Hebreos 7 - El Nuevo Testamento

Jesús ueyi tlayekanki tiopixki sano ijki ken Melquisedec

¹ Yejua Melquisedec rey katka ipan on ueyikalpan itoka Salem niman no tiopixki katka itech on Más Ueyixtikaj Dios. Ijkuak Abraham ouajnokuepato ipan on nouijsokilistli kampa okintlanito on reyes, Melquisedec okinamikito niman okitiochiu.

² Abraham okimakak majtlaktli parte on tlen okitlanito ipan on nouijsokilistli. Itoka Melquisedec kijtosneki “rey yolmelajki”, niman no “rey de yolseuilistli”. Ijki itoka pampa Melquisedec rey katka ne ipan on ueyikalpan itoka Salem yejuan kijtosneki “yolseuilistli”.

³ Xkaman kakisti tla kiteneuaj ika yejua okipix itataj, noso inanaj, noso on iuejkatajuan. No ijki xkaman kakisti tla kiteneuaj on ijkuak otlakat nion on ijkuak yejua omik. Ijkon tej, yejua para nochipa tiopixki no ijki ken Christo, iKonetsin Dios.

⁴ Aman tej, ¡xkitakan ken ueyixtikatka Melquisedec! Abraham touejkatataj hasta okimakak majtlaktli parte de on tlen okitlanito ipan on nouijsokilistli.

⁵ Niman nochimej on tiopixkej yejuan iuejkakoneuan Leví ipan itlanauatil Moisés kipiyayaj tlanauatijli para kiseliskej intech on tlakamej on diezmo*. Yejua in kijtosneki kiseliskej on diezmo intech inmikniuan hebreos* maski on inmikniuan no iuejkakoneuan Abraham.

⁶ Pero Melquisedec, maski xotlakat ken iuejkakoneuan Leví, okiselij on diezmo itech Abraham, niman okitiochiu Abraham yejuan okinselij ipromesas Dios.

⁷ Niman xakaj uelis kinemilis ika on yejuan kiselia on tlatiochiualistli más ueyixtikaj xken on yejuan kitiochiua.

⁸ Nikan totsajlan nemij on tiopixkej yejuan kiseliaj sen diezmo yejuan iyaxka* Dios. On tiopixkej mikij. Pero on Yektlajkuilojli kijtoua ika xomik Melquisedec yejuan okiselijka sen diezmo.

⁹ Niman aman ueliskia tikijtoskiaj ika Leví niman nochi on iuejkakoneuan, ijkuak okiselijkej on diezmo, no okimakakej Melquisedec on diezmo ijkuak Abraham okimakak.

¹⁰ Kas ijkin ueliskia tikijtoskiaj pampa ijkuak Melquisedec okinamikito Abraham, Leví nemiya ipan itlanakayo Abraham, maski Leví xe tlakatiya.

¹¹ On tlakamej yejuan chantij ipan on país itoka Israel okiselijkej on tlanauatijli intechkopa on tiopixkej levitas, yejuan ualejtokej itech Aarón. Aman tej, tla on tiopixkej melauak ueliskiaj kinyolchipauaskiaj on yejuan kitlakamatiyaj on tlanauatijli, tla ijkon xok poliuiskia para nemiskia okse tiopixki yejuan ken Melquisedec, yejuan xualeua itech Aarón.

¹² Tla Dios kipatla intekiu on tiopixkej, no ika onkaj nopatlas on tlanauatijli.

¹³ Yejua ika, toTEKO yejuan notenejtikaj ipan in Yektlajkuilojli, kistikaj ipan okse ifamilia Israel, yejuan ompa xe yakaj kisa tiopixki para tekitis ne kampa tlaixpan*.

¹⁴ Kuajli machixtikaj ika toTEKO ualejtikaj ne ipan ifamilia Judá. Niman Moisés xejua on familia okiteneu ijkuak otlajtlajtoj de on tiopixkej.

¹⁵ Niman in más sanoyej* kuajli pantlantitikaj ika ouajlaj sen yenkuik tiopixki yejuan sano ijki ken Melquisedec.

¹⁶ Yejua xokalak tiopixki itechkopa on tlanauatijli yejuan kijtoua katlejua familia ika onkaj ipan kisas yejuan kalakis tiopixki. Yej yejua onochiu tiopixki pampa inemilis kipiya poder yejuan xkaman popoliuis,

¹⁷ pampa Dios ijkin kijtoua: Tejua titiopixki para nochipa sano ijki ken Melquisedec.

¹⁸ Ijkon tej, on tlanauatijli xok tlamandaroua pampa xkojtik niman xtepaleuij.

¹⁹ Itlanauatil Moisés xouel okichiu itlaj ken kitocaroua kichiuas. Pero aman tikpiyaj sen más kuajli tlamachalistli* para uelis tiknisiuiskej Dios.

²⁰ Niman Dios okalaktij Cristo para tiopixki ikan itlajtolmakalis. Pero xokinkalaktij on oksekimej para tiopixkej ikan itlajtolmakalis,

²¹ yej Cristo okalaktij tiopixki ikan itlajtolmakalis, ken on Yektlajkuilojli kijtoua: ToTEKO ijkin okijtoj ikan itlajtolmakalis, niman xkaman kipatlas: “Tejua titiopixki para nochipa sano ijki ken Melquisedec.”

²² Aman tej, ipampa itlajtolmakalis Dios, Cristo kichiua para melauak onkaj on yenkuik pacto*, niman más kuajli xken on achtoj pacto* yejuan onkatka ipan on tlanauatijli.

²³ On oksekimej tiopixkej sanoyej omiyekiyakej. Niman ijkuak se mikiya, kemaj okse uajnemiya.

²⁴ Pero Cristo xkaman miki, niman ijki itekiu xkaman panoua itech okse tlakatl.

²⁵ Yejua ika, yejua ueli kinmakixtia para nochipa on yejuan itechkopa kinisiuiyaj Dios, pampa yejua nochipa nemi para impampa kitlajtlanilijtikaj Dios ma kimpaleui.

²⁶ Ijkon tej, Jesús yejua toueyitlayekankatiopixkau yejuan noneki tikpiyaskej. Yejua yolchipauak, niman xonkaj itlaj tlinon ika uelis yakaj kijixkomakas*. Yejua xkipiya itlaj tlajtlakojli. Yejua xnemi ne intsajlan on tlajtlakolejkej, yej nemi ne iluikak kampa kipiya ueyi tlakaitalistli.

²⁷ Yejua xken on oksekimej uejueyi tlayekankej tiopixkej. Yejuamej mojmostla kinuentlaliaj yolkej, achtopa impampa intlajtlakoluan yejuamej niman kemaj impampa intlajtlakoluan on tlakamej. Pero Jesús san sejpa niman para nochipa onouentlalij ixpan Dios impampa nochimej.

²⁸ On itlanauatil Moisés kinkalaktia uejueyi tlayekankej tiopixkej on tlakamej yejuan tlajtlakolejkej. Pero on itlajtolmakalis Dios, yejuan sakin* okitemakak xken on tlanauatijli, okalaktij ueyi tlayekanki tiopixki on iKonetsin, yejuan nochi kuajli ipan inemilis para nochipa.