Hebreos 5 - El Nuevo Testamento

¹ Cada ueyi tlayekanki tiopixki tlayekanki kitlapejpeniaj intsajlan on tlakamej para notenkixtia impampa on tlakamej ixpan Dios niman para kintemaka ofrendas niman uentli impampa intlajtlakoluan on tlakamej.

² Yejua ueli kinmijyouiya on yejuan xkimatij tlen kuajli niman on yejuan xkixmatij on kuajli niman on yejuan xkotkaj kuajli ojtli, pampa sano yejua xkojtik niman kichijua tlajtlakojli ken yejuamej.

³ Pampa on ueyi tlayekanki tiopixki xkojtik niman kichiua tlajtlakojli, ika onkaj kitemaka uentli xsan impampa intlajtlakoluan on tlakamej, yej no ipampa itlajtlakoluan yejua.

⁴ Xakaj notlalia ueyi tlayekanki tiopixki niman kiselia on ueyilistli san pampa yejua kineki, yej Dios kikalaktia sano ijki ken okichiu iuan Aarón.

⁵ Aman sano ijki. Cristo xsano yejua onokalaktij ueyi tlayekanki tiopixki, yej Dios okalaktij toueyitiopixkau niman okimakak on ueyilistli ijkon ken Dios okijlij: Tejua tinokoneu, niman aman oninochiu nimoTataj.

⁶ Niman oksekan ipan on Yektlajkuilojli no okijlij: Tejua titiopixki para nochipa sano ijki ken Melquisedec.

⁷ Ijkuak Cristo nemiya nikan ipan itlalnakayo, okichiu oraciones niman onoueyikatsajtsilij itech Dios. Yejua ikan chikauak itlajtol niman ikan ixayo, okinots Dios yejuan ueliskia kimanauiskia ipan on mikilistli. Niman Dios okak on tlen Cristo okijlij, pampa Cristo yolyemanki* katka niman kitlakaitaya Dios.

⁸ Niman maski Cristo yejua teKoneu itech Dios, otlajyouij. Niman itechkopa on itlajyouilis okajsikamat ken kitlakamati Dios.

⁹ Niman ijkuak yejua okiteititij ika kuajli kitlakamati Dios, okinmakak temakixtilistli nochimej on yejuan kitlakamatij.

¹⁰ Niman Dios okitlakalaktij Cristo para yejua más ueyi tlayekanki tiopixki sano ijki ken Melquisedec.

Xkuajli para tikajauilmatiskej totlaneltok

¹¹ Tikpiyaj miyek tlen temechijliskej itech ika in más ueyi tlayekanki tiopixki, pero sanoyej* ouijtikaj* para temechijliskej pampa sanoyej yolik nenkajsikamatij.

¹² Nemejuamej ye nentemachtijkej yeskiaj pampa miyek tiempo ye nemomachtiaj. Pero sanken* noneki para oksejpa ma mechmelajkaijlikan on tlen semi xouijtikaj* de itemachtiluan Dios. Nemejuamej nemochiuaj ken kokonej yejuan sanken konij leche niman xuejli kikuaj on yetik tlakuajli.

¹³ On yejuan san kinekij nomachtiaj on tlen xouijtikaj*, ken tselikakokonej*. Yejuamej tej, xe kajsikamatij katlejua on melajkanemilistli.

¹⁴ Pero on yejtik tlakuajli para on yejuan yonoskaltijkej, yejuan yokimachtijkej intlamachilis para kajsikamatij on tlen kuajli niman on tlen xkuajli.