Hechos 14 - El Nuevo Testamento

Pablo niman Bernabé nemiyaj ipan on ueyikalpan itoka Iconio

¹ Ipan on ueyikalpan Iconio Pablo niman Bernabé san sekan okalakkej ipan insinagoga* on hebreos* niman kualtsin okinnojnotskej. Ijkon tej, miyekej otlaneltokakej, on hebreos* niman on yejuan xhebreos*.

² Pero on hebreos* yejuan xkinekiyaj tlaneltokaskej okimajkomankej niman tlamach* okinmijlijkej on yejuan xhebreos* para ma kualanikan intechkopa on tokniuan.

³ Pero Pablo niman Bernabé onokajkej miyek tonaltin niman otlajtojkej ikan yolchikaualistli. Niman kitlaliayaj inyojlo itech toTEKO. Niman toTEKO kinmakaya ipoder para ma kichiuakan tlamauisoltin niman milagros. Ijkon tej, kiteititiayaj ika melauak on tlen kitouayaj ika itetlajsojtlalis* Dios.

⁴ Pero on chanejkej ipan on ueyikalpan tlajkoxelijtikatkaj. Sekimej nopouayaj inuan on hebreos* niman sekimej inuan on apóstoles*.

⁵ Kemaj on hebreos* niman on xhebreos* onotlajtolmakakej inuan on tekiuajkej para kinuijuikaltiskej niman kintemojmotlaskej on apóstoles*.

⁶ Pero ijkuak Pablo niman Bernabé okimatkej tlinon kinchiuiliskej, ocholojtejkej niman oyajkej ne ipan on ueyitlalpan de Listra niman Derbe yejuan onkaj ipan Licaonia. Niman no kistinemiyaj imanian ompaka.

⁷ Niman ompa kiteijliayaj on kuajli tlajtojli yejuan kiteijlia ken Dios temakixtia.

Pablo okitemojmotlakej ne Listra

⁸ Ipan on kalpan Listra yeuatikatka sen tlakatl yejuan xueliya nejnemiya pampa ikxiuan xkojtikej katka desde ijkuak otlakat. Xkaman ouel onejnen.

⁹ On uilatsin kaktikatka tlinon kijtouaya Pablo. Kemaj Pablo okixkechij niman okitak ika on uilatsin kineltokaya ika Dios uelis kipajtis.

¹⁰ Kemaj Pablo okijlij ikan chikauak tlajtojli: —Xmokuiteua niman xmomelajkatelketsa. Kemaj on koxo otsikuin niman opeu nejnemi.

¹¹ Ijkuak on chanejkej okitakej on tlen Pablo okichiu, opeu tsajtsij ikan intlajtol* Licaonia, kijtouayaj: —¡On dioses yonopanextijkej ken tlakamej niman yotemokej totsajlan!

¹² Kijtouayaj ika Bernabé yejua dios Júpiter, niman Pablo yejua dios Mercurio, pampa yejua más tlajtlajtouaya.

¹³ Itiopan Júpiter onkatka ne ixpan on ueyikalpan. Niman itiopixkau Júpiter okinuajuikak uakaxtin niman xochikoskamej ixpan ikalakiyan on ueyikalpan pampa yejua niman on chanejkej kinekiyaj kinuentlaliliskej on uakaxtin para ijki kinmauistiliskej Pablo niman Bernabé.

¹⁴ Pero ijkuak Bernabé niman Pablo okimatkej, onotlakentetsajtsayankej para okiteititijkej ika on tlakamej kichiuayaj on tlen xkuajli. Kemaj isijkapan onokalaktijkej intsajlan on tojlamej niman tsajtsitiayaj:

¹⁵ —Tlakamej, ¿tline* ijkin nenkichiuaj? Tejuamej san titlakamej no ken nemejuamej. Niman temechijliaj on kuajli tlajtojli yejuan kiteijlia ken Dios temakixtia, para maka sa xchiuakan in tlajtlamach* yejuan xitlaj* ika mechpaleuiya. Yej xmokuepakan itech Dios on yejuan melauak yoltikaj, on akin okichijchiu cielo*, niman in tlaltikpaktli, niman on mar niman nochi tlen impan onkaj.

¹⁶ Yeuejkaui Dios okauilij nochi tlakatl ma kichiua on tlen kinekiya.

¹⁷ Dios nochipa kintitiaya ika nemi ika on tlen kuajli kichiuaya impampa. Yejua kichiua para ma kiaui niman para kuajli ma tlatlaki. Yejua tej, techmaka on tlen tikuaj para kuajli tinemij niman tipakij ikan nochi toyojlo.

¹⁸ Pero maski ijkin okimilijkej on tlakamej, hasta axkan* ouelkej okinteltijkej on tlakamej yejuan kinekiyaj kinuentlaliliskej uakaxtin para ijki kinmauistiliskej.

¹⁹ Kemaj oyejkokej semej hebreos* yejuan ualeuaj Antioquía niman Iconio. Niman yejuamej okinchiualtijkej on tlakamej de Listra para ma kitemojmotlakan Pablo. Kemaj okimojmotlakej, niman ijkuak kuitiayaj ye kuajli yomik, okitejchiuilankej para neka kaltenko.

²⁰ Pero ijkuak okiteyeualotoj on tlaneltokakej, Pablo onotelkets niman oksejpa okalak ipan on kalpan. Niman uajmostla okis iuan Bernabé niman oyajkej ipan on kalpan itoka Derbe.

²¹ Niman ijkuak yokiteijlijkej on kuajli tlajtojli yejuan kiteijlia ken Dios temakixtia ipan on kalpan, miyekej otlaneltokakej. Kemaj yejuamej onokuepkej para oyajkej ipan on kalpan Listra, Iconio niman Antioquía.

²² Ipan on kalpanmej okinyolejtiajkej on tlaneltokakej niman kintlakanonotsayaj para maka kaman kitlalkauiskej intlaneltok. No kinmijliayaj ika para se kalakis kampa Dios tlamandaroua noneki kijyouis miyek tlajtlamach*.

²³ Niman ipan cada tiopan okintlalijkej on ueuetkej tlayekankej intech tokniuan. Niman ijkuak yokichijkej oración niman yonosaukej, okintlatlautijkej itech toTEKO on yejuan itech tlaneltokaj.

Pablo niman Bernabé oyajkej oksejpa para Antioquía

²⁴ Más sakin* opanokej ipan iueyitlalpan Pisidia, niman oajsikej ipan on ueyitlalpan Panfilia.

²⁵ Niman ijkuak yotenojnoskej ika on itlajtol Dios ne ipan on kalpan Perge, otemotoj ne Atalía.

²⁶ Niman ompa onatlalijkej oyajkej para Antioquía on ueyikalpan kampa on tlaneltokakej impampa okitlajtlanilijkej Dios para ma kintiochiua ipan on tekitl yejuan aman yotlankej.

²⁷ Ijkuak oajsikej ompa Antioquía, okinsentlalijkej on tlaneltokakej niman okintlajtlajtouilijkej nochi on tlajtlamach* yejuan Dios okichiu intechkopa, niman kenijki toTEKO okinkauilij on yejuan xhebreos* ma uelikan tlaneltokakan.

²⁸ Niman Pablo iuan Bernabé miyek tonaltin onokajkej ompa inuan on tlaneltokakej.