Hebreos 9 - El Nuevo Testamento

Onkaj sen tlaltikpaktiopan niman sen iluikaktiopan

¹ On achtoj pacto* okipix tlanauatiltin yejuan otlanauatij ken kimauistiliskej Dios. Niman on yektiopan kampa okimauistilijkej onkaj nikan ipan in tlaltikpaktli.

² Ijkuak on tabernáculo* yejuan tlachijchijtli katka ikan tela ijkin okichijchijkej. Ikalakiyan onkatka on achtoj cortina. Ikuitlapan on cortina onkatka on achtoj parte itoka Tlayekkan kampa onkatka on candelero niman on mesa iuan on pan yejuan tlatiochijtli.

³ Ikuitlapan on ika ome yekcortina yejuan kinxelojtikaj on ome kalijtik, onkatka on kalijtik kampa más tlayekkan.

⁴ Ompa onkatka sen tlaixpan* tlachijchijtli ikan oro para ipan kitlatiayaj on xochikopajli, niman iyekcaja on pacto* yejuan nochiuiyan tlaixamijli ikan oro. Ijtik on yekcaja kampa onkaj on pacto*, onkatka se jarro tlachijchijtli ikan oro kampa onkatka on tlakuajli itoka maná. No ompa onkatka itopil* Aarón yejuan oitsmolinka, niman on ome tepatlachtin kampa okijkuilojkej itlanauatiluan on pacto*.

⁵ Tlapani ipan iyekcaja nemiyaj on ángeles intoka querubines* yejuan kiteititiayaj ika Dios ompa nemi ikan ueyilistli. Yejuamej kompixtikatkaj inmastlakapaluan san tlakpak ne lado kampa notlapojpoluiyaj on tlajtlakoltin. Pero aman xuelis más temechnojnotsaskej yejua ika on.

⁶ Ijkon tej, on tlajtlamach* onkatkaj ipan on yektiopan, niman on tiopixkej mojmostla kalakiyaj ipan on achtoj kalijtik para konchiuayaj intekiu ken tlanauatia on tlanauatijli.

⁷ Pero ne kampa Más Tlayekkan san yejua on más ueyi tlayekanki tiopixki kalaki, niman yejua san sejpa kalakiya ipan se xipan. Niman ijkuak onkalaki ika onkaj kikti yestli para kitemaka ipampa itlajtlakoluan niman no ipampa intlajtlakoluan on tlakamej yejuan okichijkej itlaj tlajtlakojli maski xkimatiyaj.

⁸ Yejua ika, on Espíritu Santo techititia ika chika kitekitiltiayaj on achtoj tabernáculo, on ojtli sanken* xtlapojtikatka yejuan ika ajsilos ne kampa Más Tlayekkan.

⁹ Nochi in ken ejemplo para tejuamej yejuan tinemij ipan in tiempo. Tikitaj tej, ika on ofrendas niman uentin tlen kixpantiliayaj Dios on tiopixkej, xouel okinchipauilij inchipatlamachilis on yejuan ijkon kimauistiliayaj.

¹⁰ On yeuejkaui costumbre san se onkatka ika on tlen kikuayaj, ika on tlen koniyaj niman ika on ken nochipauayaj ikan atl. In tlanauatiltin tlapaleuiyayaj san chika Dios xe kipatlaya on tlajtlamach*.

¹¹ Pero Cristo youajlaj, niman aman yejua ueyi tlayekanki tiopixki ika on tlajtlamach* tlen kuajli yejuan onkaj de on yenkuik pacto*. Yejua okalak ipan on yektiopan ne iluikak yejuan xakaj tlakatl okichijchiu pampa xipan in tlaltikpaktli kisa. Yejua on yektiopan más kuajli niman más melajki xken on yektiopan kampa on tiopixkej tekitij.

¹² Yejua okalak kampa Más Tlayekkan san sejpa niman para nochipa. Ijkuak ijkon okichiu, xokiktik inyesyo chivos nion de uakaxtin, yej yejua okitemakak ken uentli sano yejua iyesyo niman ijkon okitlaxtlau nochi totlajtlakoluan.

¹³ Ijkuak yakaj itlaj ika nijtlakoua ipan itlalnakayo, on tiopixki kalpichia ikan inyesyo on toros niman on chivos, niman itlikonexyo on becerra yejuan tlatla ne ipan on tlaixpan*. Ijkuak ijkon kalpichia, on yestli niman on tlikonextli kipiyaj poder para kiyektlalia niman kichipaua san tlapani ipan itlalnakayo.

¹⁴ Pero ¡iyesyo Cristo más kipiya poder xken inyesyo on toros niman on chivos! Itechkopa on Espíritu Santo yejuan nochipa nemi, yejua onotemakak ixpan Dios ken sen uentli yejuan nochi chipauak. Ijkon tej, iyesyo kichipaua on tlen xkuajli ipan totlamachilis yejuan techuika ipan mikilistli, para yej ma tiuelikan tiktekipanokan Dios yejuan nochipa nemi.

¹⁵ Yejua ika tej, JesuCristo kitlalia on yenkuik pacto* para nochimej on yejuan Dios okinnots ueliskej kiseliskej on herencia yejuan okitlalij ipan ipromesa para nochipa kipiyaskej. Yejua on ueli nochiua pampa imikilis Cristo okitlaxtlau para intlajtlakoluan yejuan okichijkej ijkuak ipan nouikayaj on achtoj pacto*.

¹⁶ Ijkuak sen tajtli achtoj kichijchiua on amatlajli para ikoneu ijkuak yejua xe miki, yejua on amatlajli xitlaj* kijtosneki hasta miki on tajtli, niman kemaj on amatlajli kitekitiltia.

¹⁷ Yejua in melauak pampa on amatlajli xitlaj* kijtosneki para on tekoneu tla sanken* nemi on tajtli. On amatlajli san ueli kitekitiltia ijkuak on tajtli yomik.

¹⁸ Yejua ika tej, on achtoj pacto* no onopeualtij ikan mikilistli ijkuak on yestli otoyau.

¹⁹ Xkelnamikikan kenijki Moisés achtoj okinmijlij on tlakamej nochi ken tlanauatia on tlanauatijli. Kemaj okisaloj itsojmiyo borreguito yejuan chichiltik ipan imakojyotsin on kojtli* itoka hisopo. Niman kemaj okineloj iuan atl inyesyo on uakaxkokonej niman on chivos. Niman ika okajuichij on tlajkuiloamatl kampa tlajkuilolnestikaj on tlanauatijli, niman no okinmajuichij nochimej on tlakamej.

²⁰ Kemaj okinmijlij: “In yestli, yejua kipeualtia on pacto* yejuan Dios omechnauatij nenkitlakamatiskej.”

²¹ Moisés no okajuichij ikan yestli on yektiopan yejuan tlachijchijtli katka ikan tela niman nochi on tlajtlamach* yejuan notekitiltiaya ijkuak kimauistiliayaj Dios ne ipan on yektiopan.

²² On tlanauatijli kijtoua casi nochi on tlajtlamach* ma nochipaua ikan yestli, niman tla xnotoyaua on yestli ipan uentli, xitlaj* tlajtlakojli notlapojpoluiya.

Cristo onotemakak ken uentli para okitekixtilij on tlajtlakojli

²³ Nochi on tlajtlamach* yejuan notekitiltiaya ipan on yektiopan ken itlaseuajlo on tlen onkaj ne iluikak, niman nonekiya nochipauaskej ika inyesyo on uakaxkokonej niman on chivoskokonej yejuan onochijkej uentli. Pero on tlajtlamach* tlen onkaj ne iluikak yejuan xsan tlaseuajlotl, yej kinekij on yejuan más kuajli uentli xsan iyesyo on yolkej.

²⁴ Tikmatij ika Cristo xokalak ipan on yektiopan tlachijchijtli de tlakamej yejuan san kixneskayotia* on yejuan melauak tiopan onkaj ne iluikak. Yej Cristo okalak ne iluikak kampa nemi iuan Dios para topampa tlajtojtikaj.

²⁵ On ueyi tlayekanki tiopixki hebreo* cada xipan kalakiya ne ipan on Más Tlayekkan para kitemakaya on yestli yejuan xejua iyesyo. Pero Cristo xmiyekpa onouentlalij.

²⁶ Tla ijkon yeskia, miyekpa mikiskia desde ijkuak in tlaltikpaktli opeu. Pero aman, ijkuak sa itlajtlankan in tiempo, yejua san sejpa niman para nochipa onotemakak ken sen uentli para okitekixtilij tlajtlakojli.

²⁷ Ijkon tej, ika onkaj nochimej san sejpa mikiskej, niman kemaj yaskej ixpan Dios para yejua kinyolkuitis.

²⁸ No ijki Cristo san sejpa onotemakak ken uentli para miyekej kinkixtilis intlajtlakoluan. Kemaj ika okpa uajnonextis, pero ijkuakon xpara kitekixtilis tlajtlakojli, yej para kinmakixtis on yejuan kichixtokej.