Filipenses 4 - El Nuevo Testamento

¹ Ijkon tej, notlajsojkainiuan, xmelajkanemikan san sekan iuan toTEKO. Nejua nemechtlajsojtla* niman sanoyej* nikneki nemechitas. Nemejuamej nennopakilis niman nennotlanilis.

Nochipa xpaktiakan itech toTEKO

² Sanoyej nikintlajtlanilia on siuamej, Evodia niman Síntique, ma kipiyakan san se inyojlo ken iknijtin itech toTEKO.

³ Niman tejua, notekipanojkaxiu yejuan xkaman tinechkaua ipan in tekitl, nimitstlajtlanilia xkimpaleui yejuamej in tokniuan siuamej, pampa yejuamej kuajli nouan okixikojkej on chikajkatekitl yejuan otikchijkej ika on kuajli tlajtojli yejuan kiteijlia ken Dios temakixtia. Yejuamej no otekitkej san sekan iuan Clemente niman oksekimej yejuan nouan otekitkej. Yejuamej intoka ye tlajkuilolnestokej ne ipan on amamoxtli* kampa onkaj intoka on yejuan kipiyaj nemilistli para nochipa.

⁴ Nochipa xpakikan itech toTEKO. Oksejpa nemechijlia: ¡Xpakikan!

⁵ Nochi tlakatl ma mechta ika nentenotskej. Ye nisiu para uajlas toTEKO.

⁶ Maka itlaj xkonmatstiakan, yej nochipa xchiuakan oración. Xtlajtlanilikan Dios tlen mechpaloua niman xmakakan tlaxtlauijli.

⁷ Niman Dios mechmakas yolseuilistli más ueyi yejuan xakaj uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan.

Xtlanemilikan itech on tlen kuajli

⁸ Sa ika nochi, nokniuan, xnemilikan nochi tlen melauak, nochi yejuan kipiya tetlakaitalistli, nochi tlen melajki, nochi tlen chipauak, nochi tlen tepaktia, niman nochi yejuan kipiya yekteneualistli. Xnemilikan nochi tlen más kuajli niman yejuan kipiya yekteneualistli.

⁹ Xchiuakan on tlinon onemechmachtij, niman onenkiselijkej notech, niman on tlen notech onenkakkej, niman onenkitakej onikchiu. Ijkon xchiuakan, niman Dios yejuan mechmaka yolseuilistli nemouan nemis.

Intetlayokolil on filipenses para Pablo

¹⁰ Sanoyej nipaki itech toTEKO, pampa nemejuamej oksejpa opeu nennechpaleuiyaj ikan tomin. In xnikijtosneki tla yonenkelkajkaj ika nennechpaleuiyaj, yej xe nenueliyaj nenkichiuayaj.

¹¹ Niman xnikijtoua pampa itlaj nechpolojtikaj, pampa nejua ueli ninemi ikan paktli san ika on tlen nikpiya.

¹² Nikmatstikaj kenijki ninemi ipan mayantli, niman nikmatstikaj kenijki ninemi ijkuak nochi nikpiya. Nejua niueli niknamiki san tlinon, tla ijkuak nixuitikaj noso ijkuak napismiki, tla ijkuak nikpiya miyek noso tla ijkuak nechpolojtikaj.

¹³ Nochi niueli nikselia tlen nopan nochiua pampa Cristo yejua nechpaleuiya.

¹⁴ Pero sanoyej kuajli ika onennechpaleuijkej ijkuak xitlaj* nikpiyaya.

¹⁵ Nemejuamej, yejuan nenchantij ipan on ueyikalpan Filipos, nenkimatstokej ika ijkuak achtopa onikis ipan nemoregión de Macedonia ijkuak yonemechijlijka on kuajli tlajtojli, xakaj oksekimej tlaneltokakej onechpaleuijkej ikan tetlayokolijli*, yej san nemejuamej.

¹⁶ Chika nejua sanken* ninemiya Tesalónica, nemejuamej keskipa onennechtitlanilijkej ofrenda.

¹⁷ Xkijtosneki ika nikneki nikselis itlaj tetlayokolistli de nemejuamej. Yej tlinon nejua nikneki más xmiyekilikan nemotetlayokolil ne ixpan Dios.

¹⁸ Niman nejua yonikselij nochi, niman hasta más yonikselij. Desde onennechajtitlanilijkej nemotetlayokolil yejuan okuajkik Epafrodito, xok nechpoloua. In ofrenda ajuiyak ken itlaj popochtli* yejuan on tlakamej kipopotsaj ijkuak kimakaj Dios sen uentli, yejuan Dios kiselia, niman kipaktia.

¹⁹ NoDios mechmakas nochi tlen nemejuamej mechpoloua itechkopa iueyi riquezas yejuan onkaj iuan Cristo Jesús.

²⁰ Dios toTajtsin ma kipiya ueyilistli para nochipa. Ma ijki nochiua.

Sa ika nochi tetlajpalouilistli

²¹ Xkintlajpalokan cada se on ikoneuan Dios itechkopa JesuCristo. In tokniuan yejuan nikan nouan nemij no mechtlajpalouaj.

²² No ijki mechtlajpalouaj nochimej on tlanelkokakej itech Dios yejuan nemij nikan Roma, niman más yejuamej on yejuan tekitij itech César, on más ueyi tekiuaj, ipan in ueyi país Roma.

²³ Ma toTEKO JesuCristo mechmaka iueyitetlajsojtlalis nochimej nemejuamej. Ma ijki nochiua.