Hechos 17 - El Nuevo Testamento

On chanejkej Tesalónica onajkomankej

¹ Ipan inojui, Pablo niman Silas opanokej ipan on uejueyikalpanmej Anfípolis niman Apolonia, niman kemaj oajsikej ipan on ueyikalpan Tesalónica, kampa on hebreos* kipiyayaj insinagoga*.

² Pablo, ijkon ken nochipa kichiuani, oyaj ipan on sinagoga, niman yeyi sábados otlajtlajtoj inuan on tlakamej.

³ Ijkon tej, kitemelajkaijliaya niman kiteititiaya ikan iyektlajkuilol Dios, ika Cristo ye onkatka para tlajyouis, kimiktiskej, niman oksejpa yoliuis*. Niman kinmijliaya: —Sano yejua in Jesús, yejuan nejua itechkopa nemechnojnotsa, yejua Cristo yejuan Dios okitlalij para techmakixtis.

⁴ Kemaj otlaneltokakej sekimej hebreos*, niman onosentlalijkej iuan Pablo niman Silas. No otlaneltokakej miyekej griegos* yejuan kitlakaitayaj Dios, niman miyekej siuamej yejuan uejueyixtokej.

⁵ Pero on hebreos* yejuan xtlaneltokayaj okinexikolitakej Pablo, niman yejua ika okinsentlalijkej sekimej xkuajkualtin tlakamej yejuan san calles kitokatinemij. Yejuamej okimajkomankej on chanejkej ipan on ueyikalpan. Yejuamej oyajkej ichan Jasón, okaltemojmotlakej, niman kichiuayaj kanika para kinkixtiskej Pablo niman Silas para kinuikaskiaj intech on tlakamej.

⁶ Pero pampa ompa xokinnextijkej, okuajtejchiuilankej Jasón inuan oksekimej tokniuan imixpan on tekiuajkej ipan on ueyikalpan, niman otsajtsitiajkej: —In tlakamej nochiuiyan yokajkomankej nochi tlaltikpaktlakatl. Aman youalajkej nikan,

⁷ niman Jasón okinselij ichan. Niman nochimej yejuamej xipan kitaj on itlanauatil César toueyi tlayekankau de Roma, pampa kijtouaj ika nemi oksen rey yejuan itoka Jesús.

⁸ Ijkuak on tlakamej niman on tekiuajkej ipan on ueyikalpan okakkej in tlajtlamach*, onajkomankej.

⁹ Pero on tekiuajkej okinchiualtijkej Jasón niman on oksekimej ma kitemakan tomin, niman kemaj okinmakakej.

Pablo niman Silas nemiyaj Berea

¹⁰ Ipan on tlayoua amanaman on tokniuan okintitlankej Pablo niman Silas para oyajkej Berea. Niman ijkuak oajsikej ompa ipan on ueyikalpan, okalakkej ipan insinagoga* on hebreos*.

¹¹ On tlakamej de Berea más kuajli tlaneltokayaj xken on yejuan chantiyaj Tesalónica. Ikan kuajli inyojlo okiselijkej on temachtijli, niman mojmostla kitejtemouayaj ipan on Yektlajkuilojli para kitaskej tla melauak on tlen kinmijliayaj.

¹² Ijkon tej, miyekej hebreos* otlaneltokakej niman intsajlan on griegos* no miyekej otlaneltokakej, siuamej yejuan más kintlakaitaj niman on tlakamej.

¹³ Pero ijkuak on hebreos* de Tesalónica okimatkej ika Pablo kiteijlijtikatka itlajtoltsin Dios ne Berea, ompa oyajkej niman okimajkomankej on tlakamej.

¹⁴ On tokniuan nimantsin okititlankej Pablo para ne ika kampa onkaj mar, pero Silas iuan Timoteo onokajkej ompa Berea.

¹⁵ On yejuan oyajkej iuan Pablo okuikakej hasta ne ipan on ueyikalpan itoka Atenas. Kemaj ouajnokuepkej ikan sen tlanauatijli para Silas niman Timoteo ma uiyan itech Pablo más nimantsin ken ueliskej.

Pablo nemiya Atenas

¹⁶ Chika Pablo kinchaya Silas niman Timoteo ompa Atenas, noyolkokouaya, pampa okitak ika on ueyikalpan tentikatka ikan ídolos.

¹⁷ Yejua ika, inuan tlajtlajtouaya ipan insinagoga* on hebreos* niman on griegos* yejuan kitlakaitayaj Dios, niman mojmostla tlajtlajtouaya ipan on plaza inuan on yejuan ompa nemiyaj.

¹⁸ Niman sekimej tlajtolmatkej, on yejuan notokayotiaj epicúreos niman estoicos, opejkej iuan notenkuikuij. Niman sekimej kijtouayaj: —¿Tlinon techijlisneki in chakuaketl? Niman oksekimej kijtouayaj: —Nesi ken tenojnotsketl de oksekimej dioses. Ijkin kijtouayaj pampa Pablo kinmijliaya itechkopa Jesús niman kenijki yoliuiskej* on yejuan yomikkej.

¹⁹ Kemaj okanatoj Pablo niman okuikakej ipan on ueyi tetlakanonotsaloyan itoka Areópago. Ompa okijlijkej: —Xtechijli tlinon kijtosneki in yenkuik temachtijli yejuan tikuajki.

²⁰ Titechijlia tlajtlamach* yejuan xkaman tikakiyaj niman tiknekij tikmatiskej tlinon kijtosneki.”

²¹ (Nochimej on chanejkej de Atenas niman on uejka chanejkej yejuan no ompa chantiyaj xitlaj* kinekiyaj, yej san kinekiyaj kitetlajtlajtouiliskej noso kakiskej itlaj yejuan yenkuik.)

²² Kemaj Pablo ouajnotelkets intlajkotian ipan on Areópago, niman okijtoj: —Tlakamej yejuan nenchantij nikan Atenas, nejua nikita ika nemejuamej sanoyej* nentlaneltokaj.

²³ Ijkin nikijtoua pampa kampaka oniuajpanotiaj onikitak miyekan kampa nenkinmauistiliaj nemodioses. Niman no onikitak sen tlaixpan* kampa tlajkuilolnestikaj in tlajtojli: “Para on Dios yejuan xakaj kixmati.” On tej, yejuan nemejuamej nenkimauistiliaj maski xnenkixmatij, on yejua Dios yejuan nejua nemechmachistia.

²⁴ ’On Dios yejuan okichijchiu in tlaltikpaktli niman nochi tlajtlamach* yejuan onkaj, yejua iyaxka* niman kimandaroua on iluikak niman in tlaltikpaktli. Yejua xchanti ipan on tiopanmej yejuan on tlakamej kinchijchiuaj.

²⁵ Nion xuelis itlaj ika kitekipanoskej on tlakamej, pampa yejua xitlaj* kipoloua, yej sano yejua otechmakak tinochimej tijyo*, tonemilis, niman nochi tlajtlamach*.

²⁶ ’Yejua okixtij itech san se tlakatl nochi kech tlakamej nemij ipan in países yejuan onokej imanian in tlaltikpaktli. Niman kuajli okitlalij kamanon niman kanon tlamandaroskej,

²⁷ para ma kitejtemokan Dios niman kas kinextiskej, maski sa majmayautiaskej, maski melauak yejua xuejka nemi cada se de tejuamej.

²⁸ Niman san ipampa yejua tiyoltokej, niman titoliniaj niman tinemij. In nochiua ken on sekimej nemokuikatijkauan okijtojkej: “Tejuamej titekoneuan itech Dios.”

²⁹ Yejua ika, tla tejuamej tiualejtokej itech Dios ken tiikoneuan, xkitocaroua tiknemiliskej tla Dios ken on dioses tlamachijchijualtin yejuan tlachijchijtin ikan oro, noso plata noso itlaj tetl, on yejuan san tlachijchijtli kualtsin noso tla on yejuan san tlakamej kinejnemiliaj.

³⁰ Yeuejkaui Dios okimijyouilij on tlakamej on tlen xkuajli kichiuayaj, pampa xkimatiyaj tlinon kuajli kichiuaskej. Pero aman nochi tlakatl kinnauatia nouiyan para ma kajkauakan ika kichiuaj on tlen xkuajli.

³¹ Ijkin Dios okinnauatij pampa yokitlalij on tonajli ijkuak nochi tlakatl kiyolkuitis ken kitocaroua itechkopa Cristo. Dios nochi tlakatl okititij ika melauak kichiuas ijkuak okiyoliuitij* Jesús niman okuiteu ipan itlalkon.

³² Ijkuak okakkej ika on mikatsitsimej yoliskej* niman nokuiteuaskej ipan intlalkon, sekimej san kuejuetskiliayaj, pero oksekimej kijtouayaj: —Tiknekij timitskakiskej oksejpa de on tlen titemachtia.

³³ Niman Pablo okis ompa intlajkotian yejuamej.

³⁴ Pero sekimej onosentlalijkej iuan, niman otlaneltokakej. Se yejuan otlaneltokak itoka Dionisio yejuan tetlakanonotsketl ompa ne Areópago. Niman sen siuatl itoka Dámaris inuan oksekimej no otlaneltokakej.