Gálatas 3 - El Nuevo Testamento

On tlanauatijli noso on tlaneltoktli

¹ ¡Ay, nemejuamej chanejkej Galacia, semi nentontos! ¿Akinon omechonkajkayau para maka nenkitlakamatiskej in temachtijli yejuan melauak? Kuajli onenmechmachtij kenijki Cristo omik ipan kojnepanojli* nemopampa.

² Aman xnechijlikan, ¿onenkiselijkej on Espíritu Santo pampa onenkitlakamatkej itlanauatil Moisés, noso pampa onenkakkej niman onenkineltokakej on temachtijli itechkopa Cristo?

³ ¿Tline* semi xnenkipiyaj nemotlamachilis? Achtoj kuajli onempejkej nemouikaj ika on Espíritu Santo. ¿Aman yej nemokuepaskej para nenkitlakamatiskej on tlanauatijli ikan nemonakayo?

⁴ ¿Miyek tlajtlamach* sanenkaj onenkijyouijkej? Tla nemokuepaskej itech on tlanauatijli, on melauak sanenkaj yes.

⁵ ¿Dios mechmaka iEspíritu Santo niman kichiua milagros* nemotsajlan pampa nenkitlakamatij on tlanauatijli? ¡Melauak tej, ika ka! Yejua kichiua pampa onenkakkej on temachtijli itechkopa Cristo niman melauak nenkineltokaj.

⁶ Abraham yejua ejemplo ika Dios kintiochiua on yejuan kineltokaj. On Yektlajkuilojli kijtoua: “Abraham kuajli okineltokak on tlen Dios okijlij, niman yejua ika, Dios okiselij ken yolchipauak.”

⁷ Yejua ika tej, kuajli xmatikan ika on yejuan melauak tlaneltokaj, yejuamej teuejkakoneuan itech Abraham.

⁸ On Yektlajkuilojli yeuejkaui yokijtojka ika Dios kimpopoliuiliskia nochi intlajtlakoluan on yejuan xhebreos* ipampa intlaneltok. Yejua ika Dios okimakak in kuajli tlajtojli yejuan ijkin kijtoua: “Nochi tlaltikpaktlakatl niktiochiuas mopampa.”

⁹ Yejua ika, aman nochimej yejuan tlaneltokaj no kiseliaj on tlatiochiualistli ken okiselij Abraham.

¹⁰ Pero nochimej on yejuan kinekij kitlakamatiskej on itlanauatil Moisés, Dios kintlauelis, pampa ijki kijtoua on Yektlajkuilojli: “Dios kitlauelis on yejuan xnochipa kichiuas nochi on ken tlanauatia on tlanauatijli.”

¹¹ Pantlantitikaj tej, ika Dios xakaj kiteneua ika nochi itlajtlakoluan yokitlapojpoluij ipampa on ley: Pampa on yektlajkuilojli ijkin kijtoua: “Itechkopa itlaneltok, on yejuan yolchipauak nochipa ika nemis.”

¹² Pero itlanauatil Moisés xnouika ipan on tlaneltoktli. Yejua ika, on Yektlajkuilojli kijtoua: “On yejuan kitlakamatis itlanauatil Moisés ika onkaj kichiuas nochi tlen tlanauatia on tlanauatijli para ijkon uelis kipiyas nemilistli para nochipa.”

¹³ Cristo otechmanauiko de on tlauelijli yejuan tikseliaj itech on tlanauatijli, ijkuak okijyouij on itlauelil Dios yejuan okimakak. On Yektlajkuilojli ijkin kijtoua: “On yejuan kipilouaj ipan sen kojtli* kiselia tlauelijli.”

¹⁴ Itechkopa Cristo Jesús, Dios okintiochiu on yejuan xhebreos* sano ika on tlatiochiualistli yejuan okiprometerouilij Abraham. Ijkon tej, itechkopa totlaneltok tinochimej tikseliaj on Espíritu Santo yejuan Dios okitlalij ipan ipromesa.

On tlanauatijli niman ipromesa Dios

¹⁵ Nokniuan, nemechtlalilia sen ejemplo ken nochiua impan on tlakamej. Ijkuak yakaj tlakatl kichiua sen pacto* niman kifirmaroua, xok yakaj ueli kipopoloua itlaj, nion itlaj kipatilia.

¹⁶ Ijkon tej, Dios okitlalij ipromesa itech Abraham niman itech iuejkakoneu. Pero on Yektlajkuilojli xkijtoua: “niman intech iuejkakoneuan”, ken kiteneuaskia miyek tlakatl. Yej kijtoua: “niman itech iuejkakoneu”. Niman in kijtosneki san se tlakatl, niman on tlakatl yejua Cristo.

¹⁷ On tlen nejua nikijtoua sano yejua in. Dios okitlalij sen promesa iuan Abraham. On itlanauatil Moisés, yejuan ouajlaj ipan 430 xipan sakin*, xouel okixoxotonij niman okau ken xokuitlaj kijtosneki on ipromesa Dios.

¹⁸ Yejua ika, tla Dios techmakaskia temakixtilistli itechkopa on tlanauatijli, tla ijkon, xtikseliskiaj itechkopa on promesa. Pero Dios okimakak Abraham on temakixtilistli pampa ijki okitlalij ipan ipromesa.

¹⁹ Tla ijkon tej, ¿tline tikpiyaj on tlanauatijli? On tlanauatijli okitlalijkej para on tlakatl kititia itlajtlakol. Niman on tlanauatijli otlamandaroj hasta ijkuak ouajlaj iuejkakoneu* Abraham yejuan Dios okiprometerouilij. On tlanauatijli okitemakakej on ángeles itechkopa Moisés.

²⁰ Pero ijkuak Dios okimakak Abraham on promesa, xokinots yakaj tepaleuijketl, pampa Dios san yejua okimakak.

On tlinon ika tlapaleuiya on tlanauatijli

²¹ Tla ijkon, ¿in kijtosneki ika itlanauatil Moisés xnouika iuan ipromesas Dios? Melauak tej, ika ka. Pampa tla on tlanauatijli yejuan otikselijkej ueliskia techmakaskia nemilistli, tla ijkon, tikseliskiaj yolchipaualistli itechkopa on tlanauatijli.

²² Pero on Yektlajkuilojli kijtoua ika nochi tlakatl tlajtlakolej. Ijkon kijtoua para on yejuan kineltokaj JesuCristo uelis kiseliskej on temakixtilistli yejuan Dios okitlalij ipan ipromesa.

²³ Ijkuak xe uajlaya on tlaneltokalistli, on tlanauatijli techmandarouaya. Niman on tlanauatijli tiktlakamatiyaj hasta ijkuak ouajlaj JesuCristo.

²⁴ Ijkon tej, on tlanauatijli onkatka ken pilanketl yejuan otechcuidaroj hasta ijkuak ouajlaj Cristo. Niman ijkuak ouajlaj Cristo niman otikneltokakej, Dios kijtoua ika nochi totlajtlakoluan okintlapojpoluij.

²⁵ Pero aman, pampa tikneltokaj Cristo, on tlanauatijli xok techcuidaroua.

²⁶ Aman nemejuamej nentekoneuan itech Dios pampa nenkipiyaj tlaneltoktli itech Cristo Jesús.

²⁷ Nochimej nemejuamej yejuan onemokuatekijkej para nenkiteititiaj ika nenkineltokaj Cristo, nennemij ken Cristo onen.

²⁸ Aman xitlaj kijtosneki tla nenhebreos* noso xnenhebreos*, nenesclavos noso xnenesclavos, nentlakamej noso nensiuamej. Xitlaj kijtosneki, pampa tla nennemij san sekan iuan Cristo Jesús, nochimej nemejuamej san sekan nennemij inuan oksekimej.

²⁹ Niman tla nenteyaxkauan* itech Cristo, tla ijkon, nentekoneuan itech Abraham, niman iuan Abraham nenkiseliskej on herencia yejuan Dios okitlalij ipan ipromesa.