Hebreos 4 - El Nuevo Testamento

¹ Yejua ika, chika sanken* tikpiyaj on promesa para tikalakiskej ne kampa onkaj neseuijli iuan Dios, ma titotakan sano tejuamej para maka nensemej nemejuamej xuelis nenkalakiskej.

² Ijkin nemechnotsa pampa nemejuamej no yonenkakkej on kuajli tlajtojli sano ijki ken nemoachtojtajuan yejuan okiskej Egipto. Pero maski yejuamej okakkej, xitlaj* ika okimpaleuij, pampa xokineltokakej.

³ Pero tejuamej yejuan otikneltokakej otikalakej ne ipan on neseuijli iuan Dios ken yejua okijtoj: Yejua ika, onikualan intechkopa niman onikmelajkaijtoj ika xkaman kalakiskej ne kampa nouan noseuiskej. Ijkin okijtoj, maski Dios otlan itekiu desde ijkuak okitlalij in tlaltikpaktli.

⁴ Onkaj kampa nestikaj ipan on Yektlajkuilojli kampa kiteneua on chikome tonajli. Ijkin tej, kijtoua: Dios otlan itekiu, niman ipan on chikome tonajli onoseuij.

⁵ Niman oksejpa kijtoua ipan on Yektlajkuilojli: Xkaman kalakiskej ne kampa nouan noseuiskej.

⁶ On yejuan achtopa okakkej on kuajli tlajtojli xokipixkej on neseuijli iuan Dios pampa xokitlakamatkej. Ijkon tej, tikmatij ika poliui para oksekimej kalakiskej niman iuan noseuiskej.

⁷ Yejua ika, Dios okitlapejpenij okse tonajli para on tlakamej kalakiskej niman iuan noseuiskej. Niman on tonajli sano aman. Miyek xipan sakin* ijkuak on achtojmej tlakamej xokalakkej ne itech Dios, yejua okitemachistij itechkopa David ikan in tlajtoltin tlen ye tikaktokej: Tla ipan in tonajli nemejuamej nenkakij mechnotsa Dios, maka xmoyoltechikauakan.

⁸ Tla Josué kinyekanaskia on hebreos* ne kampa kipiyaskiaj neseuijli iuan Dios, Dios xok kijtoskia ika okse tonajli más sakin* nemiskej tlakamej yejuan kipiyaskej on neseuijli.

⁹ Yejua ika tej, hasta aman onkaj sen neseuijli yejyejtikaj kampa on ikoneuan Dios ueliskej noseuiskej ken yejua onoseuij ipan on chikome tonajli.

¹⁰ On tej, yejuan kalakij ne kampa iuan Dios noseuiyaj, noseuiyaj ikan intekiu ijkon ken Dios onoseuij ijkuak okichijchiu in tlaltikpaktli.

¹¹ Yejua ika, ma tikchiuakan kanika para tikalakiskej niman titoseuiskej iuan Dios. Maka yej nensemej nenkitokaskej inejemplo on yejuan xokitlakamatkej Dios niman no nenixpoliuiskej.

¹² Itlajtol Dios yoltikaj, niman kipiya poder. Yejua más sanoyej tlateki xken itlaj espada yejuan hasta okan tlateki. Yejua ika tej, itlajtol Dios ueli kalaki hasta ipan ialma niman iespíritu kampa más kiyolmatoka sen tlakatl. Yejua kixtlaloua tlinon kinemilia niman tlinon kineki iyojlo.

¹³ Xitlaj onkaj nion xakaj nemi yejuan uelis niyanas ixpan Dios, yej nochi tlen onkaj niman nemi yejua kuajli kimatstikaj. Yejua ika tej, ika onkaj ixpan titoyolkuitiskej de nochi tlen tikchiuaj.

Jesús yejua más ueyi tlayekanki tiopixki

¹⁴ Jesús, on iKonetsin Dios, yejua toueyitiopixkau yejuan yokalak kampa nemi Dios. Yejua ika tej, ma timelajkanemikan ipan totlaneltok.

¹⁵ Tikpiyaj sen ueyi tlayekanki tiopixki yejuan ueli techiknelia ijkuak xtikojtikej, pampa sano yejua okipix miyek tetlatlatalistli no ijki ken tejuamej tikpiyaj miyek tetlatlatalistli para ma titlajtlakokan. Pero yejua xkaman otlajtlakoj.

¹⁶ Yejua ika tej, ikan nochi toyojlo ma tiknisiuikan toDios yejuan techtlajsojtla*. Ma tiknisiuikan para ma tikselikan iteiknelilis* niman iueyi tetlajsojtlalis yejuan techpaleuis ijkuak itlaj techpolos.