Hechos 13 - El Nuevo Testamento

Bernabé niman Saulo okiselijkej intekiyo para temachtiskej

¹ Nemiyaj intsajlan on yejuan tlaneltokaj ne Antioquía semej tiotlajtojkej niman temachtijkej. Yejuamej katkaj Bernabé, Simón yejuan no itoka Niger, Lucio on yejuan ualeua Cirene, Manaén yejuan iuan onoskaltij Herodes on yejuan gobernador ne Galilea niman Saulo.

² Se tonajli, ijkuak yejuamej in kitekipanouayaj toTEKO niman nosauayaj, on Espíritu Santo okijtoj: —Xnechinmaxkatikan Bernabé niman Saulo para on tekitl yejuan oniktlapejpenij para kichiuaskej.

³ Kemaj ijkuak yokichijkej oración niman yonosaukej, okitlalijkej inmauan impan yejuamej niman okintitlankej ipan inojui.

Bernabé iuan Saulo otemachtijkej Chipre

⁴ On Espíritu Santo okintitlan Bernabé niman Saulo, niman yejuamej otemotoj ne Seleucia niman ompa onatlalijkej para oyajkej ipan on tlaluaktli itoka Chipre yejuan onkaj itlajkotian mar.

⁵ Ijkuak oajsikej ompa Chipre, okalakkej ipan sen ueyikalpan itoka Salamina. Ompa opejkej kiteijliaj on itlajtoltsin Dios ne ipan insinagogas* on hebreos*, niman Juan, yejuan no itoka Marcos, kimpaleuiyaya.

⁶ Yejuamej okistinenkej imanian on tlaluaktli hasta oajsikkej ne ipan on kalpan itoka Pafos. Ompa okinamikej sen tlakatl hebreo* itoka Barjesús, yejuan nauajli katka. Yejua sen tlakajkayajketl katka pampa kiteijliaya tenojnotsa itechkopa Dios.

⁷ Yejua nouikaya iuan on gobernador Sergio Paulo, sen tlakatl yejuan kipiya kajsikamatilistli. On gobernador otlanauatij ma kinotsatij Bernabé niman Saulo pampa kinekiya kakis on itlajtoltsin Dios.

⁸ Pero on nauajli Barjesús, yejuan no itoka katka Elimas, kimixnamikiya Bernabé niman Saulo. Kinekiya kiyolmajxalos on gobernador para maka tlaneltokas.

⁹ Pero on Espíritu Santo okiyoltemitij Saulo, yejuan no itoka Pablo, niman Pablo opeu kitlajtlata Elimas.

¹⁰ Niman ijkin okijlij: —¡Ueyi tlakajkayajketl niman xompayejyeua! Tejua tiikoneu on diablo* niman tikixnamiki nochi on tlen kuajli. ¿Xkaman tikajkauas ika titepopolojtinemis de on imelajkaojuitsin toTEKO?

¹¹ Aman tej, on toTEKO mitscastigaros ikan ipoder. Tixpajpayatis niman keski tonajli xuelis tikitas on tonaltsintli. Kemaj nimantsin oixpajpayat niman ipan otlayouatiak. Opeu nopapalakachoua niman kitejtemouaya akinon kiktsis ipan ima pampa xok tlachaya.

¹² Ijkuak on gobernador okitak on tlen onochiu, otlaneltokak, niman kipakaitaya on itemachtil toTEKO.

Pablo iuan Bernabé nemiyaj ne Antioquía ipan iueyitlalpan Pisidia

¹³ Pablo niman icompañeros okalakkej ipan barco ne Pafos niman oyajkej ipan on kalpan Perge de Panfilia. Pero Juan okinkau niman onokuep para Jerusalén.

¹⁴ Kemaj okiskej Perge niman oyajkej ipan on kalpan itoka Antioquía de Pisidia. Niman ipan sábado, okalakkej ipan insinagoga* on hebreos* niman onotlalijkej.

¹⁵ Niman ijkuak yakaj yokinomachtij on itlanauatil Moisés niman on intlajkuilolamau on tiotlajtojkej, on uejueyixtokej tlayekankej ipan on sinagoga* otlatitlankej ma kimijlitij Pablo niman icompañeros: —Nokniuan, tla nenkipiyaj itlaj tlajtojli para más nentechyoleuaskej, uelis nenkijtoskej.

¹⁶ Kemaj Pablo ouajnotelkets, niman okintlajtlanilij ikan ima para maka ma nauatikan. Kemaj okijtoj: —Tlakamej hebreos* niman on yejuan xehebreos* niman nochimej on akin nenkitlakaitaj Dios, xkakikan.

¹⁷ IminDios on hebreos* okintlapejpenij toachtojtajuan, niman okinmiyekilij ijkuak chantiyaj ne tetlalpan Egipto. Niman ikan ipoder okinkixtij ompa.

¹⁸ Niman ipan kanaj cuarenta xipan Dios okimijyouilij on ken yejuamej nouikayaj ipan on xalpatlajkan.

¹⁹ Niman on chikome países yejuan onkatkaj ipan on tlajli itoka Canaán okinxoxotonij para okinmakak intlaluan ken inherencia on hebreos*.

²⁰ Más sakin* kanaj ipan 450 xipan, okinyekan on hebreos* intechkopa on jueces, hasta ipan on tonaltin ijkuak onemiko on tiotlajtojketl Samuel.

²¹ Kemaj ijkuakon on tlakamej okitlajtlankej sen rey para yejua kinyekanas, niman Dios okinmakak Saúl ken rey para cuarenta xipan. Saúl ikoneu Quis, kisaya itech on itribu* Benjamín.

²² Más sakin* Dios okixtij Saúl ken rey, niman okalaktij David para rey. Niman ijkin okijtoj itechkopa: “Nejua nikixmati David, ikoneu Isaí. Yejua sen tlakatl yejuan sanoyej nechpaktia niman kichiuas nochi tlen nikneki.”

²³ Niman Dios okinmakak on hebreos* sen temakixtijketl itoka Jesús yejuan teuejkakoneu itech David ken Dios yokitlalijka ipan ipromesa.

²⁴ Ijkuak xe uajlaya Jesús, Juan okinmijlij nochimej on chanejkej Israel ika noneki noyolpatlaskej niman nokuatekiskej.

²⁵ Niman ijkuak Juan ye tlantiaya itekiyo, okijtoj: “¿Ken nenkinemiliaj akin nejua? Xnejua on akin nemejuamej nenkinemiliaj. Pero on yejuan uajlau sakin* de nejua, xnechmelaua* para niktojtomilis ikakuan ipan ikxiuan.”

²⁶ ’Nokniuan, uejkatekoneuan itech Abraham, niman nemejuamej yejuan xnenhebreos* yejuan nenkitlakaitaj Dios, in kuajli tlajtojli yejuan kitemaka temakixtilistli omechajtitlanilijkej nemejuamej.

²⁷ On chanejkej Jerusalén niman intlayekankauan xkimatiyaj akinon katka Jesús, nion xkajsikamatiyaj on tlen kinomachtiayaj ipan inamauan on tiotlajtojkej ipan sábados. Pero sano yejuamej inpan onocumpliroj intlajtol* on tiotlajtojkej ijkuak okimiktijkej Jesús.

²⁸ Niman maski xokinextilijkej itlaj xkuajli okichiu para uelis kimiktiskej, yejuamej okitlajtlanilijkej Pilato para ma tlanauati ma kimiktikan.

²⁹ Kemaj ijkuak yokichiuilijkej nochi on tlajtlamach* ijkon ken on Yektlajkuilojli kijtoua ika ipan nochiuas, okitemoltijkej ipan on kojnepanojli* niman okitokakej ipan sen tlalkontli.

³⁰ Pero Dios okiyoliuitij* niman okuiteu ipan itlalkon.

³¹ Niman kemaj miyek tonajli okinnotitijtinen on yejuan iuan okiskej de Galilea para Jerusalén. Niman aman yejuamej kimpanextiliaj on hebreos* itechkopa Jesús.

³² ’Niman aman tejuamej no temechmachistiaj on kuajli tlajtojli de on tlen Dios okitlalij ipan ipromesa para on toachtojtajuan.

³³ Aman yocumpliroj ipromesa para tejuamej yejuan tiinuejkakoneuan. In onochiu ijkuak okiyoliuitij* niman okuiteu Jesús ne ipan itlalkon. Ijkon onochiu ken tlajkuilolnestikaj ipan on ika ome salmo: “Tejua tinoKoneu niman aman on tlakamej kimatiskej ika tejua tinoKoneu.”

³⁴ Niman Dios ijkin okijtoj ika kikuiteuas intech on mikatsitsimej para xok kaman ijtlakauis itlalnakayo. Uelis nenkitaskej ipan in Yektlajkuilojli yejuan kijtoua: “Nemejuamej nemechmakas on melauak niman yektlatiochiualistli yejuan onikprometerouilij David.”

³⁵ Niman no kijtoua ipan okse salmo: “Xtikauilis para ma ijtlakaui itlalnakayo moyekTekitkau.”

³⁶ Ika tlen melauak, David ipan on tonaltin ijkuak nemiya niman ijkuak yokintekipanoj ichanejkauan ken Dios kinekiya, yejua omik. Niman kemaj okauatoj ne kampa toktokej itajuan niman opalan itlalnakayo.

³⁷ Pero itlalnakayo on yejuan Dios okiyoliuitij* niman okuiteu xopalan.

³⁸ Xmatstiakan tej, nokniuan, ika san itechkopa Jesús ueli temechmachistiaj ken Dios mechtlapojpoluilia nemotlajtlakol.

³⁹ Niman de nochi on tlajtlamach* yejuan ika itlanauatil Moisés xouel omechtlapojpoluijkej, itechkopa Jesús, nochimej yejuan kineltokaj, Dios kijtoua ika nochi intlajtlakoluan yokimpopoloj.

⁴⁰ Xmotakan sano nemejuamej. Maka tej, nemopan nochiuas on tlen okijkuilojkej on tiotlajtojkej ijkuak ijkin okijtojkej:

⁴¹ Xkitakan tepijpinauijkej. Xmojkatlachakan niman xmopolokan, pampa nejua yejuan niDios, nikchiuas ipan in tonaltin chika nennemij sen tekitl sanoyej ueyi yejuan xnenkineltokaskej maski yakaj mechtlajtlajtouilis.

⁴² Ijkuak Pablo niman icompañeros okiskej ipan insinagoga* on hebreos*, on yejuan xhebreos* sanoyej okintlajtlanilijkej para oksejpa ma kinnojnotsakan ika in tlajtlamach* tlajtojli ipan okse sábado.

⁴³ Niman ijkuak yotlankej nomachtiaj ipan on sinagoga, miyekej hebreos* niman on yejuan xhebreos* yejuan okiselijkej intlaneltok on hebreos*, oyajkej iuan Pablo niman Bernabé. Niman yejuamej kintlakanonotsayaj on tlakamej ma nemikan melajki ipan itetlajsojtlalis* Dios.

⁴⁴ Niman ipan on okse sábado onosentlalijkej sa ken nochimej on chanejkej para kakiskej on itlajtoltsin Dios.

⁴⁵ Ijkuak on hebreos* okitakej on tojlamej, sanoyej onexikolmikkej. Kemaj opeu kitlajtolixnamikij Pablo niman kuijuikaltiayaj.

⁴⁶ Kemaj Pablo niman Bernabé onixkojtilijkej, niman okinmijlijkej: —Ijki nonekiya para achtopa nemejuamej yejuan nenhebreos* temechmakaskej itlajtoltsin Dios. Pero aman pampa xnenkinekij nenkiseliskej, niman pampa nenkuitiaj xmechmelaua* on nemilistli yejuan para nochipa, temechtlalkauiskej niman yej tiaskej intech on yejuan xhebreos*.

⁴⁷ Ijkin tikchiuaskej pampa ijki otechnauatij toTEKO: Onimitstlalij para tiktepannextilis intech on yejuan xhebreos*, niman para tejua tikiktis in temakixtijli imanian in tlaltikpaktli.

⁴⁸ Niman ijkuak yejuamej on yejuan xhebreos okakkej on tlajtojli, opakkej niman opejkej kijtouaj ika on itlajtoltsin toTEKO sanoyej kuajli. Niman otlaneltokakej nochimej on yejuan Dios okintlapejpenij para kipiyaskej nemilistli para nochipa.

⁴⁹ Niman itlajtoltsin toTEKO nochayauaya imanian nochi on región.

⁵⁰ Pero on hebreos* okimajkomankej on siuamej yejuan kitlakaitaj Dios niman yejuan uejueyixtokej niman on tlakamej yejuan uejueyixtokej de on ueyikalpan. Kemaj opeu kintlauelitaj niman kintlayouiltiaj Pablo niman Bernabé hasta kaman okintotokakej de on región.

⁵¹ Kemaj on apóstoles* okitsejtselojkej imikxiuan para okixinijkej on tlalteutli. Ijkon okichijkej para okintitijkej ika Dios xkinselis, yej kintlajtlakolmakas. Kemaj oyajkej ipan on ueyikalpan itoka Iconio.

⁵² Pero on tlaneltokakej sanoyej pakiyaj niman on Espíritu Santo nochimej okinyoltemitij.