Hechos 11 - El Nuevo Testamento

Pedro okinmachistij on tlaneltokakej de Jerusalén on tlen onochiu intech on yejuan xhebreos*

¹ On apóstoles* niman on tokniuan yejuan nemiyaj imanian Judea okakkej ika on yejuan xhebreos* no yokiselijkej itlajtoltsin Dios.

² Niman ijkuak Pedro onokuep Jerusalén, on tlaneltokakej hebreos* yejuan kejeuayaj on circuncisión* tlamach okijlijkej.

³ Yejuamej okijlijkej: —¿Tline* otikalak inchan on tlakamej yejuan xhebreos* yejuan xokiselijkej on neskayotl de circuncisión, niman otitlakuaj inuan?

⁴ Kemaj, Pedro okintlajtlajtouilij desde ijkuak opeu nochi tlen ipan onochiu, niman okinmijlij:

⁵ —Nejua ninemiya ipan on ueyikalpan Jope. Niman ijkuak nikchiuaya nooración, onikitak sen tlatlachalistli ken notemikpan. Onikitak ken itlaj ueyi manta istak yejuan uajtemouaya. Uajsasalijtiaya ipan inaukan esquina niman yejkotoya hasta kampa nejua ninemiya.

⁶ Ijkuak onikchiu para kuajli nikitas tlinon uajlau ijtik, onikitak on yolkej yejuan najnaui imikxi, niman on kech yolkej yejuan notilanaj ipan tlajli niman on kech totomej yejuan patlanij.

⁷ Kemaj onikak sen tlajtojli yejuan onechijlij: “Xmotelketsa, Pedro. Xtlamikti niman xtlakua.”

⁸ Pero onikijtoj: “Ka, noTEKO, pampa nejua xkaman nikua itlaj tlen xchipauak yejuan itlanauatil Moisés xtechkauilia tikuaskej.”

⁹ Kemaj, on tlajtojli de iluikak onechajnankilij ika okpa: “Tlen Dios okichipau, maka xkijto ika xchipauak.”

¹⁰ In onochiu yexpa, niman kemaj nimantsin on ueyi manta istak oksejpa otlejkok.

¹¹ Kemaj nimantsin oyejkokej yeyimej tlakamej ipan on kajli kampa ninemiya. Okinuajtitlankej de on ueyikalpan Cesarea.

¹² Niman on Espíritu Santo onechijlij ma niuiya inuan niman maka itlaj ika ma niometlamati. Niman no nouan oyajkej chikuasemej tokniuan. Niman ijkuak otejkokej, otikalakkej ichan on tlakatl yejuan kinekiya nechnotsas.

¹³ Yejua otechtlajtlajtouilij kenijki okitak sen ángel yejuan ijkatikatka ne ichan, niman okijlij: “Xkintitlani Jope tlakamej para ma kuajuikakan sen tlakatl itoka Simón, yejuan no itoka Pedro.

¹⁴ Yejua mitsijlis on kuajli tlajtojli yejuan mitsmakas temakixtilistli iuan nochi mofamilia.”

¹⁵ Niman ijkuak opeu nikinnojnotsa, on Espíritu Santo impan ouajlaj ijkon ken topan ouajlaj ijkuak kemach yeika topan oyejkok.

¹⁶ Ijkuak in onochiu, onikelnamik on tlen okijtoj toTEKO. Ijkin okijtoj: “On melauak ika Juan otlakuatekij ikan atl, pero nemejuamej mechkuatekiskej ikan Espíritu Santo.”

¹⁷ Ijkon tej, tla aman yejuamej Dios no okinmakak on tetlayokolijli* yejuan tejuamej otechmakak ijkuak otikneltokakej toTEKO JesuCristo, ¿akin nejua para nikixnamikis Dios?

¹⁸ Ijkuak nochimej on tlaneltokakej hebreos* ne Jerusalén yokakkej on tlajtlamach*, xok itlaj okijtouilijkej Pedro, yej okiyektenejkej Dios, niman okijtojkej: —Tla ijkon, Dios no yokinkauilij on yejuan xhebreos* ma noyolpatlakan, niman ijkon kipiyaskej yenkuik nemilistli para nochipa.

Nemiyaj tlaneltokakej ipan on ueyikalpan itoka Antioquía

¹⁹ On tlaneltokakej yejuan ochojcholojkej ipampa on xkuajkualtin tlakamej yejuan okimiktijkej Esteban, oyajkej hasta neka Fenicia, Chipre, niman ipan on ueyikalpan Antioquía. Ompaka, kiteijlijtiayaj itlajtoltsin Dios, pero san kinmijliayaj on hebreos*.

²⁰ Pero sekimej tlaneltokakej yejuan ualeuaj Chipre niman Cirene okalakej Antioquía kampa okinnojnotskej on yejuan xhebreos*. Okintlajtlajtouilijkej on kuajli tlajtojli itechkopa toTEKO Jesús.

²¹ On ipoder toTEKO kimpaleuiyaya. Yejua ika miyekej otlaneltokakej niman onoyolpatlakej itech ika toTEKO.

²² Ijkuak on tlaneltokakej ipan on tiopan de Jerusalén okimatkej in tlajtlamach*, yejuamej okititlankej Bernabé hasta Antioquía.

²³ Ijkuak oajsik niman okitak kenijki Dios yokintiochiu, sanoyej* opak. Kemaj yejua okintlakanonots on tlaneltokakej para nochipa ma tlaneltokatiakan itech toTEKO niman ma kitokatiakan ikan nochi inyojlo.

²⁴ Bernabé sen kuajli tlakatl katka, yejuan on Espíritu Santo kiyoltemitiaya. No ijki okipix sanoyej ueyi itlaneltok. Niman on yejuan tlaneltokayaj itech toTEKO más omiyekiyakej.

²⁵ Ijkuak ijkin yopanok, Bernabé oyaj on ueyi kalpan itoka Tarso para okitejtemoto Saulo, niman ijkuak okinextij, okuikak ne Antioquía.

²⁶ Niman ompa onokajkej inuan on tlaneltokakej ken kanaj se xipan, niman okinmachtijkej sanoyej miyekej. Ompa Antioquía on tlaneltokakej kemach ye ika okintokayotijkej cristianos.

²⁷ Ipan on tonaltin sekimej tiotlajtojkej ouajtemokej de Jerusalén niman oyajkej para Antioquía.

²⁸ Niman ouajnotelkets sen tiotlajtojketl itoka Agabo, niman okitemachistij itechkopa on Espíritu Santo ika onyas chikauak mayantli imanian in tlaltikpaktli. Niman yejua in onochiu ijkuak Claudio ueyi tekiuaj katka Roma.

²⁹ Kemaj, on nomachtijkej* cada se okitlalij ipan iyojlo para tlapaleuis san kech uelis niman kintitlaniliskej on tokniuan yejuan chantij Judea.

³⁰ Niman ijkon okichijkej. Okintitlankej Bernabé niman Saulo para okauatoj on intetlayokolil intech on ueuetkej tlayekankej ipan on tiopan ne Jerusalén.