Hechos 15 - El Nuevo Testamento

On ueuetkej tlayekankej intech on tokniuan onosentlalijkej ne Jerusalén

¹ Ipan on tonaltin sekimej tlakamej oualejkej Judea, oyajkej hasta Antioquía niman kinmachtiayaj on tokniuan ika tla xkiseliskej on neskayotl itoka circuncisión ipan innakayo ijkon ken Moisés okinnauatij on hebreos*, xueliskej makisaskej.

² Pablo niman Bernabé sanoyej* onotenkuikuikej inuan on tlakamej de on circuncisión*. Kemaj on tlaneltokakej okinemilijkej kintitlaniskej Pablo niman Bernabé inuan oksekimej tlaneltokakej yejuan ompa nemiyaj para oyajkej Jerusalén niman okinnotsatoj on apóstoles* niman on ueuetkej tlayekankej itech tokniuan. Ijkon tej, nochimej kimatiskej katlejua temachtijli yejuan melauak más kuajli.

³ On tlaneltokakej okintitlankej niman chika panouayaj ipan inregión Fenicia niman Samaria, kitetlajtlajtouiliayaj kenijki on yejuan xhebreos* okipatlakej innemilis niman aman kitlakamatij Dios. Niman nochimej on tokniuan pakiyaj yejua ika in tlen kinmijliayaj.

⁴ Ijkuak Pablo niman Bernabé oajsikej Jerusalén, okinselijkej on tlaneltokakej, on apóstoles* niman on uejuetekej tlayekankej itech tokniuan. Kemaj yejuamej okitetlajtlajtouilijkej nochi on tlajtlamach* tlen Dios okichiu intechkopa yejuamej.

⁵ Pero sekimej tlaneltokakej yejuan nopouaj intech on fariseos*, ouajnotelketskej niman okijtojkej: —On yejuan xhebreos* yejuan tlaneltokaj ika onkaj kiseliskej on neskayotl itoka circuncisión ipan innakayo, niman nonauatiskej ma kitlakamatikan itlanauatil Moisés.

⁶ Kemaj onosentlalijkej on apóstoles* niman on ueuetkej tlayekankej itech tokniuan para kimatiskej tlinon kichiuaskej ika on tlen nochijtikaj.

⁷ Niman ijkuak sanoyej yonotenkuikuikej, ouajnotelkets Pedro niman okijtoj: —Nokniuan, nemejuamej nenkimatstokej ika ye uejkaui Dios onechtlapejpenij nemotsajlan para nikimijlis on yejuan xhebreos* on kuajli tlajtojli yejuan kiteijlia ken Dios temakixtia para yejuamej no ma tlaneltokakan.

⁸ Niman Dios yejuan nochi tlakatl kixmati ipan iyojlo, otechpantlantilij ika no kinselia ijkuak okititlan impan on iEspíritu Santo ijkon ken tejuamej otechajtitlanilij.

⁹ Niman Dios xakaj okichikouij touan yejuan tihebreos* niman yejuamej yejuan xhebreos*, yej no okinyolchipau pampa otlaneltokakej.

¹⁰ Aman tej, ¿tline* nenkitlatlataj Dios ika nenkintlaliliaj in tlaneltokakej sen tlamamajli yejuan nion tejuamej, nion toachtojtajuan xtiuelij tikiktij?

¹¹ Yej tikneltokaj ika yotimakiskej ikan iueyitetlajsojtlalis* toTEKO Jesús yejuan xtechtocarouaya tikseliskej no ijki ken yejuamej.

¹² Kemaj nochimej xok onauatkej, niman san tlakakiyaj chika Bernabé niman Pablo kitemachistiayaj de on tlamauisoltin niman milagros* yejuan Dios okichiu intechkopa yejuamej intsajlan on yejuan xhebreos*.

¹³ Ijkuak otlankej tlajtouaj, Santiago okijtoj: —Nokniuan, xnechkakikan:

¹⁴ Simón Pedro yotechtlajtlajtouilij kenijki Dios okinmiknelij kemach ye ika on yejuan xhebreos, niman okinselij sekimej ken ikoneuan.

¹⁵ In kuajli nesi ika onocumpliroj on tlen okijkuilojkaj on tiotlajtojkej. Yejuamej ijkin okijkuilojkaj ipan on Yektlajkuilojli:

¹⁶ “Ijkuak yopanok in tlajtlamach*, oksejpa niuajlas niman nikuektlalis ikal David kampa xoxotontikaj. Ijkon ken sen tlakatl oksejpa kichijchiua ikal ijkuak tlaxixini, nejua no nikchiuas para on hebreos* ma kipiyakan sen rey,

¹⁷ para nochimej oksekimej tlaltikpaktlakamej ma kitejtemokan toTEKO niman on yejuan xhebreos* yejuan kiteneuaj notokatsin.

¹⁸ Ijkon kijtoua toTEKO yejuan okitemachistij in tlajtlamach* desde yeuejkaui.”

¹⁹ ’Yejua ika tej, nikijtoua ika xkuajli para tikimpajsoloskej on yejuan xhebreos* yejuan kajkauaj on inachtojtlaneltok para kitlakamatij Dios.

²⁰ Yej, san ma tikintlajkuiluikan para maka kikuaskej nakatl yejuan kiuentlaliliaj on idolos, maka yakaj auilnemis, maka kuaskej innakayo on yolkej yejuan san kechmikij, niman no maka kuaskej yestli.

²¹ Ijkon tej, ma tikinmijlikan pampa ye uejkaui hasta aman ye tikmatstokej ika ijki ipan cada kalpan nemij on yejuan kitekakistiliaj itlanauatil Moisés, niman nemij on yejuan kinomachtiaj cada sábado ipan insinagoga* on hebreos*.

²² Kemaj on apóstoles* niman on ueuetkej tlayekankej intech tokniuan, iuan nochi on tlaneltokakej ipan on tiopan, okinemilijkej ika kuajli yes para kintlapejpeniskej sekimej tlakamej intech niman kintitlaniskej ne Antioquía iuan Pablo niman Bernabé. In yejuamej okintlapejpenijkej: Judas, yejuan no itoka katka Barsabás, niman Silas. Yejuamej in omemej tlakamej ueyixtikatkaj intsajlan on tokniuan.

²³ Niman okinmakakej para okiktikej in tlajkuilolamatl: Tejuamej apóstoles*, niman ueuetkej tlayekankej yejuan nemokniuan, temechontlajpalouaj nemochimej* tokniuan yejuan xnenhebreos* yejuan nenchantij Antioquía, niman yejuan nenchantij ipan iueyitlalpan Siria niman Cilicia.

²⁴ Tikakij ika totsajlan okiskej sekimej tlakamej yejuan xikan totlanauatil oyajkej niman yomechnojnotsatoj. Yejuamej mechpajsolouaj ikan intlajtol* niman yomechtlamachilispolojkej, pampa omechijlijtoj ika noneki nenkiseliskej on neskayotl itoka circuncisión ipan nemonakayo niman noneki nenkitlakamatiskej itlanauatil Moisés.

²⁵ Yejua ika, san sekan otitlanemilijkej ika kuajli para tikintlapejpeniskej sekimej tlakamej yejuan totsajlan kisaj para mechontaskej. Yejuamej yaskej san sekan inuan in totlajsojkaikniuan Bernabé niman Pablo

²⁶ yejuan yokitlalijkej innemilis hasta mikiskej san ipampa toTEKO JesuCristo.

²⁷ Ijkon tej, tikintitlanij Judas niman Silas yejuan no mechmachistiskej de in tlen temechtlajkuiluiyaj.

²⁸ On Espíritu Santo niman tejuamej otiknemilijkej ika kuajli yes para xitlaj* okse más tlamamajli temechmakaskej, yej san in tlajtlamach* tlen más noneki nenkimatiskej:

²⁹ maka xkuakan innakayo on yolkej yejuan yokuentlalijkaj intech on ídolos; no ijki maka xkuakan yestli nion innakayo on yolkej yejuan san nokechmiktiaj, niman maka yakaj auilnemis. Tla nenkitlakamatiskej in, kuajli nenkichiuaskej. Kuajli xnemikan.

³⁰ Kemaj yejuamej on yejuan okintitlankej oajsikej Antioquía, niman ijkuak yokinsentlalijkej on tlaneltokakej, okinmakakej on tlajkuilolamatl.

³¹ Niman ijkuak on tokniuan okinomachtijkej* on tlajkuilolamatl, sanoyej opakkej ipampa on yoltlalilistli yejuan okiselijkej.

³² Kemaj Judas niman Silas yejuan no tiotlajtojkej katkaj, sanoyej okinyolejkej niman okinyolchikajkej on tokniuan ikan miyek tlajtojli.

³³ Niman ijkuak ompa yonenkej kanaj keski tonajli, on tokniuan de Antioquía iminuan ononauatijkej. Okinnekilijkej ikan yolseuilistli ma nokuepakan kuajli intech on yejuan okintitlankej.

³⁴ Pero Silas okinek para nokauas ne Antioquía.

³⁵ Pablo niman Bernabé no onokajkej ompa ne Antioquía, niman inuan miyekej oksekimej temachtiayaj niman kiteijliayaj itlajtol toTEKO.

Pablo niman Bernabé onoxelojkej

³⁶ Ipan keski tonajli sakin*, Pablo okijlij Bernabé: —Ma tiuiyan oksejpa para tikominnotsaskej on tokniuan, niman tikintaskej kenijki nemij yejuan chantij nochiuiyan ipan on kalpanmej niman ueyikalpanmej kampa otikteijlijkej itlajtol toTEKO.

³⁷ Bernabé kinekiya ma kuikakan Juan, yejuan no itoka Marcos.

³⁸ Pero Pablo kinemiliaya xkuajli para kuikaskej pampa ne Panfilia onoxelojka intech niman xoyaj inuan ipan on tekitl.

³⁹ San ipampa Marcos onokamauijsokkej, niman yejua ika onoxelojkej. Bernabé okuikak Marcos niman okajsikej sen barco para oyajkej Chipre.

⁴⁰ Niman Pablo okitlapejpenij Silas. Kemaj on tokniuan okintemaktilijkej ipan itetlajsojtlalis* toTEKO, niman Pablo iuan Silas oyajkej.

⁴¹ Yejuamej opanokej Siria niman Cilicia, niman ompaka kinyolejtiayaj on yejuan tlaneltokaj.