne teixpan para kinmanauis on yejuan kintlauelitaj.

³⁴ Pero ijkuak okimatkej ika yejua hebreo, san setipan nochimej otsajtsikej hasta kanaj ome hora: —¡Ma nemi toueyi tonantsin Diana para tejuamej efesios!

³⁵ Kemaj ijkuak on yejuan itlajkuilojkau on ueyikalpan ouel okintlakaualtij on tlakamej, okinmijlij: —Tlakamej chanejkej nikan Éfeso, nochi tlakatl kimatstikaj ika in ueyikalpan Éfeso yejua okimaktilijkej para cuidaros itiopan in toueyinantsin Diana, niman de on ixneskayo yejuan oualeu iluikak.

³⁶ Niman pampa in nochimej kimatstokej, noneki maka sa xnauatikan niman maka itlaj xchiuakan tla xachtopa kuajli nenkinemiliaj tlinon nenkichiuaskej.

³⁷ In tlakamej yejuan nemejuamej onenkinuajuikakej nion ichtekej ipan tiopantin nion kuijuikaltiaj tonantsin.

³⁸ Tla Demetrio niman on yejuan iuan tekitij kipiyaj itlaj para kinteixpanuiskej in omemej tlakamej, on tekipan tlapojtikaj niman on yejuan uejueyi tekiuajkej nemij. Kuajli uelis kinmixkomakaskej ixpan on tekiuajkej niman in omemej tlakamej no uelis nomanauiskej ken kitocaroua.

³⁹ Pero tla nentlajtlanij itlaj okse más ueyi kijtosneki, noneki nenyaskej ijkuak nosentlaliskej on uejueyi tekiuajkej.

⁴⁰ Kas uelis techajuaskej yejua ika in tlen aman onochiu niman xtikpiyaj tlinon ika titenankiliskej tla techtlajtoltiskej tline otajkomankej.

⁴¹ Niman ijkuak ijkon okijtoj, okinnauatij on tojlamej ma uijuiyan.