Hebreos 2 - El Nuevo Testamento

Noneki tikejeuaskej on ueyi temakixtilistli

¹ Yejua ika tej, noneki más tikpiyaskej cuidado de on tlen yotikakej, yej más tikejeuaskej para maka tiktlalkauiskej on ojtli.

² Tla on tlanauatijli yejuan on ángeles okiteijlijkej melauak otlanauatij, niman nochimej yejuan xokiselijkej nion xokitlakamatkej okiselijkej on castigo ken noneki,

³ ¿kenijki titomanauiskej itech itlauel Dios tla san tikajauilmatij on temakixtilistli yejuan sanoyej* ueyi kijtosneki? On temachtijli de temakixtilistli toTEKO achtoj yejua otemachtij, niman on yejuan okakkej okitojkej ika on temachtijli yejua melauak.

⁴ Niman Dios no otechititij ika on temakixtilistli yejua melauak itechkopa on tlamauisoltin, on tlajtlamach* tetlatlachaltij, on miyek milagros, niman no yejua ika on tetlayokoliltin yejuan on Espíritu Santo cada se otechmakak oksesekneka ken yejua okinek.

Tikpiyaj temakixtilistli itech Cristo

⁵ Dios xokinmaktilij on ángeles para kimandaroskej on tlaltikpaktli yejuan sakin* onyas, yejuan aman tiktenejtokej.

⁶ Yej sekan ipan on Yektlajkuilojli kijtoua: NoTEKO, ¿tlen ueyilistli kipiya on tlakatl, ika tikelnamiki? ¿Tlen ueyilistli kipiya on tlaltikpaktlakatl ika tikuajmatstikaj?

⁷ Para achitsin tiempo otiktlalij xmás ueyixtikaj ken on ángeles. Otikmakak ueyilistli niman tetlakaitalistli.

⁸ Niman no otikmakak tlanauatijli para kinmandaros nochi on tlen otikmachijchiu. Ijkon tej, ijkuak Dios okimakak nochi on tlajtlamach* para kimandaros, xitlaj* okixkau para okimakak ma kimandaro. Maski Dios ijkon okijtoj, hasta aman on tlakatl xtikitaj tla ueli kimandaroua nochi on tlajtlamach*.

⁹ Pero tikitaj ika Jesús, Dios okitlalij xmás ueyixtikaj ken on ángeles san para achijtsin tiempo. Ijkon okichiu ika iueyitetlajsojtlalis* para omik ipampa nochi tlakatl. Ijkon tej, tikitaj ika aman yejua kipiya ueyilistli niman tetlakaitalistli pampa otlajyouij niman omik ne ipan on kojnepanojli*.

¹⁰ Dios yejuan nochi tlajtlamach* onkaj itechkopa, niman tlen onkaj para yejua, okichiu ken kitocaroua ijkuak okitemaktilij Cristo itech itlajyouilis ipan on kojnepanojli. Niman yejua ika okaxitij para okinmakixtij ikoneuan. Ijkon tej, Cristo onochiu sen tlayekanketl yejuan okiyekan miyek tlakatl para kipiyaskej temakixtilistli.

¹¹ JesuCristo yejuan chipauak iuan on yejuan kinchipaua san se Tajtli kipiyaj. Yejua ika, yejua xpinaua para kintokayotia ikniuan.

¹² Ipan in Yektlajkuilojli JesuCristo kijlia Dios: Nikimijlis on nokniuan akin tejua. Niman nimitsyekteneuas ikan kuikatl intsajlan on tlaneltokakej kampa nosentlaliaj.

¹³ Niman no kijtoua: Niktlalis noyojlo itech Dios. Niman oksejpa kijtoua: Nikan ninemi inuan on nokoneuan yejuan Dios onechinmakak.

¹⁴ Ijkon ken on tekoneuan itech sen familia kipiyaj nakatl niman yestli ipan intlalnakayo, Jesús no onochiu tlakatl niman okipix nakatl niman yestli ipan itlalnakayo. Ijkon onochiu para ouel omik, niman itechkopa imikilis okixoxotonij on diablo* yejuan kipiyaya poder para temiktis.

¹⁵ Ijkon okinmanauij on yejuan nemiyaj ken esclavos ipan nochi innemilis pampa kimakajsiyaj on mikilistli.

¹⁶ Tej, ika tlen melauak xouajlaj para okimpaleuiko on ángeles, yej okimpaleuiko on yejuan tlaneltokaj ken Abraham otlaneltokak.

¹⁷ Yejua ika tej, ika onkatka para nochiuas tlakatl no ijki ken on itlaltikpakikniuan. Ijkon okichiu para ouel onochiu sen ueyi tlayekanki tiopixki yejuan teiknelia niman kichiua nochi ken kitocaroua ixpan Dios. Yejua ijkon onochiu ueyi tlayekanki tiopixki para onouentlalij impampa intlajtlakoluan on tlakamej.

¹⁸ Niman aman yejua ueli kimpaleuiya on yejuan on diablo* kintlatlata para ma tlajtlakokan, pampa sano yejua Cristo tlamach okijyouij, ijkuak on diablo* no okitlatlatak para tlajtlakoskia.