El Apocalipsis 4 - El Nuevo Testamento

Ne iluikak Dios kiselia ueyilistli

¹ Kemaj onajkotlachix niman onikitak uajtlapojtikaj sen tsakuijlotl ne iluikak. Niman on tlajtojli yejuan achtoj onechnotska ken itlaj trompeta, onechijlij: “Nikan xuajtlejko, niman nimitsititis on tlajtlamach* yejuan nochiuas sankin.”

² Kemaj nimantsin on Espíritu Santo okiyekan notlamachilis ikan poder. Kemaj onikitak sen ueyixtikaj trono* ne iluikak, niman ipan on ueyixtikaj trono* akinonon yeuatikatka.

³ Niman on yejuan ipan on trono* yeuatikatka, petlantikatka ken itlaj tetl kualtetsin itoka jaspe niman cornalina. Niman on trono* kiyeualojtikatka sen kosemalotl, niman on kosemalotl petlantikatka xoxojki ken on tetl itoka esmeralda.

⁴ Niman no onikitak 24 tronos yejuan onkatkaj iyeualkan on trono yejuan achtoj onikitak. Niman ipan on 24 tronos, yejyeuatikatkaj 24 ueuetkej tlayekankej. Yejuamej tlakemejkej katkaj ikan tlakentli* istak niman ipan intsontekon kipiyayaj coronas yejuan tlachijchijtin ikan oro.

⁵ Ipan on ueyixtikaj trono* kisaya miyek tlapetlanajli, kakistiya miyek tlajtojli niman tlakomoniya. Niman ixpan on ueyixtikaj trono, tlikuitikatkaj chikome tlauiltin. On chikome tlauiltin sano yejua on chikome iEspíritus Dios.

⁶ Niman ixpan on ueyixtikaj trono* onkatka on tlen nesiya ken sen mar tlachijchijtli ikan teskatl. Yejuan sanoyej* chipauak ken teskatl yejuan pepetlaka. Tlajkotian niman iyeualkan on ueyixtikaj trono* nemiyaj nauimej on ken yolkej yejuan imixpan niman inkuitlapan tentikatka ikan imixtololojuan.

⁷ On achtoj tlajtlachaya ken itlaj león, on yejuan ika ome tlajtlachaya ken itlaj uakax, niman on yejuan ika yeyi kipiyaya ixayak ken sen tlakatl, niman on yejuan ika naui tlajtlachaya ken itlaj kuaktli ijkuak patlantiu.

⁸ Niman cada yolki kipiyaya chikuasen imastlakapal. Niman nochiuiyan ipan imintlalnakayo, hasta tlatsintlan de inmastlakapal, tentikatkaj ikan inmixtololojuan. Cada tonajli niman cada yeuajli xkajkauayaj ika ijkin kijtouayaj: ¡Yektli, yektli, yektli, toTEKO Dios yejuan nochi ueli. Nochipa nemiya, niman aman nemi, niman yejuan uajlas!

⁹ Niman chika on ken itlaj yolkej kimakayaj ueyilistli, tetlakaitalistli niman tlaxtlauijli on yejuan yeuatikatka ipan on ueyixtikaj trono, yejuan nemi para nochipa,

¹⁰ on 24 ueuetkej tlayekankej no notlakuantelketsayaj ixpan niman kimauistiliayaj on yejuan nemi para nochipa. Yejuamej no kitlaliayaj incoronas ixpan on ueyixtikaj trono, niman ijkin kijtouayaj:

¹¹ ToTEKO Dios, tejua mitsmelaua* para tikselis ueyilistli, tetlakaitalistli, niman poder, pampa tejua nochi tlajtlamach* otiktlalij, niman otikintlalij, niman ijki onokej ken tejua otiknek.