Filipenses 1 - El Nuevo Testamento

Ijkuak tsakutikatka Pablo okintlajkuiluij on tlaneltokakej yejuan chantij Filipos

¹ Nejua, Pablo, niman Timoteo, yejuan tiitekipanojkauan JesuCristo, temechtlajkuiluiyaj nochimej nemejuamej yejuan nenyolchipajkej itech Cristo. Niman no tikintlajkuiluiyaj nemoancianos niman nemodiáconos* yejuan nennemij ipan on ueyikalpan Filipos.

² Ma Dios niman toTEKO JesuCristo mechtiochiuakan niman ma mechyolseuikan.

Pablo okichiu oración impampa on tlaneltokakej

³ Nochipa ijkuak nemechelnamiki, nikmaka tlaxtlauijli noDios.

⁴ Ijkuak nikchiua oración para nemejuamej, nochipa nikchiua ikan paktli,

⁵ pampa desde onenkiselijkej on kuajli tlajtojli yejuan kiteijlia ken Dios temakixtia hasta aman, nouan nentekitij para tikteijliaj on kuajli temachtijli.

⁶ Kuajli nikmatstikaj ika Dios, yejuan opeu kichiua kuajli itekiu ipan nemoyojlo, ijki kichijtias hasta ipan on tonajli ijkuak JesuCristo uajlas.

⁷ Kuajli para ijkon niknemilis nemotech, pampa nemechpiya ipan noyojlo, niman pampa nemejuamej onenkiselijkej on iueyitetlajsotlalis Dios ken nejua onikselij. Ijkon nikchiua maski nitsakutikaj, noso ninemi imixpan on tekiuajkej kampa nikmanauiya niman niktemelajkaijlia on tlen melauak de on kuajli tlajtojli yejuan kiteijlia ken Dios temakixtia.

⁸ Dios kimati ika sanoyej* nemechtlajsojtla* nemochimej* ikan on iselikatetlajsojtlalis yejua kisa itech iyojlo JesuCristo.

⁹ Niktlajtlani ipan nooración para más ma miyekiya nemotetlajsojtlalis*, nemotlamatkilis niman nemokajsikamatilis,

¹⁰ para ijkon nochipa nenkimatiskej kenijki nenkitlapejpeniskej on tlen más kuajli. Ijkon uelis nenkipiyaskej sen nemilistli chipauak, niman xonyas tlinon ika mechtlajtlakolmakaskej ijkuak Cristo uajlas.

¹¹ Ijkon nenkichiuaskej nochi tlen kuajli pampa Cristo mechpaleuis. Niman ijkon nenkueyiliskej Dios, niman yejua kiselis on yekteneualistli.

Para nejua on nemilistli sano yejua Cristo

¹² Nokniuan, nikneki xmatikan ika aman más miyek tlakatl kaki niman kineltoka on kuajli tlajtojli yejuan kiteijlia ken Dios temakixtia ipampa nochi on tlen nopan onochiu.

¹³ Aman tej, nochimej on soldados yejuan nemij ipan palacio, niman nochimej oksekimej kimatstokej ika nitsakutikaj pampa nikneltoka Cristo.

¹⁴ Niman más miyekej tokniuan kipiyaj ipan inyojlo para kitemachtiaj on itlajtol Dios ikan más yolchikaualistli, niman xikan nemojtijli, pampa nikan nitsakutikaj.

^15-17 On tej, melauak ika sekimej kiteijliaj on temachtilistli de Cristo pampa nechnexikolitaj niman pampa nechyakapanauisnekij ikan on tetlakaitalistli yejuan nemotech nikpiya. Yejuamej kiteijliaj on temachtijli xikan yolchipaualistli, niman kinekij noueyiliskej. No ijki kinemiliaj nechtlajyouiltiskej aman chika nitsakutikaj. Pero oksekimej kiteijliaj on temachtilistli ikan kuajli inyojlo. Yejuamej kichiuaj ikan tetlajsojtlalistli*, pampa kimatstokej ika Dios okitekauilij para onechtsakukej para nikmanauis on kuajli tlajtojli yejuan kiteijlia ken Dios temakixtia.

¹⁸ Pero xueyi kijtosneki tla on tlakamej tenojnotsaj de Cristo ikan kuajli iminyojlo noso ka. Yej ueyi kijtosneki ika tenojnotsaj de Cristo. Niman in yejua nechpaktia, niman más nipakis

¹⁹ pampa nikmatstikaj ika on nemooraciones niman ikan itlapaleuilis iEspíritu JesuCristo, nochi kuajli nopan nochiuas.

²⁰ Tlinon nejua sanoyej nikneki niman nikcha para maka itlaj ika ninopinajtis ixpan Dios, yej nitlajtos ikan nochi yolchikaualistli para Cristo, ken nochipa onitlajtoj. Niman nejua nikneki nikueyilis Cristo san kenijki tla ikan nonemilis noso ikan nomikilis.

²¹ Tla ninemis uelis niktekipanos Cristo, niman tla nimikis niktlanis nochi on tlen Dios nechmakas.

²² Tla ninemis ipan in tlaltikpaktli, uelis más nitekitis para Cristo. Yejua ika, xueli nikmati katlejua más nikneki, tla nomikilis noso nonemilis.

²³ Sanoyej ouijtikaj* tlinon más kuajli para nejua. Niknekiskia nimikis para nias itech Cristo, pampa on más kuajli yeskia para nejua.

²⁴ Pero más kuajli para nemejuamej ninemis ipan in tlaltikpaktli, para uelis nemechpaleuis.

²⁵ Yejua ika, kuajli nikmatstikaj ika nemouan ninokauas para nemechpaleuis más nemoskaltiskej, niman para más nenkipiyaskej pakilistli ipan nemotlaneltok.

²⁶ Yejua ika, pampa oksejpa nias nemouan, más nenkipiyaskej tlinon ika nenkueyiliskej Cristo Jesús.

²⁷ San noneki xnemikan kuajli ijkon ken kijtoua on kuajli tlajtojli de Cristo. Ijkon, tla nejua nias nemechontas, noso uejka ninemis nemotech, nikmatis ika nemejuamej nenmelajkanemij san sekan ikan se tlamachilistli niman san se nemoyojlo para nenkimanauiskej on tlaneltoktli yejuan ualeua itech on kuajli tlajtojli.

²⁸ Ijkon tej, nesis ika xnenmokauiliaj ma mechmomojtikan on yejuan nemotlauelikniuan. Tla xnemomojtiaj, nenkintitiaj ika yejuamej yauij ipan ixpoliuilistli pero nemejuamej Dios mechmakixtis.

²⁹ Ipampa Cristo, Dios omechkauilij xsan para nenkineltokaskej Cristo, yej para no nentlajyouiskej ipampa.

³⁰ Nemejuamej niman nejua sano ijki nemoxixikouaj. Yonenkitakej kenijki yoninoxixikoj niman oksekimej no mechijliaj kenijki ninoxixikojtiu.