Hebreos 6 - El Nuevo Testamento

¹ Yejua ika, ma tikajkauakan on tlen más xouijtikaj* itemachtiluan Cristo, niman ma titochikauakan. Aman tej, maka oksejpa ma titomachtikan san ika on yolpatlalistli itech on tlajtlamach* tlen nenkichiuaj yejuan mechuikaj itech on mikilistli, nion san ika on tlaneltoktli itech Dios.

² No ijki tej, maka ma tiktemachtikan san de on tlakuatekilistli, niman on ika nenkitlaliaj nemomauan impan on tlaneltokakej, niman de on ika yoliskej* on mikatsitsimej, niman de on ika Dios nochipa kincastigaros noso kintiochiuas on tlakamej.

³ Tla Dios kineki, tiktomachtiskej itemachtil yejuan más ueyi kijtosneki.

⁴ Aman nemechijlis de yejuamej on yejuan ipan se tiempo okajsikamatkej on kuajli tlajtojli yejuan kiteijlia ken Dios temakixtia, niman okiselijkej on tetlayokolijli* yejuan Dios okinmakak, niman okipixkej on Espíritu Santo ipan inyojlo,

⁵ niman okimatkej ika kuajli on itlajtol Dios, niman no yejuan okimatkej on tiempo ijkuak Dios opeu tlamandaroua.

⁶ Aman tej, tla noxeloskej itech Cristo, xok uelis oksejpa noyolpatlaskej, pampa tla yejuamej ijkon kichiuaskej, oksejpa ken kajkopiloskiaj ipan kojnepanojli* iKonetsin Dios niman kipijpinajtiskiaj imixpan on tlakamej.

⁷ Dios kitiochiua on tlajli yejuan miyekpa ipan kiaui niman kichichina on atl, niman kiskaltia on tlatoktli yejuan kimpaleuiya on tlakamej.

⁸ Pero Dios castigaros niman kitlatis on tlajli yejuan kitlakiltia uitstli niman okseki tlajtlamach* tlen xkuajli xojtli yejuan xitlaj* ika tepaleuiya. Ijkon nochiuas intech on tlakamej yejuan noxelouaj itech Dios.

Ipromesa Dios techyoleua para ma timelajkanemikan ipan totlaneltok

⁹ Pero para nemejuamej, notlajsojkaikniuan, maski tejuamej ijkon tikijtouaj, kuajli tikmatij ika melauak nenkipiyaj ueyi tlatiochiualistli yejuan nenkiseliaj iuan temakixtilistli.

¹⁰ Dios yolmelajki. Yejua xkelkauas nemotekiu nion on tetlajsojtlalistli* yejuan onenkititijkej ijkuak onenkimpaleuijkej on tlaneltokakej, niman hasta aman nenkimpaleuiyaj.

¹¹ Niman tiknekij para cada se de nemejuamej ma kiteititi hasta ijkuak mikis on iyoleualis, para nochi on tlen kicha kiselis.

¹² Xtiknekij para yej nemokuepaskej tlatsijkej, yej tiknekij xmouikakan ipan inejemplo on yejuan itechkopa intlaneltok niman inijyouilis kiseliayaj on herencia yejuan Dios okitlalij ipan ipromesa.

¹³ Ijkuak Dios okimakak Abraham on promesa, iselti onotlajtolmakak ika kichiuas on tlen okitlalij ipan ipromesa. Ijkon iselti onotlajtolmakak pampa xnemi okse yejuan más ueyixtikaj para itech notlajtolpaleuis.

¹⁴ Dios ijkin okijlij Abraham: “Ika tlen melauak tej, nimitstiochiuas niman nikinmiyekilis on yejuan mouejkakoneuan yeskej.”

¹⁵ Yejua ika Abraham iyolika okichix hasta ijkuak okiselij on tlen Dios okitlalij ipan ipromesa.

¹⁶ Ijkuak sen tlakatl notlajtolmaka itech on yejuan más ueyixtikaj xken yejua, xok noneki más tlajtojli para kijtoskej.

¹⁷ Yejua ika, Dios onotlajtolmakak ijkuak okitemakak on promesa, pampa okinek kuajli kintitis on yejuan kiseliskej on herencia yejuan okitlalij ipan ipromesa ika xkaman kipatlas on tlen okijtoj.

¹⁸ Ipromesa Dios niman itlajtolmakalis xueli nopatla, pampa Dios xkaman kijtoua on tlen xmelauak. Yejua ika, tinochimej yejuan tikmatij ika yotechmakixtij, tikpiyaj toyoleualis para timelajkanemij ipan on tlamachalistli* yejuan otechprometerouilij.

¹⁹ Yejua on totlamachalis* kimelajkapiya toalma ijkon ken on teposcadena kimelajkapiya on barco ijkuak ika yokisalojkej. Totlamachalis kojtik niman melajkaonkaj. Niman ajsitok hasta itech Dios ne iluikak

²⁰ kampa Jesús oyakatstiaj para otechtlapouilij on ojtli itech Dios. Ijkon tej, Jesús onokau ueyi tlayekanki tiopixki para nochipa sano ijki ken Melquisedec.