Gálatas 2 - El Nuevo Testamento

On apóstoles* okiselijkej Pablo

¹ Kemaj, hasta ipan majtlaktli uan naui xipan, oksejpa oniaj Jerusalén. Ijkuakon, onikuikak Bernabé, niman no onikuikak Tito.

² Oniaj pampa Dios onechpanextilij ika noneki nias. Ijkuak ompa onajsik, onikintekuitlan san yejuamej on yejuan tlayekankej, niman onikintlajtlajtouilij on kuajli tlajtojli yejuan kiteijlia ken Dios temakixtia yejuan nikteijlia intsajlan on yejuan xhebreos*. Ijkon onikinsentlalij niman onikinnots, pampa niknekiya maka kijtoskej xkuajli niman sanenkaj on tlinon nikchiua.

³ On tlayekankej okuelkakkej on tlen onikteijlij intsajlan on yejuan xhebreos. Yejua ika, xokichiualtijkej tokniu Tito yejuan ompa nouan nemiya, para kiselis on neskayotl itoka circuncisión* ipan inakayo. Xokichiualtijkej maski yejua xhebreo.

⁴ Pero sekimej yejuan xmelauak tokniuan okalakkej totsajlan san ichtaka ken teistlakojkej, pampa kinekiyaj kimatiskej tla melauak xtikintlakamatij on tlanauatiltin pampa tinemij san sekan iuan Cristo Jesús. Niman no kinekiyaj techchiualtiskej para ma tikintlakamatikan on tlanauatiltin.

⁵ Pero xkaman otiktokauilijkej otechtlamachilispatlakej, pampa otiknekkej nochipa tikejeuaskej on kuajli tlajtojli yejuan kiteijlia ken Dios temakixtia.

⁶ Pero on yejuan noteneuaj uejueyi tlayekankej, xonechijlijkej ma nikpatla on kuajli tlajtojli yejuan nikteijlia. (Xnotekiu* tla yejuamej uejueyi tlayekankej noso ka, pampa Dios xkaman techchikoita tla sekimej uejueyixtokej noso ka.)

⁷ Yej nochi oksekneka. Yejuamej on tlayekankej okimatkej ika Dios onechmakak in tekitl para nikteijlis on kuajli tlajtojli yejuan kitemaka temakixtilistli intsajlan on yejuan xkipiyaj on neskayotl de circuncisión* ipan innakayo, sano ijki ken okimakak Pedro on tekitl para kiteijlis intsajlan on yejuan kipiyaj on neskayotl ipan innakayo.

⁸ Ijkin okimatkej pampa Dios yejuan okitekitiltij Pedro ken apóstol* intech on hebreos*, no onechtekitiltij ken apóstol* intech on yejuan xhebreos.

⁹ Yejua ika Santiago, Pedro niman Juan, on yejuan más uejueyixtokej intech on tlaneltokakej, okimatkej ika melauak Dios yejua onechmakak in kuajli tekitl. Niman kemaj otechmakitskijkej nejua niman Bernabé. Ijkon otechselijkej ken incompañeros ipan itekiu Dios, niman okuelitakej para tejuamej ma tikteijlitij on itlajtol Dios ne intech on yejuan xhebreos* niman yejuamej intech on hebreos*.

¹⁰ San otechtlajtlanilijkej ma tikimelnamikikan on hebreos* mayankej yejuan tlaneltokaj ipan tiopan ne Jerusalén niman ma tikimpaleuikan ikan tomin. Niman nejua ikan paktli niman ikan noyojlo oniknek nikchiuas.

Pablo kichikajkanotsa Pedro ne Antioquía

¹¹ Más sakin* Pedro oyaj ne ipan on ueyikalpan itoka Antioquía. Niman ijkuak nejua ompa onikitak, onikchikajkanots, pampa yejua kichijtikatka on tlen xkuajli. Yejua onoxeloj intech on yejuan xhebreos.

¹² Ijkin onochiu. Ijkuak yejua ompa onen, tlakuaya inuan on tokniuan yejuan xhebreos. Niman ipan on tonaltin oualajkej sekimej hebreos de Jerusalén yejuan okinuajtitlan Santiago. Kemaj Pedro opeu kintlalkauiya niman xok tlakauya inuan, pampa kinmakajsiya kistlakoskiaj on yejuan ipan nouikaj on tlanauatijli de circuncisión.

¹³ No ijki on hebreos de Antioquía yejuan tlaneltokaj okipixkej ome inxayak, pampa no okichijkej ken Pedro okichiu. Hasta Bernabé no ompa teuan ijki okichiu.

¹⁴ Ijkuak onikitak xok ijki kichiuaj ken on kuajli tlajtojli techmachtia para tikchiuaskej, imixpan nochimej ijkin onikijlij Pedro: “Tla tejua akin tihebreo, tikchiua niman timouika ken on yejuan xhebreo, ¿tline* aman tikneki tikinkuepas on yejuan xhebreos para ma nouikakan ken hebreos?”

On hebreos niman on xhebreos nomakixtiaj san ikan intlaneltok

¹⁵ Tejuamej tihebreos pampa ijki otitlakatkej. Tejuamej tikpiyaj niman tiktlakamatij on tlanauatijli. Yejua ika, tejuamej xtitlajtlakolejkej kenon yejuan xhebreos.

¹⁶ Pero tikmatstokej ika Dios xkiteneua sen tlakatl ika nochi itlajtlakoluan yokimpopoloj pampa kitlakamati itlanauatil Moisés, yej pampa kineltoka ika JesuCristo ipampa omik ne ipan kojnepanojli*. Yejua ika, no tejuamej tikneltokaj ika JesuCristo topampa omik para ijkon Dios kiteneua ika nochi totlajtlakoluan yokintlapojpoluij. In nochiua itechkopa on totlaneltok itech Cristo niman xpampa tiktlakamatij itlanauatil Moisés. Sano ijki ken onijkuiloj ipan on Yektlajkuilojli: Dios xkijtoua ika nochi itlajtlakoluan yakaj tlakatl kintlapojpoluiya pampa kitlakamati itlanauatil Moisés.

¹⁷ Ijkuak tikneltokaj Cristo para Dios kitojua ika nochi totlajtlakoluan kintlapojpolouiya, kijtosneki ika titlajtlakolejkej no ijki ken on yejuan xhebreos. ¿In kijtosneki ika Cristo kichiua para tejuamej ma titlajtlakokan pampa xok titouikaj ipan on ley? ¡Melauak tej, ika ka! In xejua ika.

¹⁸ Tla nejua oksejpa niktlakamatis on tlanauatijli yejuan xok niktlakamatiya, tla ijkon, ninochiua tlajtlakolej.

¹⁹ Ijkuak onikmat tlinon nechijlia on tlanauatijli, onikmat ika semi nixpolijtikaj ixpan Dios. Aman tej, xok nikauilia on tlanauatijli ma nechmandaro para ijkon Dios ueli yejua nechmandaroua.

²⁰ Ijkuak Cristo omik ipan kojnepanojli, nejua no iuan onimik. Aman nejua xok ninemi, yej Cristo nemi ipan noyojlo. On nemilistli yejuan aman nikpiya ipan notlalnakayo, nikpiya ikan notlaneltok itech iKonetsin Dios, akin sanoyej onechtlajsojtlak* niman nopampa onotemakak para omik.

²¹ Nejua tej, xnikneki nikchichiuas iueyitetlajsojtlalis* Dios. Tla Dios ueliskia techtlapojpoluiliskia nochi totlajtlakoluan san ika tiktlakamatij on tlanauatijli, tla ijkon, xitlaj* ika techpaleuiskia imikilis Cristo.