Gálatas 1 - El Nuevo Testamento

Pablo kintlajkuiluiya on tlaneltokakej yejuan nemij imanian on ueyitlalpan Galacia

¹ Nejua, Pablo, niapóstol. Niapóstol* xpampa san yakajmej tlakamej onechajtitlankej. Yej niapóstol* pampa onechkalaktij JesuCristo iuan Dios on iTajtsin yejuan okiyoliuitij niman okuiteu ipan itlalkon.

² Nejua niman nochimej in tokniuan nikan nouan nemij, temechtlajpalouaj nemejuamej yejuan nentlaneltokaj ipan on ueyitlalpan Galacia.

³ Ma Dios niman toTEKO JesuCristo mechtiochiuakan, niman ma mechmakakan yolseuilistli.

⁴ On JesuCristo onotemakak san ipampa totlajtlakoluan, para on diablo* xok uelis techchiualtis ma titlajtlakokan. JesuCristo ijkon okichiu ken okinek on toTajtsin Dios.

⁵ ¡Yejua ika ma tikueyilikan Dios para nochipa! Ma ijki nochiua.

Xonkaj okse kuajli tlajtojli

⁶ Dios omechnots para nenkiseliskej temakixtilistli itechkopa iueyitetlajsojtlalis* Cristo yejuan xtechtocarouaya tikseliskej. Yejua ika, nitlamojkaita pampa nikita nimantsin ye nenkitlalkauijtokej Dios niman yopeu nenkitokaj on okse temachtijli yejuan sekimej kijtouaj ika on más kuajli temachtijli.

⁷ Pero in melauak ika xonkaj okse más kuajli tlajtojli yejuan kiteijlia ken Dios temakixtia. Yej tlinon kemaj sekimej mechmachtiaj para xojometlamatikan, niman kipatlaj on kuajli tlajtojli yejuan kiteijlia ken Dios temakixtia yejuan tikseliaj itechkopa Cristo.

⁸ Nejua onemechmachtij kenijki JesuCristo ueli techmakixtia. Yejua ika, tla semej de tejuamej, noso sen ángel yejuan ualeuas ne iluikak, kuajteijlijtias itlaj temachtijli oksekneka, ma Dios kimaka iueyi castigo.

⁹ Ijkon ken achtoj yotikijtojkaj, aman oksejpa nikijkuiloua: tla yakaj kiteijlia ken sen kuajli tlajtojli, pero xijki ken onenkiselijkaj achtopa, ma Dios kimaka iueyicastigo on tlakatl.

¹⁰ Sekimej mechijliaj ika nejua nitemachtia san para nikimpaktia on tlakamej. ¿Nemejuamej nenkinemiliaj ika nikneki nikimpaktis on tlakamej? ¡Melauak tej, ika ka! Nejua ijkon nikijtoua pampa nikneki ma nikpakti Dios. Tla niknekiskia nikimpaktiskia tlakamej, tla ijkon, xok niitekitkau yeskia Cristo.

Kenijki Pablo onochiu apóstol

¹¹ Pero tlami xmatikan nokniuan, ika on kuajli tlajtojli yejuan onemechijlij, xsan yakaj tlakatl okinejnemilij.

¹² In temachtijli xsan yakaj onikakilij nion san yakaj onechmachtij, yej onikselij pampa Cristo onechmachistij.

¹³ Nemejuamej ye nenkimatstokej kenijki ninouikaya achtoj ipan notlaneltok hebreo. Nenkimatstokej kenijki sanoyej* onikintlauelitak niman onikintlajyouiltij on yejuan kineltokaj Cristo, niman ken niknekiya nikimpopolos.

¹⁴ Ipan notlaneltok hebreo, miyekej yejuan inuan oninoskaltij nikintlaniya, pampa ikan nochi noyojlo más sanoyej kuajli nochi nikejeuaya on tlen nouejkatajuan okichijkej niman onechmachtijkej.

¹⁵ Pero Dios, ikan iueyitetlajsojtlalis* yejuan xnechtocarouaya nikselis, achtoj onechtlapejpenij ijkuak xe nitlakati para niktekipanos.

¹⁶ Ijkuak Dios okinek, onechpanextilij iKonetsin para nikinmijlis on yejuan xhebreos* on kuajli tlajtojli yejuan kiteijlia ken Dios temakixtia. Ijkuak in onochiu, xakaj itech oniaj para nikmatis tlinon nitemachtis.

¹⁷ Nion oniaj Jerusalén para onikintejtemoto on yejuan más achtojmej apóstoles xken nejua para nechijliskej tlinon niktemachtis. Yej nimantsin oniaj ne iueyitlalpan Arabia kampa noselti oninen. Niman kemaj más sakin* oninokuep para oniaj on ueyikalpan itoka Damasco.

¹⁸ Niman ijkuak opanok yeyi xipan, oniaj Jerusalén para onikixmatito Pedro. Niman kaxtojli* tonajli iuan ompa oninokau.

¹⁹ Niman no onikitak Santiago on yejuan ikniu toTEKO JesuCristo, pero xonikintak on oksekimej apóstoles*.

²⁰ Nejua nemechmelajkaijlia ixpan Dios ika in tlen nemechijkuilouilia melauak ijki onikchiu. Nejua xnemechkajkayaua.

²¹ Kemaj ijkuak onikis Jerusalén, oniaj neka ipan iueyitlalpan Siria niman Cilicia.

²² On tlaneltokakej ipan itiopanuan Cristo ne Judea xnechixmatiyaj.

²³ San kakiyaj on tlen sekimej kijtouayaj: “On yejuan achtoj techtlauelitaya niman techtlajyouiltiaya, aman yejua temachtijtinemi ika on tlaneltokalistli yejuan achtoj kinekiya kipopolos.”

²⁴ Niman kueyiliayaj Dios nopampa.