Hebreos 10 - El Nuevo Testamento

Itlanauatil Moisés xueli kitekixtilia on tlajtlakojli

¹ Itlanauatil Moisés san kixneskayotia* on tlen kuajli tlajtlamach* onyas, pero xejua on yejuan melauak yes. Yejua ika tej, on tlanauatijli xkaman ueli kinyolchipaua on yejuan kinisiuiyaj Dios itechkopa on uentin, yejuan cada xipan kiuentiaj sano yejua.

² Tla on tlanauatijli ueliskia kinyolchipauaskia on yejuan kinmauistiliaj Dios, on uentin xok kaman kintemakaskiaj, pampa on tlakamej noyolchipauaskiaj san sejpa niman para nochipa, niman xok kinnotlajtlakolmatiskiaj.

³ Pero on ken on uentin san kinmelnamiktia intlajtlakoluan cada xipan,

⁴ pampa inyesyo on toros niman on chivos xkaman ueli kitekixtiliaj on tlajtlakojli.

⁵ Yejua ika, ijkuak Cristo ouajlaj ipan in tlaltikpaktli, okijlij Dios: Uentli niman ofrenda xtikneki. Yej sen tlalnakayotl otinechmakak para nejua ijkuak onitlakat.

⁶ On ofrendas de yolkej yejuan kintlatiaj ipan on tlaixpan* xmitspaktiaj, nion on uentli yejua kitlaliaj para kitlapojpoluiya on tlajtlakojli.

⁷ Kemaj onikijtoj: “Nikan niuajlau, noTajtsin, para nikchiuas tlinon tejua tikneki ijkon ken noka tlajkuilolnestikaj ipan on amamoxtli*.”

⁸ Achtoj okijtoj ika Dios xkineki nion xkuelita on uentli, nion ofrenda de on yolkej, nion ofrendas yejuan kitlatiaj ipan on tlaixpan* yejuan notlalia para ma notlapojpolui on tlajtlakojli. Ijkin okijtoj maski on tlakamej tlauentlaliayaj ken on tlanauatijli tlanauatia.

⁹ Niman kemaj okijtoj: “Nikan niuajlau, noTajtsin, para nikchiuas tlinon tejua tikneki.” Yejua in kijtosneki ika yejua okimpopoloj on uentin ipan on achtoj pacto* niman onouentlalij ipan on ika ome pacto*.

¹⁰ Yejua ika, aman tichipajtokej niman xok tikpiyaj totlajtlakol, pampa JesuCristo okichiu tlinon Dios okinek ijkuak san sejpa niman para nochipa okixpantilij on itlalnakayo ken itlaj uentli.

¹¹ Nochi tiopixki hebreo* mojmostla tlauentlalia niman kitemaka sano yejua uentli ken nochipa kitemaka, maski in uentin xkaman uelij kitekixtiliaj tlajtlakojli.

¹² Pero JesuCristo ipampa nochi tlajtlakojli, san sejpa okitemakak san se uentli niman para nochipa. Kemaj onotlalij iyekmakopa Dios.

¹³ Ompa tlamachixtikaj hasta ijkuak Dios kinmaktilis on itlauelikniuan para kintlankapiyas para ye ika.

¹⁴ Yejua ika, Cristo san ika se uentli nochi kuajli niman para nochipa okintlajtlakolkixtij on yejuan yolchipajkej itech Dios.

¹⁵ Niman on Espíritu Santo no techijlia. Achtoj kijtoua:

¹⁶ On pacto* yejuan nikinmakas ijkuak yopanok in tiempo de on achtoj pacto* sano ijkin yes, kijtoua on toTEKO: Nikintlalis notlanauatiluan ipan inyojlo, niman nikinmijkuilos ipan intlamachilis.

¹⁷ Niman kemaj on Espíritu Santo kijtoua: Xkaman oksejpa nikelnamikis intlajtlakol niman on tlen xkuajli okichijkej.

¹⁸ Yejua ika, ijkuak on tlajtlakoltin yokitlapojpoluijkej, xok poliui para notemakas más uentli ipampa on tlajtlakojli.

Tlanauatijli para maka kitlalkauiskej Dios

¹⁹ Yejua ika nokniuan, itechkopa iyesyo JesuCristo, ma tiktlalikan toyojlo para tikalakiskej ne kampa Más Tlayekkan.

²⁰ Aman ueli tikalakij ipan on yenkuik ojtli yejuan kipiya nemilistli. Cristo otechtlapouilij on yekcortina para tiueliskej tajsiskej itech Dios. On yekcortina kijtosneki sano yejua itlalnakayo.

²¹ Aman tikpiyaj toueyitiopixkau yejuan tlamandaroua ipan ichan Dios.

²² Tla ijkon tej, ma tiknisiuikan Dios ikan nochi toyojlo niman ikan san se totlaneltok yejuan ajsitikaj*. Ma tiknisiuikan ikan totlamachilis yejuan Cristo yokichipau, niman ikan totlalnakayo yejuan yokipajpak ika on atl chipauak.

²³ Ma timelajkanemikan ipan on tlamachalistli* yejuan yotikijtojkej ika tikpiyaj. Maka tikpatlaskej totlaneltok, pampa Dios melauak cumpliros on ipromesa yejuan otechmakak.

²⁴ Ma tiknemilikan kenijki uelis tikinyoleuaskej oksekimej para ma notlajsojtlakan* niman para ma kichiuakan on tlen kuajli.

²⁵ Niman maka no ijki ma tikchiuakan ken sekimej yejuan xok nosentlaliaj touan kampa tikmauistiliaj Dios. Yej ma titoyoleuakan iuan oksekimej, niman más ma toyoleuakan pampa tikmatij ika ye nisiu uajlas toTEKO.

²⁶ Tla yotikixmatkej on tlen melauak niman titlajtlakouaj ikan toyoltechikaualis, tla ijkon, xok onyas uentli para on totlajtlakol.

²⁷ Niman tla ijkon tikchiuaskej, on tlen topan nochiuas sanoyej* temojtij yes. Dios techtlajtlakolmakas niman techcastigaros ika on tekuinki tlitl yejuan ika kintlatis yejuan kitlauelitaj.

²⁸ Ijkuak yakaj xkitlakamati on itlanauatil Moisés, niman nemij omemej noso yeyimej testigos yejuan kijtouaj ika melauak xokitlakamat on tlanauatijli, yejua xkikneliaj, yej kitemaktiliaj ma kimiktikan.

²⁹ Tla ijkon, ¿tlinon nenkinemiliaj ipan nochiuas on yejuan xipan kita iKonetsin Dios? ¿Tlinon nochiuas intech on yejuan xkixtlajsojtlaj on iyesyotsin Cristo yejuan okipeualtij on yenkuik ipacto* Dios yejuan ika yokinchipauilij intlajtlakoluan? ¿Tlinon nochiuas intech on yejuan kuijuikaltiaj iEspíritu Dios yejuan yokinmakak on iueyitetlajsojtlalis? Yejuamej tej, kiseliskej sanoyej más ueyi castigo.

³⁰ Tikixmatij on akin okijtoj: “Nejua nitetlakuepiltis*. Nejua nitecastigaros.” Niman no okijtoj: “On toTEKO kinyolkuitis niman kintlaxtlauilis ikan castigo nochimej ikoneuan ika on tlen se kitocaroua.”

³¹ Sanoyej temojtij tla se onuetsis ipan itlauel on Dios yejuan nochipa nemi.

³² Xkelnamikikan on tiempo onenpanokej ijkuak kemach onenkiselikej itlajtol Cristo. Ipan on tonaltin nemejuamej miyek tlajyouilistli onenkixikojkej.

³³ Kamantika nemejuamej teixpan omechuijuikaltijkej niman omechkojkokojkej. Niman kamantika sekimej teuan onenmotemakakej ipan on tlajyouilistli.

³⁴ Nemejuamej onenkimiknelijkej on yejuan tsakutikatkaj. Niman hasta ikan paktli onenkimokauilijkej omechkixtilijkej on tlen nemoyaxka*, pampa nenkimatstokej ika ne iluikak nenkipiyaj on tlen más sanoyej kuajli niman ika nenkipiyaskej para nochipa.

³⁵ Yejua ika tej, maka xtlalkauikan nemotlaneltok, pampa yejua on tlaneltokalistli mechajkuilis sen ueyi tlaxtlauijli.

³⁶ Nemejuamej noneki nenkipiyaskej ijyouilistli chika nentlajyouiyaj para uelis nenkichiuaskej on tlinon Dios kineki, niman ijki uelis nenkiseliskej on tlen yejua omechprometerouilij.

³⁷ In Yektlajkuilojli ijkin kijtoua: Semi saniman uajlas on yejuan ika onkaj uajlas, niman yejua xnouejkauas.

³⁸ Pero on yejuan yolmelajki kipiyas nemilistli ikan itlaneltok, pero tla nechtlalkauiya, xnipakis iuan.

³⁹ Pero xtejuamej on yejuan tiktlalkauiyaj Dios niman tixpoliuij para nochipa. Yej tejuamej tikpiyaj tlaneltoktli niman ijki tikejeuaj toalma.