Hebreos 11 - El Nuevo Testamento

On toachtojtajuan okipixkej intlaneltok

¹ On tlaneltoktli kijtosneki melauak tikmatstokej* ika tikseliskej on tlen tikchaj, niman maski xtikitaj on tlen tikchaj, tikmatij ikan nochi toyojlo ika tikseliskej.

^2-3 Kuajli tikmatij ika itechkopa totlaneltok tikajsikamatij ika Dios okichijchiu in tlaltikpaktli san ika itlajtol. Yejua ika tej, Dios okichijchiu nochi on tlen aman tikitaj de on yejuan xueliya tikitayaj. Dios okinselij on toachtojtajuan ken yolmelajkej tlakamej pampa yejuamej okipixkej intlaneltok.

⁴ Ipampa itlaneltok Abel, okixpantilij Dios sen uentli yejuan más kuajli xken on yejuan okixpantilij Caín. Yejua ika, Dios okiselij Abel ken yolmelajki niman okiselilij iuen. Maski Abel yomik, sanken* kiteititia itlaneltok yejuan okipix.

⁵ Ipampa itlaneltok Enoc, okuikakej ipan iluikak niman ijkon xomik. Xok okinextijkej, pampa Dios okuikak. On Yektlajkuilojli kijtoua ika ijkuak xe kuikayaj, yejua okipaktij Dios.

⁶ Pero Dios xuelis tikpaktiskej tla xitech tikpiyaj totlaneltok, pampa para se uelis kinisiuis, ika onkaj kineltokas ika yejua melauak nemi, niman ika Dios kintiochiuas on yejuan melauak kitejtemouaj.

⁷ Ipampa itlaneltok Noé, okitlakamat Dios, maski xe nesiya on tlen temojtij yejuan Dios okijlij nochiuas. Yejua okichijchiu sen ueyi akajli* yejuan ipan omakis iuan ifamilia. Pampa okineltokak Dios, Noé okititij nochi tlakatl yejuan nemiya ikan tlajtlakojli, niman yejua okiselij yolmelajkalistli itech Dios itechkopa itlaneltok.

⁸ Ipampa itlaneltok Abraham, okitlakamat Dios ijkuak okinauatij para ma uiya ne tetlalpan kampa okiprometerouilij kimakas ken herencia. Yejua okis ne kampa chantiya niman oyaj, maski xkimatiya kanon yaya.

⁹ Ipampa itlaneltok ochantik ipan on tlajli yejuan Dios yokijlijka ika iyaxka yes, maski yejua ochantik ken sen yejuan xchanej. Ochajchantitiaj ipan sen kajli tlachijchijtli ikan tela. Isaac niman Jacob no ijkon ochantikej yejuan no okiselijkej sano yejua promesa.

¹⁰ Abraham kichaya para Dios kuikas ne iluikak ipan on ueyikalpan kampa Dios yejua onochiu arquitecto, niman okichijchiu sanoyej kojtitikaj icimiento* yejuan onyas para nochipa.

¹¹ Ipampa itlaneltok Sara, okiselij on chikaualistli para onochiu nantli, maski sanoyej* ye lamajtsin katka para kimpiyaskia ikoneuan. Yejua tej, okipix se ikoneu pampa okineltokak ika Dios kichiuas ken okitlalij ipan ipromesa.

¹² Ijkon tej, maski Abraham sanoyej ye ueuentsin katka niman ye nisiu katka para mikis, yejua ouel okimpix iuejkakoneuan. Niman otlakatkej sanoyej miyekej iuejkakoneuan ijkon ken miyekej onokej on sitlalimej ne ipan cielo niman ijkon ken on xajli yejuan onkaj itenko on mar yejuan xueli yakaj kipoua.

¹³ Nochimej on tlakamej okipixkej imintlaneltok ijkuak omikkej maski xokiselijkej on tlen Dios okimprometerouilij. Pero sanoyej pakiyaj pampa ipan intlaneltok kimatstikatkaj ika on promesa nochiuas maski panos miyek tiempo para nochiuas. Ijkon okiteititikej ika xchanejkej ipan in tlaltikpaktli, yej chanejkej ipan iluikak.

¹⁴ On tej, yejuan ijkon kijtouaj kuajli kiteititiaj ika sanken* kitejtemouaj sen chanyotl* kampa chantiskej para nochipa.

¹⁵ Tla yejuamej sanken* ontlamatstiaskiaj ipan on chanyotl* kampa ouajtlakajtejkej, ueliskiaj oksejpa yaskiaj.

¹⁶ Pero yejuamej kinekiyaj sen chanyotl* más kuajli, sen chanyotl* yejuan iluikak onkaj. Yejua ika, Dios xpinaua para Dios yes intech yejuamej niman yokinchijchiuilij sen chanyotl*.

^17-18 Ipampa itlaneltok Abraham, okuikak Isaac on isentekoneu para kiuentlaliskia ijkuak Dios okitlatlatak. Maski Dios ijkin okiprometerouilijka Abraham: “Itechkopa Isaac tikpiyas mouejkakoneuan”, yejua nemiya listo para kiuentlaliskia on san ika nochi ikoneu.

¹⁹ Abraham ijkin okichiu pampa yejua okineltokak ika Dios kipiya poder para kinyoliuitis* on mikatsitsimej. Niman maski Isaac xomik, Abraham okiselij ken on yejuan oksejpa oyoliu ne intsajlan on mikatsitsimej.

²⁰ Ipampa itlaneltok Isaac, okiprometerouilij Jacob iuan Esaú miyek tlatiochiualistli yejuan sakin* okiselijkej.

²¹ Ipampa itlaneltok Jacob, ijkuak ye nisiu para mikis, okimprometerouilij miyek tlatiochiualistli ikoneuan José, niman okimauistilij Dios chika onokojtilij ikan itopil.

²² Ipampa itlaneltok José, ijkuak ye nisiu para mikis, okijtoj ika más sakin* on hebreos* kisaskej ipan on país Egipto, niman otlanauatijteu para kiktiskej iomiyouan ijkuak kisaskej.

²³ Ipampa intlaneltok itajuan Moisés, xokimakaskej on tlanauatijli yejuan okitemakak on rey para ma kinmiktikan nochimej on tlakakokonej hebreos*. Yej, ijkuak onen, okiyankej Moisés yeyi metstli. Ijkon okichijkej pampa okitakej ika yejua sen kualtsin tlakakonetl katka.

²⁴ Ipampa itlaneltok Moisés, ijkuak yotlakatiak, xonokalaktij nemis ken tekoneu itech ichpoch on rey de Egipto.

²⁵ Yej, okitlapejpenij tlajyouis inuan on ikoneuan Dios, niman okitlalkauij on pakilistli ne tlajtlakolpan kampa san panoskia on ipakilis.

²⁶ Yejua kimatstikatka ika más ueyi kijtosneki para kijyouis on tlauejli ipampa Cristo xken tla kipiyaskia nochi on iriqueza Egipto. Ijkin okinemilij pampa yejua okimat ika Dios kitiochiuas.

²⁷ Niman ipampa itlaneltok, Moisés okis ne Egipto xikan nemojtijli maski on rey okualan. Yejua okijyouij on tlen tepajsoloj pampa yejua ken kitstikatka Dios yejuan xakaj ueliya kita.

²⁸ Niman no ipampa itlaneltok, Moisés okipeualtij on iluitl itoka Pascua*, niman otlanauatij ma kimajuichikan on tsakuijlomej* ikan inyesyo on borreguitos. Ijkon otlanauatij para on ángel, yejuan kipiyaya poder para temiktis, xuelis kimiktis on konetl yejuan yenkuiyotl ipan infamilias on hebreos*.

²⁹ Ipampa intlaneltok, on hebreos* okipanauijkej on Mar Rojo ken tlaluaktli yeskia. Pero ijkuak on Egipcios no ijki kipanauisnekiyaj, oamimikkej.

³⁰ Ipampa intlaneltok on hebreos*, ouets on tepantli iyeualkan on ueyikalpan itoka Jericó ijkuak yejuamej chikome tonajli okiyeualojkej.

³¹ Ipampa itlaneltok on tlakapapatlaketl itoka Rahab, xomik inuan on ichanejkauan yejuan xotetlakamatkej, pampa yejua kuajli okinselij on hebreos* yejuan oichtakatlajtlachatoj ken tlaojonkaj Jericó.

³² ¿Tlinon más nikijtos? Nechpoloskia tiempo para nitlajtlajtoskia de Gedeón, Barak, Sansón, Jefté, David, Samuel niman on tiotlajtojkej.

³³ Ipampa intlaneltok sekimej yejuamej okintlankej on países, niman sekimej yejuamej otekiuajtikej ikan yolmelajkilistli, niman okiselijkej on tlajtlamach* yejuan Dios okitlalij ipan ipromesa. Ipampa intlaneltok, Dios okinmanauij intech on tekuanimej yolkej para xokinkuajkej.

³⁴ Okiseuijkej tlitl yejuan sanoyej tekuintikatka, onomanauijkej para xokinmiktijkej ikan espadas. Yejuamej xkojtikej katkaj pero okiselijkej chikaualistli. Yejuamej okipixkej poder ijkuak okichijkej nouijsokilistli niman okintlankej insoldados on intlauelikniuan.

³⁵ Sekimej siuamej oksejpa okiselijkej infamilia yoltokej yejuan yomikkaj. Oksekimej omikkej ika on temojtij tlajyouilistli. Ijkuak kinmakauasnekiyaj, xokinekkej onomanauijkej, pampa okineltokakej ika Dios oksejpa kinyoliuitis* niman kipiyaskej sen nemilistli yejuan más kuajli.

³⁶ Oksekimej otlajyouijkej pampa inka ouetskakej niman okinuijuitekej, niman kamantika hasta okinsalojkej niman okintsakukej.

³⁷ Sekimej okinmiktijkej ikan temej. Sekimej okintlajkotekkej ikan sierra. Sekimej okintlatlatakej, niman sekimej okinmiktijkej ikan espadas. Sekimej nejejkuanijtinemiyaj niman notlakentiayaj ikan inkuetlaxyo* borreguitos niman inkuetlaxyo chivos. Yejuamej omajmayankej, okintlauelitakej niman okintlajyouiltijkej*, niman inka onajauiltijkej.

³⁸ On yejuan xtlaneltokaj, xkintocarouaya nemiskej intsajlan on tokniuan yejuan kistinemiyaj neka kampa xalpatlajkan, niman neka ipan tepemej. Oniyankej ipan teostoyoj, niman kampa tlaltsayankan.

³⁹ Nochimej yejuamej, maski Dios okinselij ken yolchipajkej pampa okipixkej tlaneltoktli, xokiselijkej on tlen Dios okimprometerouilij,

⁴⁰ pampa Dios yokinemilijka para tejuamej techmakas tlen más kuajli yejuan no ijki yejuamej kiseliskej. Yejua yokinemilijka para techajxitis ken yejua kineki san sekan inuan yejuamej.