El Apocalipsis 9 - El Nuevo Testamento

¹ Kemaj on ika makuijli ángel okipits itrompeta niman onikitak sen sitlalin yejuan oualeu ipan cielo*, niman ouetsiko ipan tlaltikpaktli. On sitlalin okimakakej on llave para okitlapoj on pozo yejuan xnejsi kech ika uejkatlan.

² Yejua tej, okitlapoj on pozo, niman ijtik on pozo okis sanoyej* miyek poktli ken ijkuak popoka sen ueyi horno. Niman ika on poktli on tonaltsintli niman on cielo otlilejkej.

³ Ipan on poktli, okiskej on ken chapolimej yejuan xiniyaj ipan in tlaltikpaktli. On ken chapolimej okiselijkej poder para tekuaskej ken tekuaj kolomej.

⁴ Okinnauatijkej para nion xojtli maka ma kikuakan, nion itlaj yejuan xoxojki, nion sen kojtli*, yej san ma kintlajyouiltikan on tlakamej yejuan xkipiyaj isello Dios ipan inmixkuatipan.

⁵ Yejuamej tej, xokinkauilijkej kinmiktiskej on tlakamej, yej okinmijlijkej san ma kintlajyouiltikan makuijli metstli. Niman on tlen tekokoj kitetlaliliyayaj, sano ijki ken on kolotl kitlalia ipan sen tlakatl ijkuak kikua.

⁶ Ipan on tonaltin nochi tlakatl kinekis nomiktis, pero xok ueliskej mikiskej. Sanoyej kinekiskej mikiskej, pero ijkuakon on mikilistli xok onyas.

⁷ On yolkej yejuan ken chapolimej nesiyaj, katkaj ken caballos yejuan nemij listos para yaskej ipan nouijsokilistli. Yejuamej kipiyayaj itlaj ipan intsontekon ken sen corona tlachijchijtli ikan oro. Niman kipiyayaj inxayak ken yakaj tlakatl ixayak.

⁸ Kipiyayaj intson ken itson yakaj siuatl, niman intlauan ken itlauan sen león.

⁹ Intlalkayo tlapachijtikatka ikan itlaj yejuan nesi ken tepostli yejuan ika nomanauiyayaj. Ijkon ken kakistij on carretas ijkuak on caballos kintlalochtiaj para ipan nouijsokilistli, no ijki kakistiyaj inmastlakapaluan.

¹⁰ Kipiyayaj inkuitlapil niman tekuayaj ken kolomej tekuaj. Ipan inkuitlapil kipiyayaj poder para makuijli metstli kintlayouiltiskej on tlakamej.

¹¹ Yejuamej kipiyayaj sen ángel ken intlayekankau yejuan chanti ipan on pozo yejuan xnesi kech ika uejkatlan. Yejua itoka Abadón ikan hebreo* tlajtojli niman Apolión ikan griego* tlajtojli. Apolión kijtosneki tlaxoxotonijketl.

¹² On achtoj tlaxoxotonilistli yopanok, pero okse ome ye uajlau.

Okipitskej on ika chikuasen trompeta

¹³ Kemaj, on ika chikuasen ángel okipits itrompeta, niman onikak sen tlajtojli kakistiya intsajlan on naui ken itlaj ikuakuautsitsiuan yejuan onkatkaj ipan cada esquina de on tlaixpan* tlachijchijtli ikan oro yejuan onkatka ixpan Dios.

¹⁴ On tlajtojli okinauatij on ika chikuasen ángel yejuan kipiyaya itrompeta: “Xkintojtoma on nauimej ángeles yejuan salijtokej itech on río itoka Éufrates.”

¹⁵ On nauimej ángeles okintojtonkej. Yejuamej tej, yokintlalijkaj listos para ipan on mismo hora, tonajli, metstli, niman xiutli kinmiktiskej se parte de nochi on kech yexkantipan tlakamej nemij ipan tlaltikpaktli.

¹⁶ Niman onikak okintenejkej 200 millones soldados yejuan kipiyaj incaballos.

¹⁷ Onikintak on caballos niman on yejuan impan yetiayaj. On yejuan impan yetiayaj yelpantlapachijtiayaj ikan on ken itlaj tepostli yejuan ika nomanauiyayaj. Niman on tepostli, yeyi color kipiyaya: chichiltik ken tlitl, azul ken on tetl itoka zafiro niman kostik ken azufre. Niman on caballos kipiyayaj intsontekon ken intsontekon leones. Niman ipan inkamak kisaya tlitl, poktli niman azufre.

¹⁸ Ika on yeyi plagas de tlitl, poktli niman azufre yejuan kisaya inkamak on caballos, omikkej se parte de nochi on yexkantipan tlakamej nemij ipan tlaltikpaktli.

¹⁹ Niman on caballos kipiyayaj poder ipan inkamak niman ipan inkuitlapil, pampa inkuitlapil kipiyayaj intsontekon ken kouamej* niman ika sanoyej tejkuajkuayaj.

²⁰ On tlakamej yejuan xomikkej ikan on plagas xokajkajkej kichiuaj on tlen xkuajli. Yej sanken* kinmauistiliayaj on xkuajkualtin espíritus, niman on ídolos yejuan tlachijchijtin ikan oro, plata, bronce, tetl niman kojtli*, maski on ídolos xuelij tlachaj, nion tlakakij, nion nejnemij.

²¹ Niman no xokajkajkej ika temiktiayaj, tenaualuiyayaj, on ika auilnemiyaj, nion ika tlachtekiyaj.