Gálatas 5 - El Nuevo Testamento

Cristo otechmanauij itech on tlanauatijli

¹ Cristo otechmanauij itech on tlanauatijli para tinemij tlamakaualtin. Yejua ika, xmelajkanemikan ipan on tlamakaualistli, niman maka oksejpa xmotemakakan ipan on tlanauatijli ken esclavos.

² Xnechkakikan. Nejua Pablo nemechijlia tla nemejuamej nenkimotlaliliaj on neskayotl itoka circuncisión* pampa nenkinemiliaj mechpaleuis para nenkitlaniskej temakixtilistli, tla ijkon, Cristo xuelis mechmakixtis.

³ Nikneki nikijtos oksejpa para kuajli xmatikan ika san akinon yejuan kiselis on circuncisión pampa kinemilia kipaleuis para kitlanis temakixtilistli, ika onkaj no kitlakamatis nochi on itlanauatiluan Moisés.

⁴ Nemejuamej yejuan nenkinekij para Dios kijtos ika nochi nemotlajtlakoluan yokintlapojpoluij pampa nenkitlakamatij on tlanauatijli, nenkitlalkauiyaj Cristo niman nenkitlalkauiyaj iueyitetlajsojtlalis* Dios.

⁵ Pero tejuamej itechkopa on Espíritu niman pampa tikneltokaj Cristo, titlamachixtokej ika Dios kijtos ika nochi totlajtlakoluan yokintlapojpoluij.

⁶ Tla san sekan tinemij iuan Cristo Jesús, xitlaj* kijtosneki tla tikpiyaj circuncisión* noso ka. Yej kemaj ueyi kijtosneki ma tikpiyakan totlaneltok, niman in tlaneltoktli kichiua para ma titetlajsojtlakan*.

⁷ Nemejuamej kuajli nemouikayaj. ¿Akinon tej, omechkajkayau para maka sa xtlakamatikan on tlen melauak?

⁸ Dios xejua okichiu, pampa yejua omechnots.

⁹ Sen xkuajli temachtijketl sano ijki ken tlaxokolilistli*. Ijkin nijtoua: “San achijtsin tlaxokolilistli* kajkokui nochi on tixtli de harina.”

¹⁰ Nejua niktlalia noyojlo itech toTEKO ika yejua mechpaleuis para maka nenkajkauaskej on ika nenkineltokaj Cristo. Pero kiselis icastigo on tlakatl maski san akinon yejuan mechpopoloua ipan nemotlaneltok.

¹¹ Nokniuan, ¿sekimej mechijliaj ika nejua nikteijlijtinemi ika on tlakamej ika onkaj kipiyaskej circuncisión* para kiseliskej on temakixtijli? Tla sanken* ijkon nikteijliskia, on hebreos* xnechtlajyouiltiskiaj, niman on temachtilistli itechkopa on kojnepanol* de Cristo xkitlauelmatiskiaj. Pero yejuamej sanken* nechtlajyouiltiaj.

¹² Pero on yejuan mechpasolouaj ika on circuncisión*, ¡niknekiskia yej ma kinotekilikan nochi on kampa tlapiasouaj!

¹³ Nokniuan, nemejuamej Dios omechnots para nennemiskej tlamakaualtin de on tlanauatijli. In xkijtosneki ika kuajli nenkichiuaskej on tlen xkuajli yejuan nemotlalnakayo kineki, yej nochi oksekneka xchiuakan. Xmopaleuikan cada se inuan oksekimej ikan tetlajsojtlalistli*.

¹⁴ Nochi on tlanauatiltin tlamis nencumpliroskej ijkuak nenkitlakamatiskej ijkin ken kijtoua: “Xkintlajsojtla oksekimej sano ijki ken tejua timotlajsojtla.”

¹⁵ Pero tla sano nemejuamej nemotlauelitaj niman nemouijsokij inuan oksekimej, xmotakan sano nemejuamej pampa sano nemejuamej nemoxoxotoniskej.

On tlen kineki on Espíritu oksekneka xken on tlen kineki totlalnakayo

¹⁶ Nejua in nemechijlia: Xkauilikan on Espíritu Santo ma mechyekana. Niman tla nenkitlakamatiskej on Espíritu, xnenkichiuaskej on tlen xkuajli yejuan nemotlalnakayo kineki.

¹⁷ On tlen xkuajli yejuan nemotlalnakayo keleuiya kikualania on iEspíritu Dios, niman on tlen kuajli kineki on Espíritu no kikualania on tlen xkuajli yejuan nemotlalnakayo keleuiya. Sano yejuamej noxixikouaj. Yejua ika, xnenkichiuaj san tlen nenkinekij.

¹⁸ Pero tla mechyekana on Espíritu, tla ijkon, xok mechyekana on tlanauatijli.

¹⁹ On yejuan kichiuaj tlen xkuajli keleuiya intlalnakayo, ixmachyojkej*, yejua ika on tlajtlamach* tlen xkuajli kichiuaj. Yejuamej auilnemij, kichiuaj tlen xkuajli niman xchipauak.

²⁰ Kinmauistiliaj ídolos, niman kichiuaj nauajlotl. Tlauelnemij, nokuajkualaniaj niman chauatij. San itlaj ikatsin nimantsin kualanij niman kichiuaj itlaj san para yejuamej. Texexelouaj niman ojonkuaj tesentlaliaj.

²¹ Nexikolejkej, temiktianimej, tlauantinemij, kichiuaj iluitl yejuan tepinajtij, niman kichiuaj okseki tlajtlamach* más yejuan sano ijki xkuajli. Nemechijlia oksejpa ijkon ken yonemechijlijka, ika on yejuan kichiuaj in tlajtlamach*, xuelis kalakiskej kampa Dios tlamandaroua.

²² Pero on yejuan nouikaj ken kinyekana on Espíritu, kiteititiaj miyek tlajtlamach* kuajli yejuan kisa itech on Espíritu. Yejuamej tetlajsojtlaj*, pakij, noyolseuiyaj, noijyouiyaj, tenotskej, tepaleuiyaj ikan kuajli inyojlo, nochipa kichiuaj on tlen kijtouaj,

²³ yolyemankej, niman ueli kiteltlaliaj iminxkuajlieleuilis. De nochi in tlajtlamach yejuan kuajli nochiua, on ley nion se xueli kitlajtlakolmaka.

²⁴ Niman on yejuan kineltokaj Cristo Jesús, xok kauiliaj intlalnakayo ma kichiua on tlen xkuajli keleuiyaj.

²⁵ Tikpiyaj yenkuik nemilistli itechkopa on Espíritu Santo. Yejua ika, ma tikauilikan on Espíritu Santo ma techyekana.

²⁶ Maka ma titoueyimatikan. Maka ma titokualanikan inuan oksekimej, nion maka ma titonexikolitakan inuan oksekimej.