Filipenses 3 - El Nuevo Testamento

On tlen melauak melajkanemilistli

¹ Niman aman nokniuan, xpakikan pampa nenkineltokaj toTEKO. Para nejua xnechpajsoloua oksejpa nemechijlis on tlen yonemechtlajkuiluijka, niman kuajli para oksejpa nikijtos para maka nenkipoloskej nemotlaneltok.

² Xmotakan sano nemejuamej de on tlakamej yejuan ken chichimej yejuan kichiuaj on tlen xkuajli niman kinekij mechtlaliliskej ipan nemonakayo on neskayotl itoka circuncisión*.

³ Tejuamej yejuan tikmauistiliaj Dios itechkopa on Espíritu Santo tikipiyaj on circuncisión yejuan melauak. Xtiktlaliaj toyojlo para tikseliskej temakixtilistli itech on tlen nochiua ipan tonakayo, yej tipakij pampa tinemij san sekan iuan Cristo Jesús.

⁴ Xniktlalia noyojlo itech nonakayo, maski niueliskia niktlaliskia. Tla yakaj ueli ijki itech notlamiya inakayo, nejua más niueliskia nikchiuaskia,

⁵ pampa ipan chikueyi tonajli ijkuak oninen onikselij ipan notlalnakayo on neskayotl itoka circuncisión. No ijki nejua nihebreo, niman niualeua itech nouejkatataj Benjamín. No nitlajtlajtoua ika on tlajtojli hebreo* yejuan intlajtol* notajuan, niman kuajli onikejeu on tlanauatijli pampa nifariseo* katka.

⁶ Sanoyej onikintlauelitak niman onikintlajyouiltij on yejuan kineltokaj Cristo. Niyolmelaki katkaj. Xakaj kipiyaya tlinon kijtos notechkopa, pampa onikchiu nochi ken on tlanauatijli kijtoua.

⁷ Pero in miyek tlajtlamach* yejuan achtoj sanoyej ueyi kijtosnekiya para nejua, aman nikita ken xitlaj kijtosneki ipampa Cristo.

⁸ Xok ueyi kijtosneki on tlajtlamach* pampa más ueyi kijtosneki ika nikixmati JesuCristo ken noTEKO. Ipampa Cristo nochi on tlajtlamach* onikau niman nikita ken itlaj tlajsojli para ueli niknoyaxkatia Cristo,

⁹ niman para Dios nechita san sekan ninemi iuan Cristo. Yejua nechita ika niyolmelajkatlakatl, xpampa onikchiu nochi tlen on tlanauatijli kijtoua, yej pampa nikneltoka noCristo. In yolmelajkilistli Dios techmaka itechkopa totlaneltok.

¹⁰ Nikneki nikixmatis Cristo, niman ipan in nemilistli yejuan amantsin nikpiya nikneki nikpiyas on ipoder yejuan okiselij ijkuak oyoliu* niman onokuiteu ipan itlalkon. Niman no nikneki nikijyouis on tlen yejua okijyouij, niman nimikis ken yejua omik.

¹¹ Niman nitlamacha ika no niuelis niyoliuis* niman ninokuiteuas intech on mikatsitsimej.

Xmokojtilikan para nennemiskej ken Dios kineki

¹² Nejua xnikijtosneki tla nochi ye nikpiya, noso tla aman najsitikaj* ken sen tlakatl yejuan nochi kuajli ipan inemilis. Pero kemaj ninokojtilijtiu niman nitlamacha ika ajsis on tonajli ijkuak ninemis ken Cristo kineki, pampa yejua ika Cristo onechnots achtoj.

¹³ Nokniuan, maski xe ninemi ken Christo kineki, nikelkaua nochi tlen nokaua tlakuitlapan niman nikchiua kanika para nikajsis on tlen onkaj tlayakapan.

¹⁴ Ijkon ken sen telpochtli yejuan teuan notlatlaloua kampa notlatlanij sanoyej noyolchikaua para tetlanis, nejua no ijki. Sanoyej ninoyolchikaua para niktlanis on tlanilistli yejuan Dios kineki nikselis ne iluikak pampa ninemi san sekan iuan Cristo Jesús.

¹⁵ Ijkon tej, nochimej nemejuamej yejuan kuajli yochikau nemotlaneltok, no ijki noneki xnemilikan ken nejua niknemilia. Tla itlaj oksekneka nenkinemiliaj, Dios no mechititis tlen kuajli.

¹⁶ Pero yej kemaj, ma tikejeuakan nochi on tlen kuajli ye tikpiyaj.

¹⁷ Nokniuan, san sekan xtokakan noejemplo ijkon ken ninouika. Niman xkintakan on yejuan kitokaj noejemplo,

¹⁸ pampa miyekpa yonemechijlij niman oksejpa nemechijlia hasta ikan nixayo, ika miyekej nemij yejuan xkixtlajsojtlaj on tlen okijyouij Cristo ipan kojnepanojli*.

¹⁹ On kenomej komintlajkaliskej ipan miktlan pampa imindios nochiuaj sano inmijtij. Yejuamej noueyimatij ika on tlen kitocaroua pinauaskiaj niman san konmatstokej on tlen onkaj ipan in tlaltikpaktli.

²⁰ Pero tejuamej ye tichanejkej ne iluikak. Niman aman sa tikchixtokej on Temakixtijketl, toTEKO JesuCristo, ma ualeua de ne iluikak,

²¹ para techpatilis totlaltikpaknakayo yejuan mikis, para no ijki nokauas ken de yejua, yejuan okiselij ijkuak otlejkok ne iluikak. Ijkon kichiuas ikan ipoder yejuan kipiya para kimandaroua nochi tlajtlamach*.