Hebreos 8 - El Nuevo Testamento

Jesús tepantlajtoua ikan on yenkuik pacto*

¹ Aman nochi on tlen yotiktenejkej yejuan más ueyi kijtosneki sano yejua in: Tikpiyaj sen ueyi tlayekanki tiopixki, niman aman ne iluikak yejua noseuijtikaj iyekmakopa on trono* kampa on toueyi Dios tlamandaroua.

² Niman yejua kichiu itekiu ken ueyi tlayekanki tiopixki ipan on melauak yektiopan yejuan xtlakamej okichijchijkej, yej Dios okichijchiu.

³ Nochimej on más uejueyi tlayekankej tiopixkej okinkalaktijkej para kixpantiliskej Dios ofrendas niman uentin. Yejua ika, on toueyitlayekankatiopixkau Cristo no ononek kipiyas tlinon kiuentlalis.

⁴ Tla yejua nemiskia ipan in tlaltikpaktli, nion siquiera xtiopixki yeskia, pampa nikan nemij on tiopixkej yejuan tlauentlaliaj ken tlanauatia on itlanauatil Moisés.

⁵ Pero on tiopixkej tekitij ipan sen tiopan yejuan kixneskayotia* on tiopan yejuan onkaj ne iluikak. Niman tikmatij ika in melauak, pampa ijkuak Moisés ye kichijchiuaskia on tabernáculo, Dios okijlij: “Xpiya cuidado para tikchijchiuas on tabernáculo* sano ijki ken nejua onimitsititij ne ipan on tepetl.”

⁶ Pero itekiu Cristo ken ueyi tlayekanki tiopixki más kuajli xken intekiu on oksekimej uejueyi tlayekankej tiopixkej, sano ijki ken on yenkuik pacto* yejuan Cristo okipeualtij más kuajli niman kisa ipan on más kuajkualtin promesas, xken on achtoj pacto*.

⁷ Tla on achtoj pacto* kuajli yeskia, xok nonekiskia on yejuan ika ome pacto*.

⁸ Pero Dios okitak ika on tlakamej xkuajli onouikakej ipan on achtoj pacto*. Yejua ika ipan in Yektlajkuilojli Dios ijkin okijtoj intech ika on tlakamej: Okijtoj on toTEKO: Uajlas on tonajli ijkuak niktlalis sen yenkuik pacto* inuan on tlakamej chanejkej ne Israel niman ne Judea.

⁹ On pacto* xijki yes ken oniktlalij inuan inachtojtajuan ipan on tonajli ijkuak onikinkixtij ipan on país itoka Egipto. Yejuamej xokitlakamatkej on pacto* yejuan onikintlalilij. Yejua ika onikintlalkauij, okijtoj on toTEKO.

¹⁰ On yenkuik pacto* yejuan nikinmakas on tlakamej chanejkej ne Israel, ijkuak yopanok on tiempo ijkin yes, kijtoua toTEKO: Nikintlalis notlanauatiluan ipan intlamachilis, niman nikinmijkuilos ipan inyojlo. Ijkuakon nejua niiminDios yes, niman yejuamej nokoneuan yeskej.

¹¹ Niman xok nonekis yakaj kimachtis icompañero noso yakaj ikniu, niman ijkin kijlis: Xkixmati toTEKO, pampa nochimej nechixmatiskej. Desde on más pitentsin hasta on yejuan más ueyi nechixmatis.

¹² Nikintlapojpoluilis on tlen xkuajli okichijkej, niman xkaman oksejpa nikelnamikis intlajtlakoluan.

¹³ Ijkuak Dios kiteneua on yenkuik pacto*, kiteititia ika on achtoj pacto* xok kuajli. Niman on yejuan xok kuajli saniman popolouis.