Hebreos 13 - El Nuevo Testamento

Kenijki nouika yejuan kineltoka Dios

¹ Nochipa xmotlajsojtlakan* ken nenmiknijtin.

² Kuajli xkinselikan nemochan on xchanejkej. Pampa sekimej yejuan ijkon oteselijkej, maski xkimatiyaj, okinselijkej ángeles ipan inchan.

³ Xkinmelnamikikan on yejuan tsakutokej ken inuan nentsakutiaskiaj. Xkinmelnamikikan on yejuan kintlajyouiltiaj, pampa nemejuamej no nenkipiyaj nemotlalnakayo yejuan uelis tlajyouis.

⁴ Nemochimej* xtlakaitakan on namiktilistli. Maka yakaj ma siuapapatla nion maka yakaj ma tlakapapatla, yej xnemikan ipan chipaualistli, pampa Dios kincastigaros on yejuan auilnemij niman on yejuan siuapapatlaj noso tlakapapatlaj.

⁵ Maka sanoyej xnekikan nenkipiyaskej tomin. Yej xpakikan san ika on tlen nenkipiyaj, pampa Dios okijtoj: “Xkaman nimitskauas nion nimitstlalkauis.”

⁶ Tla ijkon tej, uelis tikijtoskej ikan nochi toyojlo: NoTEKO yejua nechpaleuiya. Yejua ika, xnikmakajsis on tlen uelis nechchiuilis yakaj tlakatl.

⁷ Xkinmelnamikikan nemotlayekankauan yejuan omechmachtijkej itlajtoltsin Dios. Xkelnamikikan nochi tlen kuajli okichijkej ipan innemilis, niman xmouikakan ikan tlaneltoktli ken yejuamej onouikakej.

⁸ Ijkon ken JesuCristo katka, aman sanken* ijki, niman nochipa ijki yes.

⁹ Yejua ika tej, maka nemokauiliskej mechkajkayauaskej ika on temachtiltin yejuan yenkuikej niman okseknekamej. Más kuajli nenmoyolchikauaskej ikan iueyitetlajsojtlalis* Dios, niman xejua ika on tlanauatiltin de on tlakuajli yejuan xkaman okimpaleuij on yejuan okintlakamatkej.

¹⁰ On tiopixkej yejuan tekitij ken itlanauatil Moisés tlanauatia, xueli kikuaj on uentli yejuan tejuamej tikpiyaj ipan totlaixpan*.

¹¹ On ueyi tlayekanki tiopixki hebreo* kalaktia inyesyo on yolkej ne ipan on Más Tlayekan ken itlaj uentli para kintlapojpoluiya on tlajtlakoltin. Pero intlakayo on yolkej kintlatiaj ikaltenko on campamento.

¹² Yejua ika, Jesús no ijki okuikakej ikaltenko on ueyikalpan Jerusalén niman ompa otlajyouij, niman omik para ikan iyesyo okinchipauilij intlajtlakoluan on tlakamej.

¹³ Ma tiakan tej, niman iuan ma titosentlalitij ne ikaltenko on campamento, niman ma tikijyouikan on tepijpinaualistli yejuan yejua okijyouij.

¹⁴ Ipan in tlaltikpaktli, xtikpiyaj chanyotl* yejuan para nochipa onyas, yej tikchaj okse chanyotl* yejuan uajlas.

¹⁵ Yejua ika, nochipa ma tikyekteneuakan Dios itechkopa JesuCristo yejuan toueyi tiopixkau. Ijkon Dios kiselis totlayekteneualis ken itlaj uentli yejuan tikixpantiliskej ikan totlajtol.

¹⁶ Niman maka xkelkauakan para nenkichiuaskej on tlen kuajli niman nenkinpaleuiskej oksekimej ika on tlen nenkipiyaj, pampa on yejua uentli yejuan kipaktia Dios.

¹⁷ Xkintlakamatikan on yejuan mechyekanaj, niman xchiuakan intlanauatil, pampa yejuamej tlacuidarouaj ikan nemoalma. Yejuamej kimatstokej ika nemoka kitemakaskej cuenta itech Dios. Yejua ika tej, xkintlakamatikan para intekiu kichiuaskej ikan paktli niman xikan ajmantli, pampa tla xijki nenkichiuaj, yejua on xitlaj* ika mechpaleuis.

¹⁸ Topampa xchiuakan oración. Tejuamej tikmatstokej ipan tochipajkatlamachilis, ika tiknekij nochi tlajtlamach* tikchiuaskej kuajli.

¹⁹ Nemechtlajsojkatlajtlanilia xchiuakan oración para Dios saniman oksejpa ma nechkauili nemechontas.

Okintiochiu niman okintlajpaloj on hebreos*

²⁰ Dios, yejuan techmaka yolseuilistli, okiyoliuitij* niman okuiteu ipan itlalkon toTEKO JesuCristo yejuan ueyi Tlajpixki intech on borreguitos. Yejua ueyi Tlajpixki pampa itechkopa iyesyotsin, okipeualtij on yenkuik pacto* yejuan para nochipa onyas.

²¹ Ma Dios mechpaleui para uelis nenkichiuaskej nochi tlen kuajli ken yejua kineki. Niman itechkopa JesuCristo ma kichiua ipan tonemilis on tlen yejua kipaktia. On ueyilistli para nochipa ma kiseli Cristo. Ma ijki nochiua.

²² Nokniuan, sanoyej* nemechtlajtlanilia xnechijyouilikan in keski tlajtojli yejuan ika nemechtlakanonotsa ipan in noamatlajkuilol.

²³ Nikneki para xmatikan ika tokniu Timoteo xok tsakutikaj. Tla saniman uajlau nikan, nikuikas ijkuak nemechontas.

²⁴ Xkintlajpalokan nochimej on tokniuan yejuan mechyekanaj, niman nochimej on yolchipajkej itech Dios. In tokniuan chanejkej Italia mechtlajpalouaj.

²⁵ Ma Dios mechtiochiua nochimej ikan iueyitetlajsojtlalis*. Ma ijki nochiua.