Hebreos 3 - El Nuevo Testamento

Jesús más ueyixtikaj xken Moisés

¹ Aman tej, nokniuan yolchopijkej yejuan Dios omechnots para nenyaskej ne iluikak, maka nenkixkauaskej Cristo Jesús yejuan apóstol* niman más ueyi tlayekanki tiopixki ipan totlaneltok.

² Yejua nochi kuajli okichiu ken kitocaroua on tekitl yejuan Dios okimakak, ijkon ken Moisés kuajli okichiu on tekitl yejuan Dios okimakak intech on hebreos*.

³ Niman Jesús kitocaroua kiselis más tetlakaitalistli xken Moisés, no ijki ken sen tlakatl kiselia más tetlakaitalistli xken on kajli yejuan yejua kichijchiua.

⁴ Nochi kajli yakaj tlakatl kichijchiua, pero Dios yejua okichijchiu nochi tlajtlamach* tlen onkaj.

⁵ Moisés sen kuajli tekichijketl katka. Nochi okichiu ken kitocaroua ipan on itekiu yejuan Dios okimakak intech on hebreos*. Yejua itekiu katka para kinmachistiaya de on tlajtlamach* yejuan Dios más sakin* kimijlis.

⁶ Pero Cristo yejuan yolchipauak tekoneu, kuajli okichiu nochi itekiu yejuan Dios okimakak intech ikoneuan. Tejuamej tiikoneuan tla tikejeuaj totlaneltok niman totlamachalis* yejuan tikpiyaj.

On neseuijli yejuan ikoneuan Dios kipiyaskej

⁷ Yejua ika, ipan on Yektlajkuilojli on Espíritu Santo kijtoua: Tla ipan in tonajli nemejuamej nenkakij mechnotsa Dios,

⁸ maka xmoyoltechikauakan ken okichijkej on yejuan okitlauelixnamikej ijkuak okitlatlatakej ne kampa xalpatlajkan.

⁹ On nemouejkatajuan onechtlatlatakej nejua nemoDios, maski ipan 40 xipan okitakej on tlajtlamach* yejuan nejua onikchiu.

¹⁰ Yejua ika, onikualan inuan on tlakamej, niman onikijtoj: “Nochipa inyojlo kineki on tlen xkuajli, niman yejuamej xokinekkej kimatiskej ken nouikaskej ipan on ojtli yejuan onikinmakak.”

¹¹ Yejua ika, onikualan inuan, niman onikmelajkaijtoj ika xkaman kalakiskej kampa nouan noseuiskej.”

¹² Nokniuan, xmocuidarokan para maka nensemej nenkipiyaskej xkuajli nemoyojlo yejuan xok kineltokas niman yej noxelos itech on Dios yejuan nochipa nemi.

¹³ Yej cada mojmostla xmoyolchikauakan cada se inuan oksekimej san chika on yektlajtojli kijtoua “Aman”, maka nensemej nemoyoltechikauaskej niman mechkajkayauas on tlajtlakojli.

¹⁴ Titlapoualtin iuan Cristo, tla hasta on sa ika nochi tonajli timelajkanemij ipan on tlaneltoktli yejuan otikpixkej ijkuak opeu tikneltokaj Cristo.

¹⁵ Yejua ika tej, ijkin nijtoua: Tla ipan in kuajli tonajli nemejuamej nenkakij mechnotsa Dios, maka xmoyoltechikauakan ken okichijkej on yejuan okitlauelixnamikej.

¹⁶ ¿Akinomej tej, on yejuan okikakkej Dios ijkuak okinnots, niman xokitlakamatkej? On sano yejuamej on yejuan Moisés okinkixtij ipan on país itoka Egipto.

¹⁷ Niman, ¿akinomej on yejuan 40 xipan Dios inuan okualan? Okualan inuan on yejuan otlajtlakojkej, niman omikkej ne kampa xalpatlajkan.

¹⁸ Niman, ¿akinomej kinteneuaya Dios ijkuak okimelajkaijtoj ika xkalakiskej ne kampa iuan noseuiskej? Dios kinteneuaya on yejuan xokitlakamatkej.

¹⁹ Ijkon tej, tikmatij ika xouel okalakkej pampa xokineltokakej Dios.