El Apocalipsis 6 - El Nuevo Testamento

Juan okitak on Borreguito ken okintsayan on chikome sellos

¹ Kemaj onikitak on Borreguito okitsayan on achtoj sello. Ijkuak okitsayan, onikak itlajtol se de on nauimej yejuan ken itlaj yolkej tlajtlachayaj. Itlajtol kakistiya ken itlaj tlakomonajli, niman onechijlij: “¡Xuajla niman xkita!”

² Onontlachix, niman onikitak sen caballo istak. On yejuan ipan yetiaya kitkiya sen arco niman iflecha. Okimakakej sen corona, niman okisteu ken sen tetlanketl para ontetlanis.

³ Ijkuak on Borreguito okitsayan on ika ome sello, onikak ijkuak on ika ome ken itlaj yolki tlajtlachaya onechijlij: “¡Xuajla niman xkita!”

⁴ Onontlachix, niman onikitak okis sen caballo chichiltik. On yejuan ipan yetiaya okiselij sen espada niman tekiuajyotl para kichiua nouijsokilistli ipan in tlaltikpaktli, niman kichiuas para on tlakamej ma nomiktikan.

⁵ Ijkuak on Borreguito okitlapoj on ika yeyi sello, onikak ijkuak on ika yeyi ken itlaj yolki tlajtlachaya onechijlij: “¡Xuajla niman xkita!” Onontlachix, niman onikitak sen caballo tlilijki*. On yejuan ipan yetiaya kitkiya sen tlatemachiuajli para ika tlatemachiuas.

⁶ Niman intlajkotian on nauimej yejuan ken itlaj yolkej tlajtlachayaj, onikak sen tlajtojli yejuan kijtouaya: “Yejkos on tiempo ijkuak se kitlanis san se litro trigo, noso san yeyi litro iteyo cebada ipan se tonajli, pero maka xkijtlako on aceite nion on vino.”

⁷ Ijkuak on Borreguito okitsayan on ika naui sello, onikak ijkuak on ika naui ken itlaj yolki tlajtlachaya onechijlij: “¡Xuajla niman xkita!”

⁸ Onontlachix, niman onikitak sen caballo kostik. On yejuan ipan yetiaya kuitiayaj Mikilistli, niman on yejuan nisiu kuajtokaya kuitiayaj Miktlan. Okinmakakej poder ipan sen naui partejtipan in tlaltikpaktli para kinmiktiskej on tlakamej ikan nouijsokilistlis, ikan apistli, ikan kualolistli, niman ikan on tekuanimej yolkej yejuan kisaskej ipan in tlaltikpaktli.

⁹ Ijkuak on Borreguito okitsayan on ika makuijli sello, ne tlatsintlan de on tlaixpan* onikitak inalma on yejuan okinmiktijkej pampa kineltokayaj itlajtol Dios, niman pampa kiteijliayaj itlajtol.

¹⁰ Yejuamej ikan chikauak tlajtojli ijkin kijtouayaj: “ToTEKO yejuan nochi tiueli, tejua tichipauak niman nochipa tikchiua on tlen tikijtoua, ¿hasta kamanon más timouejkauas para tikinyolkuitis niman tikincastigaros on yejuan chantij ipan on tlaltikpaktli yejuan otechmiktijkej?”

¹¹ Kemaj cada se okimakakej intlaken istak, niman okinmijlijkej ma noseuikan sa achijtsin más chika ma ajsi on kech iminikniuan ipampa itekiu Cristo ika onkaj no mikiskej ken yejuamej.

¹² Ijkuak nikitstikatka on Borreguito kitsayantikatka on yejuan ika chikuasen sello, sanoyej* chikauak otlalolin. On tonaltsintli otlileu ken itlaj ajmankatlakentli*, niman on metstli onokau ken itlaj yestli.

¹³ Niman ijkon ken itlakijlo on kojtli* higuera* xini, maski xe chikaui ijkuak sanoyej chikauak kuiuixoua on ajakatl, no ijki onikitak oxinkej ipan tlajli on sitlalimej.

¹⁴ On cielo* opopoliu ken itlaj amatl kimimilojtiuij*, niman nochi on tepemej niman on tlaluaktsitsimej yejuan onokej atlajkotian onejkuanijkej kampa onkatkaj.

¹⁵ Kemaj on inreyes in tlaltikpaktlakamej inuan on uejueyixtokej, inuan on soldadojtlayekankej, inuan on yejuan ricos, inuan on yejuan kipiyaj tekiuajyotl, iuan nochi tlakatl yejuan esclavo, niman xesclavo, oniyanatoj ijtik on teostomej niman intsajlan on temej yejuan onokej ipan on tepemej.

¹⁶ Niman yejuamej kintsajtsiliayaj on tepemej niman on temej: “Topan xmalauakan niman xtechiyanakan para maka techitas on yejuan yeuatikaj ne ipan on ueyixtikaj trono, niman para maka tikpiyaskej on temojtij tlauejli, yejuan kitemakas on Borreguito,

¹⁷ pampa yoyejkok on ueyi tonajli para techcastigaros ikan intlauel. Xakaj uelis kixikos on tlauejli.”