El Apocalipsis 8 - El Nuevo Testamento

On ika chikome sello okitsayankej

¹ Ijkuak on Borreguito okitsayan on ika chikome sello, ne iluikak kanaj tlajko hora xokuitlaj okakistik.

² Kemaj ne ixpan Dios, onikintak chikomemej ángeles ompa majmaniyaj, niman cada se okiselij sen trompeta.

³ Kemaj ouajlaj okse ángel niman onotelkets ixpan on tlaixpan* ikan sen tlikontli tlachijchijtli ikan oro. Ompa okimakakej miyek kopajli para san sekan kitlalis iuan inoraciones on yejuan yolchipajkej itech Dios. Niman okiuentlalij on kopajli ipan on tlaixpan* tlachijchijtli ikan oro yejuan onkaj ixpan on ueyixtikaj trono.

⁴ Niman ipokyo on kopajli, yejuan onejtikatka ipan ima on ángel iuan inoraciones on yejuan yolchipajkej, oajsik hasta ixpan Dios.

⁵ Kemaj on ángel okontilan on tlikontli, niman okitemiltij ikan itlixochyo on tlitl yejuan onkatka ipan on tlaixpan*, niman okontlajkal ipan on tlaltikpaktli. Kemaj, nimantsin opeu tlakomoni, tlakokomoka, tlapetlani niman tlalolini.

On ángeles kipitsaj intrompetas

⁶ Más sakin*, on chikomemej ángeles yejuan kipiyayaj on chikome trompetas, ouajnomankej para tlapitsaskej.

⁷ Kemaj on achtoj ángel okipits itrompeta. Ijkuak okipits itrompeta, ipan on tlaltikpaktli otejsiu, niman ouets tlitl yejuan nelijtikaj ikan yestli. Niman on yexkantipan de on tlaltikpaktli, se parte otlatlak iuan nochi on kojyoj niman on xojyoj iuan on sakayoj.

⁸ Kemaj on ika ome ángel okipits itrompeta niman ne ipan mar okontlajkalkej on ken sen ueyi tepetl tlikuitiu. Niman de nochi on yexkantipan on kech onkatka mar, se parte onochiu yestli.

⁹ De nochi on yexkantipan on kech nemiyaj yolkej ijtik mar, se parte omikkej. Niman de nochi on yexkantipan kech onkatkaj barcos ipan on mar, se parte oxoxotonkej.

¹⁰ Kemaj on ika yeyi ángel okipits itrompeta, niman sen ueyi sitlalin oualeu ipan cielo yejuan uajtlikuitiaya ken sen okopijli*. De nochi on yexkantipan kech ríos niman ameyaltin onkatkaj ipan in tlaltikpaktli, se parte impan ouets.

¹¹ On sitlalin itoka katka chichiyalistli. Yejua ika, de nochi on yexkantipan kech onkatka atl ipan in tlaltikpaktli, se parte ochichiyak niman miyek tlakatl omik.

¹² Kemaj, on ika naui ángel okipits itrompeta, niman okimotlakej yexkantipan on tonaltisintli, on metstli niman on sitlalimej. Yejua ika tej, nochi on yexkantipan kech tlauijli kipiyayaj okipolojkej. Ijkon tej, xok otlauilpantik ipan se parte de on tonajli niman de on yeuajli.

¹³ Kemaj onikitak sen kuaktli yejuan patlantinemiya ixko on cielo. Niman ikan chikauak tlajtojli onikak okijtoj: “¡Lástima, lástima, lástima para on yejuan chantij ipan on tlaltikpaktli, yejua ika on tlen nochiuas ijkuak on okse yeyimej ángeles kipitsaskej intrompeta!”