Hebreos 12 - El Nuevo Testamento

Tejuamej noneki titlajyouiskej ken Cristo otlajyouij

¹ Yejua ika tej, pampa sanoyej* miyek tlakatl tikpiyaj yejuan okiteititijkej intlaneltok, okse lado ma tikontlalikan on tlen techteltia, niman on tlajtlakojli yejuan techikximamalina, niman ma tikxikokan chika titotlalouaj ipan on ojtli yejuan tikpiyaj toyakapan.

² Ma tikixkechikan Jesús yejuan itech ualeua totlaneltok niman sano yejua kimelajkatlalia. Jesús xokichiuilij cuenta on tlen tepinajtij ijkuak omik ipan kojnepanojli*, pampa kimatstikatka ika tla yotlajyouij, kipiyas paktli. Niman yejua onotlalij iyekmakopa itrono Dios kampa tlamandaroua.

³ Xtlanemilikan itech Jesús, yejuan sanoyej okijyouij nochi on tlajtlamach* yejuan okichiuilijkej on tlajtlakolejkej. Ijkon xtlanemilikan para maka nensiauiskej nion nenkipoloskej nemoyoleualis.

⁴ Nemejuamej yonenmoxixikojkej iuan on tlajtlakojli, pero san ika on, xonenkipolojkej nemonemilis.

⁵ ¿Yonenkelkajkej on tlen Dios okijtoj ijkuak omechtlakanonots nemejuamej ken nenikoneuan? Yejua ijkin okijtoj: Nokoneu, ijkuak toTEKO mitsmaka icastigo para mitsmelajkatlalis, kuajli xkaki. Niman no, maka tikpolos moyoleualis ijkuak mitschikajkanotsa,

⁶ pampa toTEKO kincastigaroua on yejuan kintlajsojtla*. Melauak tej, yejua kincastigaroua nochimej on yejuan kinselia ken ikoneuan.

⁷ Xkijyouikan nemejuamej on castigo, pampa ijkon Dios mechpiya ken ikoneuan. ¿Tlen nemi yakaj tekoneu yejuan itataj xcastigaroua?

⁸ Tla Dios xmechcastigaroua ijkon ken kincastigaroua nochimej on ikoneuan, kijtosneki ika nemejuamej xmelauak nenikoneuan, yej san nenteichtakakoneuan.

⁹ Ijkuak tikokonej katkaj, on totlaltikpaktajuan techcastigarouayaj, niman tikintlakaitayaj. ¿Tline* tej, xmás kuajli tiktlakamatiskej on toTajtsin iluikak chanej* para ijki tikpiyaskej nemilistli?

¹⁰ On totlaltikpaktajuan ipan achitsin tiempo otechcastigarojkej ken okinemilijkej kuajli. Pero Dios techcastigaroua para tikpiyaskej on tlen melauak techpaleuis para techchipauas ken yejua chipauak.

¹¹ On melauak ika nochi castigo xtikuelitaj ijkuak mero tikseliaj, yej techkokoua. Pero on yejuan ikan castigo noyektlaliaj, más sakin* kiseliaj yolmelajkilistli niman yolseuilistli.

Temojtij tla xtikselis itlajtol Dios yejuan ika mitsnotsa

¹² Ijkon tej, xmoyoleuakan niman xmoyolchikauakan.

¹³ Más xmouikakan ipan on kuajli ojtli para on yejuan xkojtikej ipan intlaneltok, maka nokuepaskej ipan on xkuajli ojtli, yej más kitokaskej on kuajli ojtli.

¹⁴ Xchiuakan kanika para inuan nochimej xnemikan ikan yolseuilistli, niman xpiyakan yolchipaualistli pampa xakaj kitas toTEKO tla xyolchipauak.

¹⁵ Xmotakan sano nemejuamej, maka yej semej nemejuamej xnenkiseliskej iueyitetlajsojtlalis Dios. Niman no xmotakan sano nemejuamej para maka nensemej yej nenmochiuaskej ken itlaj veneno niman ijkon nenkinmijtlakoskej miyekej.

¹⁶ Maka semej nemejuamej nenauilnemiskej nion maka semej nemejuamej nenkichiuaskej on tlen xchipauak ken Esaú yejuan ijkuak apismikiya, okipatlak ikan sen tlakuajli on iherencia yejuan okipix pampa yenkuiyotl katka.

¹⁷ Niman nemejuamej nenkimatstokej ika más sakin*, ijkuak Esáu kinekiya kiselis on herencia itech itataj, xok ouel. Niman maski sanoyej ochokak, xok ouel okipatlak on tlen okikiu.

¹⁸ Nemejuamej xonenkinisiuijkej on tepetl itoka Sinaí yejuan se ueli kimatoka yejuan on hebreos* okinisiuijkej ijkuak Moisés okinmakak itlanauatil Dios. Ipan on tepetl onkatka tlitl, niman moxtli tlilijki*, niman sanoyej tlayouatok katka, niman temojtij ajakaya,

¹⁹ nion xonenkakej ikakistilis on trompeta nion itlajtol Dios. Ijkuak yejuamej okakkej on tlajtojli, sanoyej okitlajtlankej para maka sa ma kiminnotsa.

²⁰ Ijkon okichijkej pampa xueliyaj kixikouayaj on tlanauatijli yejuan ijkin kijtouaya: “Xmiktikan ikan temej noso ikan espada on yejuan kontlalis ikxi ipan on tepetl, san akinon tlakatl noso yolki.”

²¹ Sanoyej temojtij on tlen nochijtikatka hasta Moisés ijkin okijtoj: “Nikuekuetlaka ikan nemojtijli.”

²² Nemejuamej tej, xonenkinisiuijkej on tepetl itoka Sinaí, yej yonenkinisiuijkej on tepetl itoka Sión, iueyikalpan Dios yejuan nochipa nemi. Yejua in kijtosneki on Jerusalén yejuan ne iluikak onkaj kampa nemij sanoyej miyekej ángeles yejuan yonosentlalijkej para kiueyiliskej Dios.

²³ Yonenkinnisiuijkej on iyenkuiyokoneuan Dios yejuan imintoka yokijkuilojkej ne iluikak. Yonenkinisiuijkej Dios yejuan nochimej kinyolkuitia niman kintlaxtlauilia. No yonenkinnisiuijkej inespíritus on yolmelajkej yejuan Dios yotlan kinyolchipaua.

²⁴ Yonenkinisiuijkej Jesús on yejuan okitlalij on yenkuik pacto* niman ikan iyesyo yejuan okitoyau. In yestli kiteititia on tetlapojpoluilistli niman xkitlajtlani on tetlakuepiltijli ken iyesyo Abel tlajtlaniya.

²⁵ Yejua ika, xmotakan sano nemejuamej. Xselikan itlajtol Dios yejuan mechnotsa. Tla on hebreos* omikkej pampa xokinekej okakej itlajtol Moisés yejuan nemiya ipan in tlaltikpaktli, sanoyej pantlantijtikaj ika tejuamej más xuelis titomanauiskej, tla tiktlalkauiskej itlajtol Dios yejuan nemi iluikak.

²⁶ Ipan on tonajli, itlajtol Dios okuiuixoj in tlaltikpaktli. Pero aman kijtoua: “Oksejpa nitlauiuixos, pero xsan in tlaltikpaktli nikuiuixos, yej no nikuiuixos on cielo*.”

²⁷ On tlajtojli “oksejpa”, kijtosneki ika Dios kejkuanis nochi on tlajtlamach* yejuan uelij nouiuixouaj, niman kinkauas on yejuan xkaman uelij nouiuixouaj.

²⁸ Yejua ika tej, ma tikmakakan tlaxtlauijli Dios pampa tikseliaj sen yenkuik lugar yejuan xuelis nejkuanis. Ma tikmauistilikan Dios ikan nochi cuidado niman ikan tetlakaitalistli ken kipaktia,

²⁹ pampa toDios ken itlaj tlitl yejuan ueli nochi kitlatia.