El Apocalipsis 5 - El Nuevo Testamento

Juan okitak on tlajkuilolamatl mimiltik niman on Borreguito

¹ Kemaj iyekmakopa on yejuan yeuatikatka ipan on ueyixtikaj trono* onikitak sen tlajkuilolamatl mimilijtikaj*. On tlajkuilolamatl tlajkuilojloj katka ijtik niman ikuitlapan, niman kampa ontlantok ika mimilijtikatka kipiya chikome sellos yejuan ika salijtikatka.

² Niman onikitak sen ángel, yejuan kipiya poder. Niman in ángel ikan chikauak tlajtojli kijtouaya: “¿Akinon kitocaroua kitsayanas on sellos para kitlapos in tlajkuilolamatl mimilijtikaj*?”

³ Pero xnemiya nion ne iluikak, nion ipan tlaltikpaktli, nion ne miktlan kampa nemij on mikatsitsimej yejuan ouel okitlapoj on tlajkuilolamatl, nion para kitas tlinon tlajkuilolnestikaj.

⁴ Niman nejua sanoyej* nichokaya pampa xkinextiayaj akinon kitocaroua para kitlapos on tlajkuilolamatl, nion para kitas ijtik, nion nomachtis.

⁵ Kemaj, semej on ueuetkej tlayekankej onechijlij: “Maka sa xchoka. Xkita on León. Yejua in sen tlakatl yejuan ualejtikaj itech Judá niman ualejtikaj itech rey David. Yejua yotetlan. Yejua ika, uelis kitsayanas on chikome sellos niman kitlapos on tlajkuilolamatl mimilijtikaj.”

⁶ Kemaj, itlajkotian on ueyixtikaj trono* niman imixpan on ken yolkej niman on ueuetkej tlayekankej onikitak ijkatikatka sen Borreguito. Ipan on Borreguito nestikatka ika yokimiktijkaj. Yejua kipiyaya chikome ikuakuauuan niman chikome ixtololojuan. In kijtosneki on chikome iEspíritus Dios yejuan imanian nochi in tlaltikpaktli okinuajtitlankej.

⁷ On Borreguito ouajlaj itech on ueyixtikaj trono, niman okontilan on tlajkuilolamatl mimilijtikaj* yejuan kipiyaya ipan iyekma on yejuan ipan on ueyixtikaj trono* yeuatikatka.

⁸ Ijkuak on Borreguito okontilan on tlajkuilolamatl mimilijtikaj, ixpan onotlakuantelketskej on nauimej yejuan ken yolkej niman on 24 ueuetkej tlayekankej. Cada se kipiyaya sen arpa, niman kitkiyaj copas tlachijchijtin ikan oro. On copas tetentiayaj ikan kopajli, niman on kopajli kijtosneki inoraciones on yolchipajkej itech Dios.

⁹ Yejuamej nokuikatiayaj sen yenkuik kuikatl: “Tejua mitstocaroua tikontilanas on tlajkuilolamatl mimilijtikaj, niman tiktsayanas isellos, pampa omitsmiktijkaj, niman ikan moyesyo otitechkou para otitechteyaxkatij itech Dios. Tlakamej de nochimej razas, nochi kech seseknekamej tlajtoltin*, nochi kalpanmej niman nochi países otikinkou para Dios.

¹⁰ Niman otitechtlalij ken reyes niman tiopixkej para tiktekichiuiliskej Dios, niman tejuamej titlamandaroskej ipan tlaltikpaktli.”

¹¹ Kemaj nimantsin onikitak, niman onikak intlajtol* miyekej ángeles. Yejuamej millones niman millones katkaj yejuan kiyeualojtikatkaj on ueyixtikaj trono* inuan on nauimej yejuan ken itlaj yolkej tlajtlachayaj, niman on ueuetkej tlayekankej.

¹² Niman ikan chikauak tlajtojli ijkin kijtouayaj: ¡“On Borreguito yejuan okimiktijkaj, kitocaroua kiselis on poder, on riqueza, on tlamatkilistli, on chikaualistli, on tetlakaitalistli, on ueyilistli niman on yekteneualistli!”

¹³ Niman nochi on tlajtlamach* niman nochi on tlen yoltikaj yejuan Dios okitlalij, yejuan nemij iluikak, yejuan nemij ipan in tlaltikpaktli, niman ne miktlan kampa nemij iminalmas on mikatsitsimej, niman ijtik mar, niman nochi on tlajtlamach* yejuan impan onkaj, ijkin onikak kijtouaj: On yejuan yeuatikaj ipan on ueyixtikaj trono* niman on Borreguito, para nochipa ma kinmakatiakan on yekteneualistli, on tetlakaitalistli, on ueyilistli niman on poder.

¹⁴ Niman on nauimej yejuan ken itlaj yolkej tlajtlachayaj kijtouayaj: —¡Ma ijki nochiua! Niman on 24 ueuetkej tlayekankej onotlakuantelketskej niman okimauistilijkej on yejuan para nochipa kipiya nemilistli.