Filipenses 2 - El Nuevo Testamento

Iyolyemanilis niman iueyilis Cristo

¹ Tla Cristo nochi ika mechyoleua, pampa san sekan iuan nennemij, tla itetlajsojtlalis* mechyoltlalia, tla nennemij san sekan iuan iEspíritu Dios, niman tla nenkixmatij itetlajsojtlalis* niman iteiknelilis*,

² tla ijkon, xnechajxiltilikan on paktli. Xpiyakan san se tlanemilijli. Cada se xmopiyalikan san se tetlajsojtlalistli*. San se nemoyojlo niman san se tlamachilistli xpiyakan.

³ Maka itlaj xchiuakan ikan nexikojli nion maka nenkinekiskej nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej.

⁴ Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli.

⁵ Sano ijki xtlanemilikan ken Cristo tlanemilia.

⁶ Maski Cristo sano yejua Dios, yejua xokixtlajsojtlak on ueyilistli yejuan Dios kipiya. Yejua ika tej, ipan achitsin tiempo xok onen ken Dios nemi.

⁷ Ijkon okinokixtilij on iueyilis niman onochiu ken sen esclavo.

⁸ Niman ijkuak onochiu tlakatl, yejua onoknonelij, niman okitlakamat Dios hasta kaman omik, maski on imikilis sanoyej* tepinajtij katka ne ipan kojnepanojli*.

⁹ Yejua ika, Dios okimakak más ueyilistli yejuan xakaj okse kipiya, niman itokatsin yejua más ueyi kijtosneki xken yakaj okse kipiya itoka.

¹⁰ Yejua ika, ijkuak kakiskej kiteneuaj iTokatsin, nochimej on yejuan nemij iluikak niman ipan in tlaltikpaktli, niman no yejuan yomikkej, ma notlakuantelketsakan ixpan.

¹¹ Ijkon okichiu para nochimej ma kixmatikan niman ma kijtokan ika yejua toTEKO, niman ijkon Dios toTajtsin kiselis ueyilistli.

On tlaneltokakej ken tlauiltin ipan in tlaltikpaktli

¹² Ijkon tej, notlajsojkaikniuan, ijkon ken nemejuamej nochipa nennechtlakamatij ijkuak nemouan ninemi, más xnechtlakamatikan aman ika uejka ninemi. Aman tej, nemejuamej más xmotekimakakan ipan nemotemakixtilis ikan yolyemanilistli niman tlakaitalistli.

¹³ Ijkon xchiuakan, pampa Dios tekiti ipan nemoyojlo. Yejua kichiua para xnekikan niman xchiuakan on tlen yejua kineki.

¹⁴ Nochi tlen nenkichiuaskej, xchiuakan, pero maka tlamach xkijtokan nion maka xmokamauijsokikan,

¹⁵ para xonyas tlinon ika mechtlajtlakolmakaskej niman para nenchipajtiaskej ken nentekoneuan yejuan xkipiyaj mancha ixpan Dios. Ijkon xchiuakan intsajlan on xkuajkualtin tlakamej yejuan xkuajli tlanemiliaj, kampa nempetlanij ken on sitlalimej yejuan petlanij ipan cielo.

¹⁶ Nochipa xkejeuakan on kuajli tlajtojli yejuan kitemaka nemilistli para ijkuak uajlas Cristo, nipakis pampa nikmatis ika on tekitl yejuan onikchiu nemotsajlan xsanenkaj onikchiu.

¹⁷ Maski noyesyo kitoyauaskej ken sen uentli de vino para kajxitis nemouen yejuan nenkipiyaj itechkopa nemotlaneltok niman on tlen nenkichiuaj para Dios, nikpiyas miyek paktli niman nipakis nenmouan.

¹⁸ Yejua ika tej, xpakikan, niman nouan xpiyakan pakilistli.

Timoteo niman Epafrodito

¹⁹ Tla toTEKO Jesús kineki, saniman niktitlanis Timoteo para mechontas. Nikmatstikaj ika ijkuak oksejpa uajlas notech, nechyoleuas ika on tlen nechijlis de nemejuamej.

²⁰ Xnikpiya okse yejuan no ijki kinemilia ken nejua, yejuan melauak notekimakas kichiuas tlen kuajli para nemejuamej.

²¹ Oksekimej kitejtemouaj tlen kuajli san para yejuamej, niman xejuan para Cristo Jesús.

²² Pero nemejuamej nenkimatstokej ika Timoteo sanoyej kuajli nechpaleuiya. Nenkimatstokej kenijki otekit ken nokoneu yeskia para tikteijliaj on kuajli tlajtojli.

²³ Yejua ika tej, nikcha saniman nemechtitlanilis ijkuak yonikitak kenijki nopan nochiuas.

²⁴ Niman kuajli nikmati ika tla toTEKO kineki, nejua no saniman nemechontas.

²⁵ Nikita noneki nemechtitlanilis tokniu Epafrodito yejuan onenkuajtitlankej para onechpaleuij ika on tlen nechpolouayaj. Yejua nokniu itech Cristo niman otekit nouan para tikmanauiyaj on kuajli tlajtojli.

²⁶ Yejua sanoyej mechonmati niman kineki mechontas para nenkimatiskej ika kuajli nemi pampa onenkimatkej ika yejua kualouaya.

²⁷ Melauak yejua kualouaya, niman ye mikiya. Pero Dios okiknelij*, niman xsan yejua, yej nejua no onechiknelij* para xonikpix más ajmantli aparte de in yejuan ye nikpiya.

²⁸ Yejua ika, más nikneki para niktitlanis, para ijkuak oksejpa nenkitaskej nempakiskej. Niman no ijki nejua xmás ninajmantias ijkuak nikmatis ika nemejuamej yonenkitakej ika xok kualo.

²⁹ Xselikan ikan nochi paktli ken itekitkau toTEKO, niman nochipa xpiyakan tetlakaitalistli intech on yejuan no ijki ken yejua.

³⁰ Ijkon xselikan pampa yejua ye mikiya ipampa itekiu Cristo. Okitlalij inemilis kampa ye mikiskia san para onechpaleuiko ika on tlen nemejuamej xouel onennechpaleuijkej.