Hechos 12 - El Nuevo Testamento

On rey Herodes okimiktij Santiago niman okitsakukej Pedro

¹ Ipan in tiempo on rey Herodes opeu kintlauelita niman kintlajyouiltia sekimej yejuan tlaneltokaj itech toTEKO.

² Niman Herodes otlanauatij ma kimiktikan ikan espada Santiago, ikniu Juan.

³ Niman ika okitak on hebreos* okuelitakej on tlen okichiu, no okajsik niman okitsaku Pedro. In onochiu ipan on iluitl ijkuak nokua on pan yejuan xkipiya tlaxokolilistli*.

⁴ Sakin ijkuak yokajsikej Pedro, okalaktijkej ipan cárcel kampa okitemaktilijkej itech naui grupo de soldados niman cada grupo kipiyaya naui soldado. Herodes kinemiliaya kixtis inmixpan on chanejkej para kiyolkuitis ijkuak yopanok on iluitl Pascua*.

⁵ Ijkon tej, Pedro nemiya ne ipan cárcel, pero on tlaneltokakej ipampa noueyikatsajtsiliayaj itech Dios ikan nochi inyojlo.

Dios okixtij Pedro ipan cárcel

⁶ Ipan on tlayoua, ijkuak uajmostla Herodes kinekiya kixtis Pedro inmixpan on chanejkej, Pedro kochtikatka intsajlan omemej soldados. Yejua salijtikatka ikan ome teposcadena, niman on oksekimej soldados tlacuidarouayaj ipan on carcejkiauatenko.

⁷ San amanamantsin sen ángel yejuan toTEKO okuajtitlan ouajnonextij, niman on cárcel oten ikan tlauijli. Kemaj on ángel okuiuixoto Pedro inakastlan, niman okitlachaltij. Kemaj okijlij: —Xmokuiteua nimantsin. Kemaj on teposcadenas oxixinkej de ipan imauan Pedro.

⁸ Niman on ángel okijlij: —Xmotlakenti niman xkintlali mokakuan. Ijkuak Pedro yokichiu, on ángel okijlij: —Xtlali motlaken ueyak niman xnechajkuitlapanui.

⁹ Pedro okikuitlapanuij on ángel, niman xkimatiya tla melauak noso ka on tlen kichiuaya on ángel. Yejua kinemiliaya ika kitstikatka sen tlatlachalistli yejuan ken itemikpan.

¹⁰ Okimpanauijkej on achtoj tlajpixkej, kemaj kej on ika okan tlajpixkej. Niman ijkuak oajsikej itech on tepostsakuijlotl yejuan onkaj ipan calle, on tepostsakuijlotl san iselti otlapou. Kemaj okiskej, niman ijkuak yokipanauijkej se calle, on ángel nimantsin okitlalkauij.

¹¹ Kemaj tej, Pedro okimat on tlen onochiu, niman okijtoj: —Aman nikajsikamati ika melauak toTEKO okuajtitlan iángel para onechmanauiko itech ipoder Herodes niman itech nochi tlen on hebreos* kinemiliayaj nechchiuiliskej.

¹² Niman ijkuak in okajsikamat, oyaj ichan María yejuan inanaj Juan. (Juan no itoka katka Marcos.) Ompa miyekej on tlaneltokakej san sekan nemiyaj noueyikatsajtsilijtikatkaj.

¹³ Niman ijkuak Pedro okonteteloj on tsakuijlotl* de on kiauak, se ichpochtli itoka Rode oyaj para kitas akinon.

¹⁴ Niman ijkuak okitenkak ika Pedro, sanoyej* opak. Yejua ika xokitlatlapouilij, yej onotlaloj ne kalijtik niman okiteijlito ika Pedro nemi ne kiauatenko.

¹⁵ Niman okijlijkej: —¡Tejua yej tiloca! Pero yejua kiteijliaya ika melauak. Niman yejuamej kijtouayaj: —On xejua Pedro. Kas yej san iángel.

¹⁶ Chika ijkuakon Pedro sanken* kitetelouaya on tsakuijlotl. Niman ijkuak otlatlapojkej niman okitakej ika yejua, sanoyej okintlatlachaltij.

¹⁷ Kemaj yejua okintlajtlanilij ikan ima para maka ma nauatikan niman kemaj okintlajtlajtouilij kenijki toTEKO okixtij ipan cárcel. No ijki okinmijlij: —In ken nopan onochiu xkinmachistikan tokniu Santiago niman on oksekimej tokniuan. Kemaj okis niman oyaj ne ika oksekan.

¹⁸ Ompa ipan carcel, ijkuak otlanes, sanoyej onajkomankej on soldados pampa xkimatiyaj tlinon onochiu iuan Pedro.

¹⁹ Herodes otlanauatij ma kitejtemotij, pero xouel okinextijkej. Yejua ika okinyolkuitij on soldados niman kemaj otlanauatij ma kinmiktikan. Kemaj Herodes okis ompa Judea niman oyaj para Cesarea kampa onokau keski tonajli.

Herodes omik

²⁰ Herodes kualaniya intechkopa on tlakamej yejuan chantiyaj ipan inuejtlalpan Tiro niman Sidón. Yejua ika, on chanejkej Tiro niman Sidón okipixkej san se tlajtojli, niman oyajkej itech Herodes. Pero achtoj okinoamigojtijkej niman okitlakejkej sen tlakatl itoka Blasto yejuan ueyi tlayekanki katka ichan on rey Herodes. Kemaj oyajkej itech Herodes niman okitlajtlanilijkej maka sa ma kintlauelita. Ijkin okitlajtlanilijkej, pampa yejuamej kiseliayaj tlakuajli yejuan kisaya ipan ipaís on rey.

²¹ Kemaj Herodes okitlalij se tonajli para tlajtos inuan on chanejkej ne Tiro niman Sidón. Niman kemaj ipan on tonajli onotlakentij ika on tlakentli* yejuan kintlaliaj on reyes. Kemaj ouajnotlalito ipan itrono kampa tekiuajti niman okinnots on tlakamej ikan se kualtsin tenojnotsalistli.

²² Kemaj on tlakamej opejkej tsajtsij: —¡In yejuan tlajtoua xsan yakaj tlakatl, yej sen dios!

²³ Herodes okiselij inyekteneualis on tlakamej ken Dios yeskia. Yejua ika, nimantsin se ángel yejuan toTEKO okuajtitlan ocastigaroj ikan okuilimej niman opeu kikuaj hasta ijki omik, pampa yejua xokueyilij Dios.

²⁴ Pero on itlajtoltsin toTEKO nochayajtiaya niman noteijliaya nochiuiyan.

²⁵ Ijkuak Bernabé niman Saulo otlankej intekiu ne Jerusalén, ouajnokuepkej. Niman no okuajuikakej Juan yejuan no itoka Marcos.