Hechos 16 - El Nuevo Testamento

Timoteo oyaj iuan Pablo niman Silas

¹ Pablo niman Silas oajsikej ipan on kalpanmej itoka Derbe niman Listra kampa nemiya sen tlaneltokaketl itoka Timoteo. Yejua tekoneu katka itech se siuatl hebrea yejuan tlaneltoka, pero itataj griego* katka.

² On tokniuan yejuan chanejkej Listra niman Iconio kuajli kiteneuayaj Timoteo.

³ Pablo okinek para Timoteo iuan ma uiya, niman yejua okitlalilij on neskayotl itoka circuncisión*. Ijkin okichiu para maka kualaniskej on hebreos*, pampa on hebreos* yejuan ompa chantiyaj kimatstikatkaj ika yejua itataj sen griego.

⁴ Niman ipan on kalpanmej kampa panotiayaj kinmachistijtiayaj on tlanauatiltin yejuan otlanauatijkej on apóstoles* niman on ueuetkej tlayekankej itech tokniuan yejuan nemiyaj ne Jerusalén.

⁵ Ijkon tej, on tlaneltokakej ipan on tiopantin noyolchikauayaj ipan intlaneltok niman on tlaneltokakej mojmostla más miyekixtiayaj.

Ipan sen tlatlachalistli ken itemikpan Pablo okitak kinotstikaj sen tlakatl de Macedonia

⁶ Yejuamej san okonmelajkej ipan inueyitlalpan Frigia niman Galacia, pampa on Espíritu Santo xokinkauilij para kiteijliskej on kuajli tlajtojli ne Asia.

⁷ Niman ijkuak oajsikej ne kampa tlami iueyitlalpan Misia, kichiuayaj kanika para panoskej ipan iueyitlalpan Bitinia, pero on Espíritu Santo xokinkauilij.

⁸ Yejua ika, san opanokej itechika Misia niman otemotoj ipan on kalpan itoka Troas.

⁹ Ompa Pablo ijkuak tlayoua, okitak sen tlatlachalistli ken itemikpan. Okitak sen tlakatl yejuan chanej* Macedonia ijkatikatka ixpan niman ijkin sanoyej* kitlajtlaniliaya: “Xuajla Macedonia niman xtechpaleui.”

¹⁰ Ijkuak Pablo okitak on tlatlachalistli, nimantsin otikchijkej kanika para otiajkej Macedonia. Ye kuajli tikmatstikatkaj ika Dios technotstikatka para tikimijliskej on kuajli tlajtojli yejuan kiteijlia ken Dios temakixtia.

Okintsakukej Pablo niman Silas ne Filipos

¹¹ Ijkuak otikiskej de Troas, otiakej ipan barco melajki hasta otajsikej ipan on tlaluaktli yejuan onkaj atlajkotian itoka Samotracia. Niman uajmostla otajsikej hasta on kalpan itoka Neápolis.

¹² Kemaj otiajkej ipan on ueyikalpan itoka Filipos yejuan más ueyixtikaj ompa ne Macedonia. On ueyikalpan inyaxka* katka on romanos. Ompa otinenkej keski tonajli.

¹³ Se tonajli sábado otikiskej ipan on ueyikalpan niman otiajkej itech iatenko sen río kampa on hebreos* kichiuaj oración. Ompa otijtotlalijkej niman otikinnojnotskej on siuamej yejuan yonosentlalijkaj.

¹⁴ Semej de on siuamej itoka katka Lidia. Yejua ualeuaya ipan on ueyikalpan itoka Tiatira, niman tlanamakaketl katka ikan telas yejuan morada niman patioj. Yejua in siuatl kitlakaitaya Dios. Yejua tlakaktikatka niman toTEKO okitlapouilij iyojlo niman okiselij on tlen Pablo kijtouaya.

¹⁵ Yejua onokuatekij niman nochi ifamilia. Kemaj ijkin otechtlajtlanilij: —Tla nemejuamej nenkitaj ika melauak yonikneltokak toTEKO, tiauij nochan niman nemoseuiskej ompa. Niman otechteltij para ma titokauakan ichan.

¹⁶ Ipan se tonajli ijkuak tejuamej tiayaj kampa kichiuaj oración, otiknamikej sen ichpochtli yejuan kipiyaya sen xkuajli espíritu yejuan kichiualtiaya para kimatiya tlinon nochiuas. Yejua esclava katka itech sen familia niman kitlaniya miyek tomin para itekouan.

¹⁷ On ichpochtli opeu techkuitlapanuiya Pablo niman tejuamej. Niman chikauak ijkin tsajtsiya: —In tlakamej kitekipanouaj on más ueyixtikaj Dios, niman mechpantlantiliaj on ken Dios ueli temakixtia.

¹⁸ Ijkin okichiu miyek tonaltin. Ijkuak Pablo okiyolajxitij, ouajnokuep niman okijlij on xkuajli espíritu yejuan ipan nemiya: —Ikan itokatsin JesuCristo nimitsnauatia xkisa itech in ichpochtli. Niman on espíritu nimantsin okitlalkauij.

¹⁹ Niman ijkuak itekouan on esclava okitakej ika xok uelis kitlaniskej tomin yejua itechkopa, okajsikej Pablo niman Silas niman okinuikakej ipan on ueyi plaza kampa nemij on tekiuajkej.

²⁰ Ijkuak okimixpantilijkej on uejueyi tekiuajkej, ijkin okiteijlijkej: —In tlakamej yejuan hebreos*, kajkomantinemij in toueyikan.

²¹ Yejuamej kitemachtiaj costumbres yejuan tejuamej xuelis tikseliskej, nion tikchiuaskej, pampa tiromanos.

²² Kemaj on tojlamej ouajnotelketskej para okinmixnamikej Pablo niman Silas, niman on uejueyi tekiuajkej okinnauatijkej sekimej tlakamej ma kintlakenkixtikan niman ma kinuijuitekikan.

²³ Niman ijkuak sanoyej yokinkojkokojkej ika sanoyej yokintlajtlatsuitekkej, okintsakuatoj. Niman on carcejtlajpixki okinauatijkej sanoyej kuajli ma kincuidaro.

²⁴ Ijkuak on carcejtlajpixki okiselij on tlanauatijli, okintsaku Pablo niman Silas más hasta tlaijtik. Niman ompa onkatka se kojtli* yejuan kojkoyonki itoka cepo. Niman ompa okinkalaktilijkej imikxiuan niman kuajli okintepitskualtilijkej.

²⁵ Niman ijkuak kanaj tlajkoiuan katka, Pablo niman Silas kichiuayaj oración niman nokuitiayaj itech Dios. On oksekimej yejuan tsakutikatkaj kominkaktikatkaj.

²⁶ Kemaj, amanaman chikauak ouajtlalolin hasta ouiuixkak icimiento* on cárcel. Kemaj, nimantsin nochimej on tsakuijlomej* otlapojkej niman onomajmakajkej on teposcadenas yejuan ika sasalijtikatkaj on yejuan tsakutikatkaj.

²⁷ Kemaj on carcejtlajpixki otlachix, niman ijkuak okitak ika itsakuijlouan on cárcel tlapojtokej, okuajxikopin iespada para nomiktiskia, pampa kinemiliaya ija on yejuan tsakutokej yochojcholojkej.

²⁸ Pero Pablo okitsajtsilijtiaj chikauak, niman okijlij: —Maka itlaj xmochiuili. Tinochimej nikan tinemij.

²⁹ Kemaj on carcejtlajpixki okitlajtlan tlauijli, niman okalaktikis ne ipan cárcel. Niman mojkakuekuetlakatiaya, onotlajkaltajsik ikxitlan Pablo niman Silas.

³⁰ Kemaj okinuajkixtij, niman okintlajtoltij: —Tlakamej, ¿tlinon noneki nikchiuas para nimakisas?

³¹ Niman yejuamej okinankilijkej: —Xneltoka toTEKO JesuCristo niman timakisas, tejua niman mofamilia.

³² Kemaj okitlajtlajtouilijkej on itlajtoltsin toTEKO niman nochimej on oksekimej yejuan iuan chantiyaj.

³³ Niman sano ipan on tlayoua, on carcejtlajpixki okinuajkixtij niman okimpajpakilij on kampa okinuijuitekkej. Niman kemaj nimantsin yejua niman nochimej ifamilia onokuatekijkej.

³⁴ Niman ijkuak okinuikak ichan, ompa okintlakualtij. Niman sanoyej opak inuan nochimej pampa yokineltokak Dios.

³⁵ Niman ijkuak otlanes, yejuamej on yejuan tekiuajkej okintitlankej on policías ikan sen tlanauatijli para ma kinmakauakan.

³⁶ Kemaj, on carcejtlajpixki okimachistij Pablo, niman ijkin okijlij: —On uejueyi tekiuajkej nechnauatiaj para ma nemechmakaua. Amantsin uelis nenyaskej. Xuiyan ikan yolseuilistli.

³⁷ Pero Pablo okinmijlij: —Tejuamej, yejuan no tiromanos, otechuijuitekej teixpan niman xachtoj otechyolkuitijkej, niman otechtsakukej. ¿Niman aman kinekij san ichtaka* techmakauaskej? ¡Ka, ijkon ka! Ma uajuiyan yejuamej, ma techkixtikij.

³⁸ Kemaj on policías okinmachistijkej on uejueyi tekiuajkej on tlinon okijtoj Pablo. Niman onomojtijkej ijkuak okakkej ika yejuamej romanos.

³⁹ On uejueyi tekiuajkej oyajkej niman okitlajtlanitoj tetlapojpoluilistli itech Pablo niman Silas. Niman kemaj okinkixtijkej niman okintlajtlanilijkej yej ma kisakan de ipan on ueyikalpan.

⁴⁰ Ijkuak okiskej ipan on cárcel, yejuamej oyajkej ichan Lidia. Ijkon tej, Pablo niman Silas okintakej on tokniuan. Niman ijkuak Pablo niman Silas yoteyoltlalijkej, oyajkej.