Hechos 10 - El Nuevo Testamento

Pedro oyaj ichan Cornelio

¹ Nemiya ipan on ueyikalpan Cesarea sen tlakatl itoka Cornelio. On tlakatl tlayekanki katka ika se ciento soldados, niman on se ciento soldados notokayotiaya Italiano.

² Cornelio kitlakaitaya Dios niman san sekan iuan nochi ifamilia kimauistiliayaj Dios ikan nochi inyojlo. No kitemakaya miyek tomin para kimpaleuiyaya on hebreos* mayankej, niman nochipa okichiuaya oración itech Dios.

³ Se tonajli, kanaj ipan yeyi hora ika tiotlak, okitak sen tlatlachalistli ken itemikpan, sen ángel yejuan Dios okuajtitlan. On ángel okijlij: —¡Cornelio!

⁴ Cornelio okimojkaitak on ángel, niman okitlajtoltij: —¿Tlinon Señor? Niman on ángel okijlij: —Dios yokinkak mooraciones niman okitak on tlen tiktetlayokolia para tikimpaleuiyaj on yejuan mayankej. Ijkon tej, yomitselnamik.

⁵ Aman tej, xkintitlani tlakamej ipan on ueyikalpan Jope para ma kuajuikakan sen tlakatl itoka Simón, yejuan no san kixmatij Pedro.

⁶ Niman yejua mitsijlis tlinon tikchiuas. Yejua chanti iuan okse tlakatl itoka Simón yejuan kuetlaxinketl. Ichan on kuetlaxinketl onkaj nisiu itech on mar.

⁷ Ijkuak oyaj on ángel yejuan iuan tlajtouaya, Cornelio okinnots omemej itlakeualuan. Niman no okinots sen soldado yejuan no kuajli kitlakaitaya Dios.

⁸ Nochi okintlajtlajtouilij tlen onochiu, niman kemaj okintitlan para Jope.

⁹ Niman uajmostla, chika yejuamej yajtiayaj ipan ojtli niman sa nisiu para ajsiskej Jope, Pedro otlejkok ikuapan on kajli kanaj tlakualispan, para okichiuato oración.

¹⁰ Yejua sanoyej* apismikiya niman okinek tlakuas. Pero chika kichijchiuiliayaj tlen kikuas, okitak sen tlatlachalistli ken itemikpan.

¹¹ Okitak on cielo tlapouiya niman uajtemotiaya ipan tlajli sen ueyi manta istak, uajsasalijtiaya ipan nochi inaui esquina.

¹² Ipan on ueyi manta uajlayaj nochi sesentlamantikej yolkej yejuan najnaui imikxiuan, niman on kech yolkej yejuan notilanaj ipan tlajli niman on kech totomej yejuan patlanij.

¹³ Kemaj okak sen tlajtojli yejuan okijlij: —Pedro, xmotelketsa. Xtlamikti niman xtlakua.

¹⁴ Pero Pedro okijlij: —Ka, noTEKO, pampa nejua xkaman nikua itlaj on tlen xchipauak yejuan itlanauatil Moisés xtechkauilia tikuaskej.

¹⁵ Kemaj, on tlajtojli oksejpa okinots, niman okijlij: —Tlen Dios okichipau, maka xkijto ika xchipauak.

¹⁶ Yejua in onochiu yexpa, niman kemaj nimantsin on ueyi manta istak oksejpa otlejkok.

¹⁷ Chika Pedro tlanemilijtikatka niman sa komatstikatka tlinon kijtosneki on tlatlachalistli yejuan okitak ken itemikpan, on tlakamej yejuan okinuajtitlan Cornelio, tlajtlantiayaj kanon ichan Simón. Kemaj oajsikej ne ikiauatenko.

¹⁸ Niman ontsajtsikej okitetlajtoltijkej tla ompa ipan on kajli nemi Simón, yejuan no itoka Pedro.

¹⁹ Niman chika Pedro sanken* kinemilijtikatka tlinon kijtosneki on tlen okitak, on Espíritu Santo okijlij: —Xkita. Mitstejtemouaj yeyimej tlakamej.

²⁰ Xmotelketsa, xtemoti niman maka xometlamati, yej inuan xuiya, pampa nejua onikinuajtitlan.

²¹ Kemaj Pedro otemoto kampa nemiyaj on tlakamej yejuan Cornelio okinuajtitlan, niman okinmijlij: —On akin nenkitejtemouaj, nejua. ¿Tline* onenualajkej?

²² Yejuamej okijlijkej: —Se tlakatl itoka Cornelio, yejuan tlayekanketl ika se ciento soldados, otechajtitlan. In tlakatl yolmelajki niman kitlakaita Dios. Nochi kech hebreos* kitlakaitaj in tlakatl. Sen iángel Dios okijlij para ma mitsajtekuitlani ichan, niman tikijlis on tlen tikpiya para tikijlis.

²³ Kemaj Pedro okinkalaktij, niman ompa onokajkej ipan on tlayoua. Niman uajmostla oyaj inuan. Niman oyajkej san sekan inuan oksekimej tokniuan yejuan chanejkej ompa Jope.

²⁴ Niman uajmostla oajsikej Cesarea kampa Cornelio kinchixtikatka inuan oksekimej yejuan achi ken kinta niman on yejuan más kuajli itlajsojkaikniuan* yejuan yokinsentlalijka.

²⁵ Ijkuak Pedro oajsik ipan on kajli, Cornelio ouajkis para okinamikito niman onotlakuantelkets ixpan para kimauistiliskia.

²⁶ Pero Pedro okontilan ipan ima, niman okijlij: —Xmotelketsa, pampa nejua no san nitlaltikpaktlakatl ken tejua.

²⁷ Niman chika iuan tlajtlajtojtiaya, okalakkej kalijtik kampa okinnextijtajsik miyekej yejuan yonosentlalijkaj.

²⁸ Niman Pedro okinmijlij: —Nemejuamej nenkimatstokej ika itlaneltok sen hebreo* xkauilia nosentlalis inuan on yejuan xhebreos* noso kalakis inchan. Pero Dios onechititij ika xkuajli para yakaj nikuitis tetlajyeloj* noso xchipauak ixpan Dios.

²⁹ Yejua ika tej, ijkuak onennechnotskej, oniuajlaj niman xitlaj* onikijtoj. Aman tej, nikneki nikmatis tline onennechtekuitlankej.

³⁰ Kemaj Cornelio okinankilij: —Ye kipiya naui tonajli ipan in hora nejua ninosauaya. Niman ipan yeyi hora ika tiotlak ijkuak nikchijtikatka nooración ne nochan, nimantsin sen tlakatl tlakemej ikan tlakentli* petlanki onotelkets nixpan.

³¹ Niman onechijlij: “Cornelio, Dios yokiselij mooración, niman yokitak on tlen tejua tiktetlayokolia para tikimpaleuiya yejuan mayankej.

³² Xtlanauati tej, ma kanatij Simón, yejuan no itoka Pedro, ne ipan on ueyikalpan Jope. Yejua nemi ichan sen tlakatl, no itoka Simón, yejuan kuetlaxinketl niman chanti nisiu itech mar. Ijkuak uajlas, tlajtos mouan.”

³³ Ijkon tej, nimantsin onitlatitlan ma mitstejtemotij, niman otikchiu kuajli ika otiuajlaj. Aman tej, tinochimej tinemij nikan ixpan Dios para tikakiskej nochi tlen toTEKO omitsnauatij.

Pedro otenojnots ichan Cornelio

³⁴ Kemaj Pedro opeu kinnojnotsa, niman okinmijlij: —Aman nikmati ika melauak Dios xkichikoita* se tlakatl iuan okse,

³⁵ yej kiselia san akinon yejuan kitlakaita niman kuajli nouika maski ualeua san katlejua país.

³⁶ Dios okinuajtitlanilij in tlajtojli on hebreos*. Okimijlij on kuajli tlajtojli yejuan kitemaka yolseuilistli niman ueli tikseliaj itechkopa JesusCristo yejuan iTEKO nochi tlakatl.

³⁷ Nemejuamej kuajli nenkimatstokej tlinon onochiu nochiuiyan ne ipan iueyitlalpan Judea. Ouajpeu ipan iueyitlalpan Galilea, sakin* ijkuak Juan yotemachtij niman yotlakuatekij.

³⁸ Nemejuamej nenkimatstokej kenijki Dios okimakak poder Jesús yejuan ualeua ne Nazaret, nimanokiyoltemitij ikan on Espíritu Santo. Niman no ijki nemejuamej nenkimatstokej kenijki Jesús nouiyan okichijtinen on tlen kuajli niman nochimej on yejuan itlaj ika kintlajyouiltiaya ipoder on diablo* okimpajtij, pampa Dios iuan nemiya.

³⁹ Niman tejuamej titestigos de nochi ika on tlajtlamach* tlinon Jesús okichiu ipan iueyitlalpan Judea niman on ueyikalpan Jerusalén. Niman más sakin* okimiktijkej, okajkopilojkej ipan kojnepanojli*,

⁴⁰ pero ipan yeyi tonajli Dios okiyoliuitij* niman okuiteu ipan itlalkon, niman okichiu para ma noteititi.

⁴¹ Xokinotitij nochi tlakatl, yej san tejuamej yejuan Dios otechtlapejpenij para titestigos, tejuamej yejuan iuan otitlakuajkej niman iuan otatlikej sakin* ijkuak yonoyolitij* niman yonokuiteu ipan itlalkon.

⁴² Niman yejua otechnauatij ma tikteijlikan in kuajli tlajtojli yejuan kiteijlia ken Dios temakixtia, niman ma tiktepanextilikan ika Dios yokitlalij Jesús para kinyolkuitis niman kintlajtlakolmakas on yejuan nemij niman yejuan yomikkej.

⁴³ Niman no ye uejkaui nochimej on kech tiotlajtojkej yotepannextilijkej ika nochimej yejuan tlaneltokaskej itech kiseliskej tetlapojpoluilistli de intlajtlakol itechkopa itokatsin Jesús.

On yejuan xhebreos* okiselijkej Espíritu Santo

⁴⁴ Chika Pedro sanken* tlajtlajtojtikatka, on Espíritu Santo impan oyejkok nochimej on yejuan kakiyaj on kuajli tlajtojli.

⁴⁵ Niman on tlaneltokakej hebreos* yejuan oualajkej iuan Pedro okintlatlachaltij ika on yejuan xhebreos* no okiselijkej Espíritu Santo yejuan Dios okinmakak.

⁴⁶ Ijkon okintlatlachaltij pampa kinkakiyaj on yejuan xhebreos* tlajtlajtouayaj ika sesetlamantik yenkuik tlajtoltin*, niman kiyekteneuayaj Dios.

⁴⁷ Kemaj Pedro okijtoj: —¿In tlakamej yejuan no yokiselijkej Espíritu Santo ken tejuamej, uelis yakaj xkinkauilis para nokuatekiskej?

⁴⁸ Niman Pedro otlanauatij ma kinkuatekikan ikan itokatsin Jesucristo. Kemaj okitlajtlanilijkej Pedro para ma nokaua ompa inuan keski tonajli.