Gálatas 6 - El Nuevo Testamento

Xmopaleuikan iuan cada se

¹ Nokniuan, tla semej tokniuan kichiua itlaj tlajtlakojli, nemejuamej yejuan kuajli nenkitlakamatij on Espíritu Santo xpaleuikan para ma nokuepa. Pero xchiuakan ikan yolyemanilistli, niman nemochimej* xmotakan kuajli maka mechtlatlatas on diablo* niman mechtlajkalis ipan tlajtlakojli.

² Xmopaleuikan inuan oksekimej ijkuak nenkipiyaj pasolouilistli, niman ijkon nenkitlakamatiskej itlanauatil Cristo.

³ Tla yakaj kinemilia ueyixtikaj, niman xmelauak ueyixtikaj, tla ijkon, sano yejua nokajkayaua.

⁴ Cada se sano yejua ma notlatata tla kuajli nouika. Tla kuajli nouika ipan inemilis, pakis niman xnoneki kinemilis ika yejua más ueyixtikaj xken okse tlakatl.

⁵ Ijkon tej, cada se noneki kinomamaltis on tlajtlamach* pajsolouilistli yejuan ipan uajlau.

⁶ Noneki kipaleuiskej ikan nochi on tlajtlamach* tlen kipiyaj on yejuan kinmachtia itlajtoltsin Dios.

⁷ Maka sano nemejuamej xmokajkayauakan, pampa xakaj uelis kikajkayauas Dios. Tlen kitôkas sen tlakatl, sano yejua kipixkas.

⁸ Tla tiktôkaskej on tlen xkuajli yejuan keleuiya totlalnakayo, ikan totlalnakayo tikpixkaskej on xoxotonilistli niman mikilistli. Pero tla tiktôkaskej on tlen kineki Espíritu Santo, tikpixkaskej nemilistli yejuan para nochipa.

⁹ Maka tej, ma tisiauikan para tikchiuaskej on tlen kuajli, pampa ijkuak ajsis on tonajli, tikpixkaskej on kuajli xinachtli tla xtitosiaukauaj.

¹⁰ Yejua ika tej, nochipa ijkuak tiueliskej, nochimej ma tikinchiuilikan tlen kuajli, niman más on yejuan kineltokaj JesuCristo.

Pablo okinchikajkanots niman okintlajpaloj sa ika nochi on tlaneltokakej

¹¹ Xkitakan ken uejueyi letras ika nemechtlajkuiluiya ikan nomauan.

¹² On temachtijkej yejuan kinekij para xmotlalilikan on neskayotl itoka circuncisión*, san kinekij kimpaktiskej on tlakamej para maka kintlajyouiltiskej ipampa on kojnepanojli* de Cristo.

¹³ On temachtijkej yejuan okiselijkej on neskayotl de circuncisión sano yejuamej xkichiuaj tlen kijtoua on tlanauatijli. Pero yejuamej kinekij para nenkiseliskej on neskayotl de circuncisión para yejuamej noueyiliskej pampa mechchiualtiskej xpiyakan on neskayotl de circuncisión ipan nemonakayo.

¹⁴ Pero nejua xitlaj* okse ika nikneki ninoueyilis, yej san ikan imikilis toTEKO JesuCristo ipan on kojnepanojli. Pampa itechkopa imikilis Cristo ipan on kojnepanojli, para nejua in tlaltikpaktli yomik, niman para in tlaltikpaktli nejua yonimik.

¹⁵ Tla tinemij iuan Cristo Jesús, xitlaj* kijtosneki tla otikselijkej circuncisión noso ka. Yej tlinon ueyi kijtosneki, ma tinemikan ken tiyenkuikej tlakamej ipan tonemilis.

¹⁶ Nemejuamej yejuan melauak nenikoneuan Dios, yejuan nenkinemiliaj ken onemechmachtij itechika Cristo, niktlajtlanilia Dios ma mechmaka iyolseuilis niman iteiknelilis*.

¹⁷ Desde aman para nochipa maka yakaj nechpajsolos, pampa nochi kech tilikichtik* nikpiya ipan notlalnakayo kiteititia ika nejua niitekitkau toTEKO Jesús.

¹⁸ Nokniuan, ma iueyitetlajsojtlalis* toTEKO JesuCristo, ma onya itech nemoespíritu. Ma ijki nochiua.