Hebreos 1 - El Nuevo Testamento

Dios otechnojnots itechkopa iKonetsin

¹ Yeuejkaui Dios okinnojnots on toachtojtajuan intechkopa on tiotlajtojkej miyekpa niman okichiu sesekneka.

² Pero aman ipan in sa ika nochi tiempo, Dios yotechnojnots itechkopa iKonetsin. Dios okichijchiu nochi tlen onkaj itechkopa, niman aman yokimaktilij nochi.

³ Cristo yejua kipantlantia iueyilis Dios niman sano yejua kixneskayotia* nochi kenijki nemi Dios. Niman no yejua kejeua nochi on tlen onkaj ikan itlajtol yejuan kipiya poder. Kemaj ijkuak yomik Cristo para otechkixtilij totlajtlakol, onotlalij iyekmakopa itrono Dios kampa tlamandaroua ne iluikak.

IKonetsin Dios más ueyixtikaj xken on ángeles

⁴ IKonetsin Dios más ueyixtikaj xken on ángeles, niman yejua okiselij sen tekitl yejuan más ueyi kijtosneki xken intekiu on ángeles.

⁵ IKonetsin Dios más ueyixtikaj pampa Dios nion sen ángel xkaman ijkin okijlij: Tejua tinoKoneu, niman aman on tlakamej kimatiskej ika nimoTataj. Niman Dios no xakaj ángel okijlij: Nejua nimoTataj yes, niman tejua tinoKoneu yes.

⁶ Pero ijkuak okuajuikak on iyenkuiyoKonetsin ipan in tlaltikpaktli, okijtoj: Nochimej iángeles Dios ma kimauistilikan.

⁷ Intechika on ángeles Dios okijtoj: Nikchiua para on ángeles nechtekichiuiliaj isijkapan ken itlaj ajakatl ijkuak panotikisa. Niman nikchiua para notekitkauan tlaxoxotoniaj ken on tlitl tlaxoxotonia.

⁸ Pero itechika iKonetsin, toTajtsin Dios okijtoj: Ay Dios, motlanauatil onyas para nochipa, niman tejua titlamandaros ikan yolmelajkilistli.

⁹ Otikuelitak yolchipaualistli, niman xotikuelitak on tlen xkuajli. Yejua ika, Dios on yejuan moDios, omitstlapejpenij niman omitsmakak paktli más xken on motekipanojkaxiuan.

¹⁰ No ijki itechika iKonetsin Dios okijtoj: “Ay noTEKO, ijkuak xe itlaj onkatka, otiktlalij in tlaltikpaktli, niman ikan momauan no otikchijchiu nochi on tlen onkaj ne ipan cielo.

¹¹ Niman nochi on popoliuis, pero tejua tinemis para nochipa. Nochi on tlen otikchijchiu ijsoliuis ken ijsoliui itlaj tlakentli*.

¹² Tikinkuejkuelpachos ken kuejkuelpachouaj sen tlakentli*, niman tikimpatlas ken kipatlaj on tlakentli*. Pero tejua nochipa sano ijki tinemi, niman monemilis xkaman tlamis.”

¹³ No ijki tej, Dios xkaman okijlij yakaj ángel: Xmotlali noyekmakopa, hasta kaman nikintlanis on motlauelikniuan para tikinmandaros.

¹⁴ Tla ijkon tej, ¿akinomej on ángeles? On ángeles yejuamej espíritus kuajkualtin yejuan tepaleuiyaj. Niman Dios kintitlani para komimpaleuiyaj on yejuan kiseliaj temakixtilistli.