El Apocalipsis 7 - El Nuevo Testamento

144 mil hebreos* okinmarcarojkej

¹ Kemaj onikintak ijkayaj nauimej ángeles naukan iyeualkan in tlaltikpaktli. Niman yejuamej kiteltijtikatkaj on naui ajakatl yejuan onkaj ipan in tlaltikpaktli, para maka ma ajaka ipan tlajli, nion ipan mar, niman nion siquiera ipan sen kojtli*.

² Niman kemaj, ne ika ikisayan tonaltsintli, onikitak ompaka uajtlejkotiaya okse ángel kuajkiya isello Dios on yejuan nochipa nemi. On ángel chikauak okintsajtsilij on nauimej ángeles yejuan kipiyaj poder para tlaijtlakoskej ipan in tlaltikpaktli niman ipan mar.

³ Ijkin okinmijlij: “Maka xkijtlakokan on tlaltikpaktli, nion on mar, nion on kojtin* hasta ma tlami ma tikintlalilikan sen sello ipan inmixkuatipan on itekitkauan Dios.”

⁴ Niman kemaj onikak okintenejkej 144 mil tlakatl yejuan okintlalilijkej sello. Yejuamej okiskej intech on majtlaktli uan ome tribus* de on israelitas.

⁵ Ijkin okintenejkej on yejuan okinixmachyotijkej: On yejuan kisaj itech itribu* Judá, 12 mil, on yejuan kisaj itech itribu* Rubén, 12 mil, on yejuan kisaj itech itribu* Gad, 12 mil,

⁶ on yejuan kisaj itech itribu* Aser, 12 mil, on yejuan kisaj itech itribu* Neftalí, 12 mil, on yejuan kisaj itech itribu* Manasés, 12 mil,

⁷ on yejuan kisaj itech itribu* Simeón, 12 mil, on yejuan kisaj itech itribu* Leví, 12 mil, on yejuan kisaj itech itribu* Isacar, 12 mil,

⁸ on yejuan kisaj itech itribu* Zabulón, 12 mil, on yejuan kisaj itech itribu* José, 12 mil niman on yejuan kisaj itech itribu* Benjamín, 12 mil.

Sanoyej miyek tlakatl kiyekteneua on Borreguito

⁹ Ijkuak in yopanok, kej onikitak ouajnonextijkej nixpan sanoyej* miyek tlakatl yejuan xakaj ueliya kipouaya yejuan oualejkej de nochi naciones, tribus, razas niman yejuan tlajtouaj oksesekneka tlajtoltin. Yejuamej in sanoyej tojlamej majmaniyaj ixpan on trono* niman ixpan on borreguito. Nochimej tlaken istakej katkaj, niman kipiyayaj ipan iminma sen kualtsin isoyayo dátil.

¹⁰ Ikan chikauak tlajtojli nochimej tsajtsiyaj, niman ijkin kijtouayaj: ¡“Yotechmakixtij toDios yejuan yeuatikaj ipan iueyitrono niman no on Borreguito!”

¹¹ Nochimej on ángeles kiyeualojtikatkaj on ueyixtikaj trono, on ueuetkej tlayekankej, niman on nauimej yejuan ken itlaj yolkej tlajtlachayaj. Yejuamej tej, ixpan on ueyixtikaj trono* onotlakuantelketskej niman onopachojkej hasta ipan tlajli, niman okimauistilijkej Dios.

¹² “Yejuamej kitouayaj: ¡Ma ijki nochiua! Ma toDios kiseli aman niman para nochipa on yekteneualistli, on ueyilistli, on tlamatkilistli, on tetlajsojkamachilistli, on tetlakaitalistli, on poder niman on chikaualistli. Ma ijki nochiua.”

¹³ Kemaj semej on ueuetkej tlayekankej onechtlajtoltij: “¿Akinomej in yejuan tlakemejkej ikan istak tlakentli*? niman ¿Kanon oualejkej?”

¹⁴ Nejua onikijlij: “Señor, tejua tikmati akinomej niman kanon oualejkej.” Niman yejua onechijlij: “In yejuamej on yejuan youajkiskej ipan on temojtij tlajyouilistli. Niman yejuamej okimpakkej intlakeuan niman okimistalijkej ikan iyesyo on Borreguito.

¹⁵ Yejua ika tej, nemij ixpan on ueyixtikaj trono* niman kitekipanouaj Dios ikan tonajli niman yeuajli ipan iueyitiopan. Niman on yejuan yeuatikaj ipan on ueyixtikaj trono* kinmanauis pampa chantis inuan.

¹⁶ Yejuamej tej, xok kaman apismikiskej nion amikiskej. Yejuamej xok kintlatis on tonaltsintli, nion xok tonalmikiskej,

¹⁷ pampa on Borreguito yejuan nemi ixpan on ueyixtikaj trono* kincuidaros ken sen tlajpixki. Yejua tej, kimpiyas ken borreguitos, niman kinuikas kampa meya atl yejuan kitemaka nemilistli. Niman Dios kimpojpouilis nochi inmixayo.”