Gálatas 4 - El Nuevo Testamento

¹ In sen ejemplo. Sen konetl yejuan okiselij sen herencia, nemis ken sen esclavo hasta noskaltis maski yejua ye iyaxka* nochi.

² Yejua ken sen esclavo, pampa ika onkaj kintlakamatis on tlakamej yejuan kiskaltiaj. Niman kejeuiliaj iherencia chika yejua noskaltia para kimakaskej hasta ipan on tonajli ijkuak itataj okijtoj kuajli para kiselis.

³ Tejuamej no ijki. Ijkuak xe uajlaya toTEKO Jesús, tinemiyaj ken tikokonej. Tejuamej ika onkatka tikintlakamatiyaj on xkuajkualtin espíritus yejuan tlamandarouaj ipan in tlaltikpaktli.

⁴ Pero ijkuak oyejkok on tonajli yejuan Dios okitlapejpenij, okuajtitlan iKonetsin yejuan otlakat itech sen siuatl. Niman pampa hebreo* katka, okitlakamat nochi itlanauatiluan Moisés,

⁵ para ouel otechmanauij de on tlanauatijli yejuan techpiyaya ken esclavos niman para Dios ouel otechselij ken ikoneuan.

⁶ Niman pampa titekoneuan, Dios okuajtitlan ipan toyojlo iEspíritu on iKonetsin. Niman on Espíritu techchiualtia para tikijliaj Dios: “¡Abba*, noTajtsin!”

⁷ Ijkon tej, cada se de nemejuamej nentekoneuan itech Dios, niman xok nenesclavos. Niman pampa nemejuamej nenikoneuan, yejua mechmaka nemoherencia pampa nenkineltokaj Cristo.

Pablo kinchikajkanotsa on tlaneltokakej

⁸ Ijkuak nemejuamej xnenkixmatiyaj Dios, nenesclavos katkaj intech dioses yejuan xmelauak dioses.

⁹ Aman nenkixmatij Dios. Más kuajli ma nikijto, mechixmati. Yejua ika, ¿tline tej, nenkinekij nemokuepaskej niman nenkitlakamatiskej on tlanauatijli, niman oksejpa nennemiskej ken esclavos?

¹⁰ Nemejuamej oksejpa yopeu nenkichiuaj iluitl ijkuak yejko on uejueyi tonaltin, ijkuak yenkuiya on metstli, ijkuak yejko on ueyixtikaj xipan niman no ijki ipan okseki tonaltin.

¹¹ Sanoyej ninomojtia nikmatis tla on tekitl yejuan onikchiu nemouan sanenkaj onikchiu.

¹² Nokniuan, sanoyej* nemechtlajtlanilia xkauakan on tlanauatijli ken nejua onikchiu. Ipan se tonajli katka, onikau on tlanauatijli para ninemis ken nemejuamej yejuan xnenhebreos. Ijkuak ninemiya nemouan, nemejuamej nochi kuajli onennechchiuilijkej.

¹³ Ye nenkimatstokej ika nikualouaya ijkuak onemechijlij on kuajli tlajtojli yejuan kiteijlia ken Dios temakixtia.

¹⁴ Maski on kualolistli yejuan onikpix sanoyej omechpajsoloj, nemejuamej xonennechtlajyelitakej nion onenkijtojkej tla xnennechseliskej. Yej onennechselijkej ken yakaj iángel Dios, noso ken sano nejua niJesuCristo yeskia.

¹⁵ Aman, ¿tlinon nemopan nochiua? ¿Kanon onkaj on pakilistli yejuan onenkipixkej nouan? Nejua uelis nikteijlis ika nemejuamej tla nenueliskiaj, hasta nenkinekiskiaj nemokixtiliskiaj nemixtololojuan para nennechinmakaskiaj.

¹⁶ ¿Aman yoninokuep nemotlauelikniu san ika nemechijlia on tlen melauak?

¹⁷ On tlakamej yejuan kinekij para nenkintlakamatiskej on tlanauatiltin nesi sanoyej mechnekij, pero xkichiuaj ikan kuajli inyojlo. Yej san kinekij mechxeloskej notech para yejuamej xkintlajsojtlakan.

¹⁸ On melauak sanoyej kuajli tla yejuamej kinekij mechpaleuiskej, pero ma kichiuakan ikan kuajli inyojlo, niman nochipa ma kichiuakan maka san ijkuak ompa nemouan ninemi.

¹⁹ Notlajsojkakoneuan, aman oksejpa nikijyouijtikaj* on tlen tekokoj nemopampa, ken sen nantli yejuan nokokoua ijkuak kinemitia ikonetsin. Niman ijkon nitlajyouijtias hasta kaman nemonemilis nokauas ken inemilis Cristo.

²⁰ Niknekiskia ninemis nemouan amantsin para más kuajli niuelis nemechnojnotsaskia. Xnikmati tej, tlinon niknemilis nemouan.

Sen ejemplo de Agar niman Sara

²¹ Nemejuamej yejuan nenkinekij para on itlanauatil Moisés mechmandaros, ¿xnenkajsikamatij tlinon kijtoua on tlanautijli?

²² On Yektlajkuilojli kijtoua ika Abraham okipix ome ikoneu. Se ikoneu okipix iuan sen esclava itoka Agar, niman okse okipix iuan Sara, on isiuau yejuan xesclava.

²³ On yejuan ikoneu on esclava san otlakat ken tlakatij nochimej tlaltikpakkokonej, pero ikoneu on yejuan xesclava otlakat itechkopa sen milagro pampa ijki Dios okiprometeroj.

²⁴ In omemej siuamej kiteititiaj on ejemplo de on ome pacto* yejuan Dios okipix inuan on tlakamej. Agar kiteititia on pacto* yejuan de tlanauatijli, yejuan Dios okinmakak on hebreos* ne ipan on tepetl itoka Sinaí. On yejuan kitlakamatij in pacto*, yejuamej esclavos itech on tlanauatijli.

²⁵ Ijkon tej, Agar nochiua ken on tepetl Sinaí ne Arabia, niman no nochiua ken on ueyikalpan Jerusalén yejuan onkaj ipan in tlaltikpaktli pampa on chanejkej ompa nemij ken esclavos.

²⁶ Pero Sara yejuan xesclava nochiua ken Jerusalén yejuan onkaj ne iluikak, niman yejua nochiua tonanaj.

²⁷ On Yektlajkuilojli kijtoua: Xmopakti, siuatl, tejua yejuan titetsakatl, yejuan xotikimpix mokoneuan. Xtsajtsi ikan paktli tejua yejuan xkaman otikpix on tlen tekokoj yejuan kijyouiya sen siuatl ijkuak kinemitia ikonetsin. Pampa maski moselti, tikimpiyas más mokoneuan xken sen siuatl yejuan kipiya iuejuentsin.

²⁸ Aman nokniuan, ijkon ken Isaac tekoneu itech Sara pampa Dios yejua ipromesa, tejuamej no titekoneuan itech Dios.

²⁹ Ismael yejuan otlakat sano ijki ken tlakatij nochimej on tlaltikpakkokonej, kitlajyouiltiaya Isaac yejuan otlakat itechkopa on Espíritu. Ijkon ken ipan on tonaltin onochiu, aman sano ijki nochiua.

³⁰ Pero ¿tlinon kijtoua on Yektlajkuilojli? Kijtoua: “Xkonkixti on esclava iuan ikoneu, pampa ikoneu on esclava xuelis kiselis on herencia yejuan kiselis ikoneu on yejuan xesclava.”

³¹ Ijkon tej, nokniuan, tejuamej ken xtitekoneuan itech on yejuan esclava, yej ken titekoneuan itech on yejuan xesclava.